8 कऊँकि विश्वासो रेई जरिए कृपा तेई तुसा रा उद्धार ऊई रा और ये तुसा री तरफा ते निए, बल्कि परमेशरो रा दान ए। 9 और ना कामो री बजअ ते, एड़ा नि ओ की कोई कमण्ड करो।

4 पर परमेशरे जो दया रा धनी ए, आपणे तेस बड़े प्यारो री बजअ ते, जेतेते तिने आसा साथे प्यार कित्तेया। 5 जेबे आसे पापो री बजअ ते मरे रे थे, तो आसे मसीह साथे जिऊँदे कित्ते। परमेशरो री कृपा तेई तुसा रा उद्धार ऊई रा।

23 कऊँकि सबी पाप करी राखेया और परमेशरो री महिमा ते दूर ऊईगे रे। 24 पर परमेशरो री कृपा ते तेस छुटकारे रे जरिए, जो यीशु मसीह रे ए, मुफ्तो रे तर्मी ठराए जाओए।

15 पर आदमो रे पाप और परमेशरो री दया ते परी री कृपा रे बऊत बड़ा फर्क ए। कऊँकि जेबे एक माणूंए रे पापो री बजअ ते बऊत सारे माणूं मरे। तिंयाँ ई परमेशरो री कृपा और धार्मिकता रा तोफा जो तिने आसा खे यीशु मसीह रे जरिए दित्तेया बऊत सारे लोका रा पाप माफ करने खे बऊत बड़ा दान ए।

21 ताकि जेड़ा पापे मौत फैलांदे ऊए सारे लोका पाँदे राज कित्तेया, तेड़ा ई आसा रे प्रभु यीशु मसीह रे जरिए परमेशरो री कृपा तिना खे धार्मिक बणाओई और अनन्त जीवन देओई।

14 तेबे तुसा लोका पाँदे पापो रा कोई अक्क नि रणा। कऊँकि तुसे एबे बिधानो रे साअरे नि जिऊँदे बल्कि परमेशरो री कृपा रे सआरे जिओ ए।

15 तो क्या ऊआ? क्या आसे इजी री खातर पाप करिए कि आसे बिधानो रे अधीन निए, बल्कि कृपा रे अधीन ए? कदी पनि।

9 परमेशरे आसा रा उद्धार करी राखेया और पवित्र जिन्दगी जिऊणे खे बुलाई राखेया। तिने ये म्हारे केसी कामो रे मुताबिक नि, पर आपणे मकसदो और आपणी कृपा ते एड़ा करी राखेया। से कृपा अनन्त कालो तेई यीशुए मसीह रे जरिए आसा खे राखी दी थी।

11 कऊँकि परमेशरो री कृपा प्रकट ऊई री, जो सबी माणूंआ रा उद्धार करी सकोई। 12 एसा कृपा रे जरिए परमेशर आसा खे चेतावणी देओआ कि आसे अभक्ति और दुनिया री बुरी इच्छा ते मन फेरी की एस जुगो रे आपू पाँदे काबू राखी की, तर्म और भक्तिया साथे जिन्दगी बिताऊँ।

13 इजी बजअ ते आपणे-आपणे मनो खे एड़ा त्यार करो, जेड़ा लोक काम करने खे आपणा लक बानोए और ओशा रे रई की तेसा कृपा री पूरी उम्मीद राखो, जो प्रभु यीशु मसीह रे आऊणे रे बखते तुसा खे मिलणे वाल़ी ए।

10 एबे परमेशर जो सारी कृपा रा दाता ए, जिने तुसे मसीह रे आपणी अनन्त महिमा खे बुलाए, तुसा रे थोड़ी देर दु:ख उठाणे ते बाद आपू ई तुसे सिद्ध और स्थिर और तागतबर करने।

8 प्रभु दयालु ओर कृपा करने वाल़ा, देरा ते गुस्सा करने वाल़ा

ओर बऊत ई करूणा करने वाल़ा ए।*

6 पक्का पलाई ओर करूणा जिन्दगी पर मां साथे बणी री रणी

ओर मां प्रभुए रे कअरे जुगो-जुगो तक रणा।

17 म्हारे प्रभु परमेशरो री दया आसा पाँदे ओ,

जो काम आसे करूँए तिजी खे सफल कर,

जरूर प्रभु, तूँ म्हारे आथो रे काम सफल कर।

1 ओ यहोवा, मैं बऊत पारी मुसीबता रे बखते ताखे आका पाईया!

2 ओ प्रभु, मेरी पुकार सुण!

तेरे कान मेरे मतादा रिया तँईं पुकारने रिया तरफा खे त्यानो साथे लगे रे रओ!

24 यहोवा ताखे आशीष देओ

ओर तेरी रक्षा करो

25 यहोवा तां पाँदे आपणे मुंए रा तेज चमकाओ

ओर तां पाँदे दया करो:

26 यहोवा तेरी पलाई करो,

ओर ताखे शान्ति देओ।"

18 तेबे बी परमेशर इजी रिया तँईं देरी करोआ ताकि तुसा पाँदे अनुग्रह करो ओर इजी री खातर से ऊच्चे उठणा ताकि तुसा पाँदे दया करो, कऊँकि परमेशर यहोवा न्यायी परमेशर ए; सेयो माणूं कितणे तन्य ए जो तेस पाँदे उम्मीद लगाई राखोए।

21 आँऊ प्रार्थना करूँआ कि प्रभु यीशुए री कृपा परमेशरो रे लोका साथे रओ। आमीन्।

25 आँऊ प्रार्थना करूँआ कि म्हारे प्रभु यीशु मसीह री कृपा तुसा री आत्मा पाँदे ऊँदी रओ। आमीन्।

16 इजी री खातर आओ, आसे ईम्मत बानी की परमेशरो रे नेड़े चलूँए, जो कृपा ते परी रा। तेबे परमेशरो आसा पाँदे दया और कृपा दखाणी और जो जरूरता रे बखते म्हारी मताद करो।

24 पर आऊँ आपणे प्राणो खे कुछ नि समजदा कि तेसखे प्यारे जाणूं, बल्कि ये कि आऊँ आपणी दौड़ा खे और आपणी सेवकाईया खे पूरा करुँ, जो मैं परमेशरो री कृपा रे सुसमाचारो पाँदे गवाई देणे खे प्रभु यीशु मसीहे ते पाई राखी

16 "कऊँकि परमेशरे दुनिया रे लोका ते एड़ा प्यार कित्तेया कि तिने आपणा एकलौता पुत्र देईता, ताकि जो कोई तेस पाँदे विश्वास करो, से नाश नि ओ, पर अनन्त जीवन पाओ।

14 "तेबेई तो जे तुसे लोका रे पाप माफ करोगे, तो तुसा रे स्वर्गिय पिते बी तुसा रे पाप माफ करने।

13 जो माणूं आपणे पाप लकोआ, तेसरा काम सफल नि ऊँदा,

पर जो तिना खे मानी लओआ ओर छाडी बी देओआ,

तेस पाँदे दया करी जाणी।*

1 तेबे हिजकिय्याहे सारे इस्राएल ओर यहूदा रे लोका खे सन्देसा पेजेया ओर एप्रैम ओर मनश्शे रे गोत्रा खे ये लिखी की चिट्ठी पेजी कि तुसे यरूशलेम शईरो दे यहोवे रे मन्दरो दे इस्राएलो रे परमेशर यहोवे खे फसह रा त्योआर मनाणे खे आओ। 2 राजा ओर तेसरे परदान ओर यरूशलेम शईरो री मण्डल़िए सला करी राखी थी कि फसह रा त्योआर दूजे मीन्ने मनाणा। 3 सेयो तेस त्योआरो खे तेस बखते इजी बजा ते नि मनाई सको थे, कऊँकि थोड़े जे ई पुरोईते आपू-आपू खे पवित्र करी राखेया था ओर प्रजा रे लोक यरूशलेम शईरो रे कट्ठे नि ऊई रे थे। 4 ये गल्ल राजा ओर सारी मण्डल़िया खे ठीक लगी। 5 इजी री खातर तिने इस्राएलो रे सारे देशो दे, बेर्शेबा शईरो ते लई की दानो रिया जगा तक एक सन्देश पेजेया, कि यरूशलेम शईरो दे इस्राएलो रे परमेशर यहोवे रिया तँईं फसह रा त्योआर मनाणे खे आओ, कऊँकि तिने इतणी बड़ी संख्या रे फसह ईंयाँ नि मनाया था जेड़ा लिखी राखेया। 6 तेबे डाकिये राजा ओर तेसरे परदाना ते पर्चिया लई की, राजे री आज्ञा रे मुताबिक सारे इस्राएलो ओर यहूदा रे कूमे ओर ये बोलदे गये, "ओ इस्राएलियो! अब्राहम, इसहाक ओर इस्राएलो रे परमेशर यहोवे रिया तरफा खे फिरो, ताकि से अश्शूरो रे राजे रे आथो ते बची रे तुसा लोका रिया तरफा खे फिरो। 7 ओर आपणे बुजुर्गा ओर पाईया जेड़े नि बणो, जिने आपणे बुजुर्गा रे परमेशर यहोवे साथे विश्वासघात कित्तेया था ओर तिने से बेज्जतिया जोगा करी ता था, जेड़ा कि तुसे आपू देखणे लगी रे। 8 एबे आपणे बुजुर्गा जेड़ी हठ नि करो, बल्कि यहोवे रे वशो दे ऊई की तेसरी तेसा पवित्र जगा रे आओ, जो तिने सदा खे पवित्र करी राखी ओर आपणे परमेशर यहोवे री आराधना करो, ताकि तेसरा पड़केया रा गुस्‍सा तुसा पाँदा ते दूर ऊई जाओ। 9 जे तुसे यहोवे रिया तरफा खे फिरोगे, तो जो तुसा रे पाईया खे ओर बच्चेया खे बन्दी बणाई की लईगे रे, तिना तुसा रे पाईया ओर बच्चेया पाँदे दया करनी ओर सेयो एते देशो रे वापस आई सकोए, कऊँकि तुसा रा यहोवा परमेशर अनुग्रह करने वाल़ा ओर दयालु ए, ओर जे तुसे तेसरी तरफा खे फिरोगे तो तेस आपणा मूँ तुसा ते नि मोड़ना।" 10 ईंयाँ डाकिये एप्रैम ओर मनश्शे रे देशो रे शईरो-शईरो रे ऊँदे ऊए जबूलूनो तक गये, पर तिने तिना रिया आसिया लगाईया ओर तिना रा मजाक उडाया। 11 तेबे बी आशेर, मनश्शे ओर जबूलूनो बीचा ते कुछ लोक दीन ऊई की यरूशलेम शईरो खे आए। 12 यहूदा दे बी परमेशरो री एड़ी सामर्थ ऊई, कि सेयो एक मन ऊई की, जो आज्ञा राजा ओर परदाने यहोवे रे वचनो रे मुताबिक दित्ती थी, तेतेखे मानणे खे त्यार ऊए।

13 ईंयाँ जादा लोक यरूशलेम शईरो रे इजी खे कट्ठे ऊए, ताकि दूजे मीन्ने रे बिना सजेड़े री रोटिया रा त्योआर मनाओ ओर बऊत बड़ी सभा कट्ठी ऊई गी। 14 तेबे तिने उठी की यरूशलेम शईरो रिया बेदिया ओर तूप बाल़ने रिया सब जगा चकी की किद्रोन नाल़े रे सेटी तिया। 15 तेबे दूजे मीन्ने रे चौदुए दिने तिने फसह रे डांगर बलि कित्ते, तेबे पुरोईत ओर लेविये शर्मिंदा ऊए ओर आपू खे पवित्र करी की होमबलिया चढ़ाणे खे यहोवे रे मन्दरो रे ली आए। 16 सेयो आपणे नियमो रे मुताबिक, मतलब परमेशरो रे दास मूसे रे बिधानो रे मुताबिक, आपणी-आपणी जगा रे खड़े ऊए ओर पुरोईते होमबलिया रा खून लेविया रे आथो ते लई की छिड़की ता। 17 कऊँकि सभा रे बऊत एड़े थे जिने आपू खे पवित्र नि करी राखेया था, इजी री खातर सबी अशुद्ध लोका रे फसह रे डांगरा खे बलि करने रा अक्क लेविया खे दित्तेया, ताकि तिना खे यहोवे रिया तँईं पवित्र करो। 18 बऊत सारे लोके, मतलब एप्रैम, मनश्शे, इस्साकार ओर जबूलूना बीचा ते कई एड़े थे जो शुद्ध नि ऊई रे थे, तेबे बी सेयो फसह रे डांगरा रा मास लिखी री बिधिया रे खलाफ खाओ थे, कऊँकि हिजकिय्याहे तिना रिया तँईं ये प्रार्थना कित्ती थी कि यहोवा जो पला ए, से तिना सबी रे पाप टखी देयो। 19 जिने परमेशरो री, मतलब आपणे बुजुर्गा रे परमेशर यहोवे खे टोल़ने दे आपणा मन लगाई राखेया, चाए सेयो पवित्र जगा री बिधिया रे मुताबिक शुद्ध पनि ओ। 20 ओर यहोवे हिजकिय्याह री ये प्रार्थना सुणी की लोक ठीक कित्ते। 21 जो इस्राएली यरूशलेम शईरो रे आजीर थे, सेयो सात दिना तक बिना सजेड़े री रोटिया रा त्योआर बड़ी खुशिया साथे मनांदे रये ओर हर रोज लेविये ओर पुरोईत ऊच्ची आवाजा रे यहोवे खे बाजे बजांदे ऊए स्तुति करदे रये। 22 जितणे लेवी लोक यहोवे रा पजन समजा साथे करो थे, तिना खे हिजकिय्याहे शान्तिया रे वचन बोले। ईंयाँ सेयो मेलबलि चढ़ाई की ओर आपणे बुजुर्गा रे परमेशर यहोवे सामणे आपणे पापो खे मानदे रये ओर तेस ठराए रे त्योआरो रे साता दिना तक खांदे रये।

23 तेबे सारी सभा रे लोके सलाह् कित्ती कि आसा सात दिन ओर त्योआर मनाणा, तेबे तिने सात दिन ओर खुशिया साथे त्योआर मनाया। 24 कऊँकि यहूदा रे हिजकिय्याह राजे सभा खे 1,000 बाच्छू ओर 7,000 पेडा-बाकरिया देईतिया ओर परदाने सभा खे 1,000 बाच्छू ओर 10,000 पेडा-बाकरिया दित्तिया ओर बऊत सारे पुरोईते आपू खे पवित्र कित्तेया। 25 तेबे पुरोईत ओर लेविया समेत यहूदा री सारी सभा, ओर इस्राएलो ते आए रे लोका री सभा ओर इस्राएलो रे देशो ते आए रे ओर यहूदा रे रणे वाल़े परदेशी, इने सबी खुशिया मनाईया। 26 ईंयाँ यरूशलेम शईरो दे बऊत खुशिया ऊईया, कऊँकि दाऊदो रे पाऊ इस्राएलो रे राजा सुलैमानो रे दिना ते एड़ी गल्ल यरूशलेम शईरो रे नि ऊई थी। 27 अन्तो रे लेवी पुरोईते खड़े ऊई की प्रजा खे आशीर्वाद दित्तेया ओर तिना री सुणी ओर तिना री प्रार्थना तेसरे पवित्र धामो तक, मतलब स्वर्गो तक पऊँची।