2 Əzə̂ nɔ̂, a sə kə djingli äwä lə aərə ngbatshe. Kədə ə̈bə̈ əzü kə djingli äwä djingli lə əpʉ ama ye ne, tshə sə tə əzü ə̂në tshə nê gâ ye, tshə lï ndə kə pa tshə ru tshelə ye də əndu ye nɔ̂.

27 Djatra kə vrɔ Ndjapä ə̂në ə fʉ lə ala Abä də Ndjapä nə kɔ kə də̂ kə pa əzü ga ndə ayasoro də ayashe koya lə aərə əyo nə̂ əndje, ə bata tə̂ ye tə̂ əmbrʉ ərə tshepashɔ səye nɔ̂.

17 Ə̂rɔ̂ âkrâ nɔ̂, ə̂rɔ̂ kə to ərə nɔ̂, to mâ lafɔ â jerə kɔ, ə to mâ ndə Abä, tə awombrə aərə ə̂në ə tshe lafɔ kɔ, ətshə ə̂në tshə sə kʉ kpə mandâ tə̂ ye: srɨyʉ ye sə sə tə̂ nə ne kɔ.

9 Â Ndjapä nə zâ ətshə tə əzü ə̂në tshə lï nɔ̂ gâ ye â tshə dô tə̂ ye, mandânə, tə Awoshe azü nə ə̂në əndje sə kə dji əpʉ ama ye kɔ lə kuzu â əndje sə də sorô piii.

21 Jezu pâ kə ətshə ə pa: «Kədə bə yində kə sə tə ə̂rɔ̂ əzü nɔ̂, gü ə kä aərə nə̂ zə nɔ̂, ə krü tshelə ngendja nə tə̂ alayïəyo ka ə sɔtə̂ aərə mâ lafɔ-e. Mandânə, nä gâ əmə ə zä äwä əmə.»

11 «Mə pâ əpʉ kə e rə ndə kə pa ə̂rû nə̂ əmə sə tə̂ lɔsu e ka ə̂rû nə̂ e nə lï nɔ̂.

24 Ʉrrr ndjɔ kpəsəye, e yu tshuku ə̈bə̈ ərə yu bale də əɨrɨ əmə ne. E yü tshuku ərə, e sə kə sɔtə̂ nə, kanika ə̂rû tshelə e lï nɔ̂.»

2 E mbrə̈ mbrə̈ tə̂ e Lïndə̂ kə mbrə tə̂ azü tshepashɔ tshe kpəsəye ne, bale e kätə̂ äwä kə Ndjapä tshə do tshelə kə wusə̂ ərə nə̂ e tə tafa nə, kanika e yerɔ äwä ərə ə̂në tshelə Ndjapä nə yində nə də ərə ə̂në ə sə tə ə̂rɔ̂ nə, ə̂në ə fʉ ə fʉ â ə lï nɔ̂ kɔ.

10 Alaye əmə, mə sə kə mʉ əpʉ kə e də əɨrɨ Âgbɔ̂ Əyïngerə nə̂ əzə̂ Jezu Kristə: e djï tə̂ e ndə kə pa tshelə takpa tə̂ e sɔ sɔ ne. Bale, e tɔ̈ popo angâ e lə takpa tə̂ e kanika kə tegbɔ kumu e də əpʉ lɔsu e sə kʉ bale.

14 Bale, gâ pâ ə̂dû ərə nɔ̂, e yï tə̂ e, kə yi tə̂ sə tə̂ äwä kə ngbo azü gâ tə̂ nə ə̂në ə rô aərə nɔ̂ kɔ.

1 E sɔ̂ sɔ̂tə̂ ə̈bə̈ əpʉ kə gbɔgbɔ lɔsu e lə Kristə, wala ə̈bə̈ əpʉ kə zɨtɨ lɔsu e lə kə yində e ə̂në Kristə nə yində e kɔ, wala kə sə bale lə Yîrə̂ nə, wala e yi tə̂ e yi ə sə sə də ə̂rɔ̂ lɔsu lə takpa tə̂ e ne a? 2 Rəkɔ, e djï tə̂ e ndə kə pa ə̂rû su lɔsu əmə ə su. E yï tə̂ e lə äwä bale ə sə̈ də lɔsu bale də əpʉ bale tə̂ lɔsu e. 3 E mä mä ərə ndə kə pa e ro angâ e ə ro wala azü wu e ə wu ne. Bale, tə̂ äwä kə mbrə tə̂ e teashe, e wü angâ e lə ala e tə azü ə̂në əndje rô e gâ ye. 4 Ndə kə pa əzü bale bale lishi gâ tə̂ ərə nə̂ ye də ə̂tə̂ ye, ərə nə̂ angâ nə də̂ tshə ko ala ye gâ tə̂ nə. 5 E sə̈ də aəpʉ tə̂ lɔsu e lə takpa tə̂ e mata ə̂në Jezu Kristə sə̂ də nə kɔ.

6 Ətshə ə̂në tshə sə ngâ tə̂ Ndjapä kɔ,

tshə wû tə̂ ye wû ə lï ə lï də Ndjapä nə ne,

7 bale, tshə kô ərə sə̂ nɔ̂ də ə̂tə̂ ye gâ tʉ tə̂ ye gâ ye

ə mbrə̂ tə̂ ye tə kanga

ə dô tə̂ ye mata azü

â azü wû ətshə ngâ tə amba əzü,

8 tshə mbrə̂ tə̂ ye də ə̂tə̂ ye teashe

ə dô tə̂ ye tə awodji əpʉ ama Ndjapä

ʉrrr ndjɔ ə tshû kuzu, kuzu la masheyɔ.

9 Âdâ nə ə̂në Ndjapä zâ ətshə tɔ gâ lafɔ gâ tə̂ əgerə ətshe

ə zâ əɨrɨ ə̂në ə rô əɨrɨ nɔ̂ gâ ye kɔ kə ətshə kɔ kə sə̂,

10 kanika də əɨrɨ Jezu,

əzü nɔ̂ wala ərə nɔ̂ mâ lafɔ,

pâ ashɔ, tshekudu ashɔ, gbəte

11 â əndje bale bale sə kə pa də ama əndje ə pa

Jezu Kristə nə sə tə Âgbɔ̂ Əyïngerə

ndə kə mbe Abä də Ndjapä nə.

12 Rəkɔ, alaye əmə ə̂në mə yində e ngbatshe kɔ, mata ə̂në e sə kə dji əpʉ ama alɔnɔ̂ kɔ, ə də̂ kʉ də ala əmə də̂ ne kɔ, bale kpəsəye kwatəndje, ə̂në mə sə sə je lə takpa tə̂ e ne kɔ, e mbrə̈ kosəra tə azü ə̂në e shê lə kuzu gâ ye kɔ, də awa də kə gu ə gugu. 13 Mbrə ə̂në Ndjapä nə kə mbrə kosəra lə e ndə kə pa e yində aərə ə mbrə ka ə fʉ tə̂ ye.

14 E mbrə̈ ərə nɔ̂ ə dɨ̈ tshelə ama e dɨ̈ wala ə pä ashera pä ne, 15 ndə kə pa ə̈bə̈ əpʉ bale sə sə lə akrɔ e ne, e sə mvo, tə aneshe nə̂ Ndjapä, ə̂në ə̈bə̈ əmbrʉ ərə bale sə sə tə̂ e lə takpa tə̂ abəngâ e ə̂në äwä əndje ndɨ̂ gâ ye â əndje sə tə aəmbrʉ azü kɔ ne. Lə takpa tə̂ əndje nə, e tshë mata ə̂yîəwo tadja pâ ashɔ, 16 mbrə ə̂në e sə kə na də əpʉ sorô kə əndje. Ə sə kə sə tə ərə kə da əkro əmə tə̂ nə, tə̂ əlo kə gu Kristə nə: rəkɔ, mə kpê kəmə ärɔ̈ nə kpê ambanə ne, mə wû kəmə əyo nə wû ambanə ne.

17 Bale, kədə ndje mə lï ndə kə pa mə ka tə̂ əmə ə̈ndjï əmə tu gâ pâ əkrɔ nə ə̂në ə sə tə kosəra əpʉ lɔsu e nə kə Ndjapä kɔ, tshelə əmə mɔ ə mɔ tə̂ nə, â əzə̂ də a-e nɔ̂, tshelə əzə̂ mɔ ə mɔ. 18 E-e ndje, tshelə e mɔ̈ tə̂ nə, tshelə e mɔ̈ gâ ndə əmə!

19 Mə za lɔsu əmə gâ pâ Âgbɔ̂ Əyïngerə Jezu ə pa mə sə kə wla Timɔte katshä katshä səye kə e, ndə kə pa mə dji ndə e ka lɔsu əmə zɨtɨ. 20 Mbrə ə̂në ə̈bə̈ əzü kpî tə̂ ye ndə kə pa ä də ətshə pa ndə əpʉ ə̂në ə sə tə̂ lɔsu əmə kɔ, tshə li tshelə ye gâ pâ kə sə e kɔ guta gu ne. 21 Ə̂dû azü nə sə kə pra aərə ə̂në ə wu əndje də ə̂tə̂ əndje kɔ, ə də̂ aərə mbrə Jezu Kristə də̂ əndje pra kɔ ne. 22 Bale, e wusə̂ nə ə pa ətshə, tshə yîsə̂ aərə ə̂në tshə mbrə̂ kɔ gashu gâ ye: mata əgblə ngotə̂ abä nə, ä də ətshə mbrə̂ kosəra mbrə Ə̂rɔ̂ Əpʉ gâ ye. 23 Rəkɔ, mə wusə̂ nə ə pa mə sə kə wla ətshə kə e alɔ ə̂në mə wu əpʉ nə̂ əmə nə dîrî dîrî gâ ye kane. 24 Mə wûsə̂ nə mâ tə̂ lɔsu əmə, lə Âgbɔ̂ Əyïngerə, ə pa mə sə kə na də ə̂tə̂ əmə.

25 Mə wû lə ala əmə ə lï ndə kə pa mə wla əndʉ Epafrɔditə, aye əmə, gbɔbəngâ kosəra nə̂ əmə də gbɔbəngâ awlra nə̂ əmə kə e, əyïawla ə̂në e wlâ ətshə kə əmə ə zâ äwä kə ətshə ndə kə pa tshə na ə tɨ əmə gâ lafɔ mata ə̂në mə mâ əgo nə kɔ. 26 Tshə ma əgo ndə kə wu e nɔ̂ kwatə̂ye tə bandanə ə sə kə li tshelə ye ə̂në e djî ndə əpʉ rəka nə̂ ye gâ ye kɔ. 27 Mbrə ə̂në tshə sə̂ də rəka ətshinə ʉrrr trö də kuzu; bale Ndjapä wû əyo ye, ə də̂ kʉtə̂ əyo ye nə də̂ ne, bale tshə wû ndje əyo əmə, ndə kə pa mə sə sə də əyo tə̂ lɔsu əmə gâ pâ nə gâ pâ nə ne. 28 Rəkɔ, mə wlâ əndʉ ye diawû kə e, ndə kə pa tshelə e mɔ ndə kə wu ətshə kwatə̂-e, â ə sə kə zɨtɨ əyo lɔsu əmə nə teashe. 29 E zä ətshə gâ tə̂ e, lə Âgbɔ̂ Əyïngerə nə, də âgbɔ̂ ə̂rû tə̂ lɔsu e. E lʉ̈ marä tə̂ azü rə, 30 mbrə ə̂në mbrə kosəra nə̂ Kristə də̂ tshə sə̂ trö də kuzu nə kɔ. Tshə kâ akwa ye ndə kə pa tshə mbrə kosəra tə̂ ə̂sə̂ e mbrə əmə.

15 E bäta tə̂ e ndə kə pa əzü bale ma ma əmbrʉ ərə kə ə̈bə̈ ngâ nə mandâ əmbrʉ ərə ne. Bale, e prä äwä ə̂rɔ̂ ərə alɔnɔ̂ ndə kə mbrə nə, â sə kəmə lə takpa tə̂ e wala kə azü nɔ̂.