1 Əndje kê âgbɔ̂ awotokrɔ nɔ̂ lə takpa tə̂ azü ə za kosəra nə̂ Ndjapä gâ lə kəna ye mbrə azü nə, kanika tshə ko arəgo də aagia ə to əkrɔ də nə kə Ndjapä nə mbrə anyaka nə̂ azü nə. 2 Âgbɔ̂ awotokrɔ nə lï ndə kə pa tshə wu əyo azü ə̂në əndje wusə̂ ərə ə̂në əndje mbrə kɔ wu ne kɔ gâ ndə azü ə̂në əndje tshî ə̂rɔ̂ äwä tʉ gâ ye kɔ, mbrə ə̂në ətshə də ə̂tə̂ ye, tshə mɔ ə mɔ lə alabə̈ aərə ndje. 3 Â mbrə kə mɔ ətshə nə də̂ tshə lï ndə kə pa tshə to əkrɔ mbrə anyaka nə̂ ye də ə̂tə̂ ye, ndje mbrə aənə̂ azü nə nɔ̂. 4 Ə̈bə̈ əzü bale sə sə kə sə gâ tə̂ əgerə ətshe səkɔ ndə kumu ye ne; kədə Ndjapä kə ê ətshə gâ ye kane, mata ə̂në tshə ê Aarɔ leme-e kɔ.

5 Kristə nə ndje, tshə zâ tə̂ ye zâ, ndə kumu ye, gâ lə əgerə ətshe â dô tə̂ ye tə âgbɔ̂ awotokrɔ nə kɔ ne, bale Ndjapä nə kə pâ kə ətshə ə pa:

«Bə sə tə Ɨrɨ əmə,

kpəsəye, əmə kə zû əbə!»*5.5 Wu Ətsh 2.7.

6 Â tshə pâ kwatə̂ye ə pa:

«Bə sə tə awotokrɔ piii,

a pa də Meləkisedekə.»*5.6 Wu Ətsh 110.4.

7 Lə sorô tə̂ ye pâ ashɔ, Jezu yû Ndjapä ə kɨ̂ ə̂sə̂ əyo tə̂ ye, də âgbɔ̂ râwâ də ngɔla, kə Ndjapä nə ə̂në tshə lï ndə kə pa tshə she ətshə lə kuzu kɔ, â Ndjapä nə djî ətshə mbrə ə̂në tshə kpê rawa Ndjapä nə. 8 Ə̂në tshə sə tə Ɨrɨ Ndjapä nə kɔ, tshə wûsə̂ kə dji əpʉ ama Ndjapä nə lə aərə nɔ̂ ə̂në tshə wû əyo lə nə kɔ. 9 Â Ndjapä nə zâ ətshə tə əzü ə̂në tshə lï nɔ̂ gâ ye â tshə dô tə̂ ye, mandânə, tə Awoshe azü nə ə̂në əndje sə kə dji əpʉ ama ye kɔ lə kuzu â əndje sə də sorô piii. 10 Ndjapä nə pâ tshə sə tə âgbɔ̂ awotokrɔ gâ ye a pa də Meləkisedekə.

11 Ä sə də əpʉ ngbatshe ndə kə pa nə gâ pâ əpʉ səkɔ â aərə ə̂në kə yisə̂ tshelə âdâ əpʉ nə gbɔ ə gbɔ kɔ sə je, mbrə ə̂në e dô tə̂ e tə azü ə̂në kə dji tshelə əpʉ tə̂ e gbɔ ə gbɔ. 12 Mbrə ə̂në, e-e ə̂në e lî kəmə ndə kə pa e sə tə aawoyisə̂ ərə kə azü mambʉmə kerə kɔ, e ma əgo kwatə̂-e ndə kə pa əndje yisə̂ angbʉlî aə̈nü aəpʉ Ndjapä ə yi kə e. E mbrə ʉrrr ə sə kwatə̂-e tə azü ə̂në əndje ma kʉtə̂ əgo angɔ ə ma əgo rəgo ə̂në ə gbɔ ə gbɔ kɔ ma ne. 13 Kandää, əzü ə̂në tshə daka pə tə̂ kə ɔ angɔ, tshə wusə̂ ərə wu gâ pâ əpʉ kə mbrə ərə də äwänə ne, mbrə ə̂në tshə daka pə tə əgblə. 14 Bale, rəgo ə̂në ə gbɔ ə gbɔ kɔ sə mbrə azü ə̂në əndje wusə̂ kə wu tshelə əpʉ, ə̂në əndje wusə̂ kə wu ə̂rɔ̂ ərə kpî tə̂ əmbrʉ ərə kɔ.