Maria

Fofop ngɔt ɛpelɛɛ bhaadal dum nɛ ɛbyel ɛ Yezu

26 Bhii bɛngɔn ɛtɛn nɛ wat yii ɛbum ɛ Elizabhɛt, Zɛɛb eebaazɛdhis fofop Ghabhiliyɛl pɛ dɛl ɛ Nazalɛt, pɛ kyee dik Ghalile. 27 Nyɛ nadhis fofop tak ɛ́ pɛ daa mɔɔ moma ngɔt di ààgu botom ɔ, din ɛ lɛ nabɛ ɛ́ Maali. Nyɛ nadi ɛ́, ghɔɔd motom ngɔt nɛ din ɛ Zozɛf. Zozɛf nabɛ ɛ́ dha ɛ Mɛkoozi Dhavid. 28 Fofop eezɛtuula nyɛ, swos nyɛ, nyɛy náá: «Dia tɔ mɛmyaala, wɔ eeboma nɛ mbɛɛ bhwoob ɛ Zɛɛb. Ghɛŋ ɛ́ nɛ nɔ lɔɔg.»

30 Fofop ɛ́ bookake nɛ nɛ náá: «Maali, nàbem ba, etɛɛ náá, wɔ eeboma nɛ mbɛɛ bhwoob ɛ Zɛɛb. 31 Wɔ waabela ɛbum. Wɔ waabya mɔn mɔɔ motom. Din ɛ wɔ aaget nyɛ ɛ, yɛ aadi ɛ́ Yezu. 32 Nyɛ aaboodi ɛ́ boo-mot, bɛ aadjóo nyɛ Mɔn ɛ Zɛɛb Mɛkaake. Ghɛŋ Zɛɛb ɛ́ waanɛɛg nyɛ mɛkoozi dáa Dhavid bhaab’ɛ nadi ɛ́. 33 Deenek, nyɛ aadi ɛ́ mɛkoozi kɔ mbyak ɛ Zakɔɔb kɔm-kɔm. Ɛyoŋ ɛ lɛ aadi ɛ́ ààbɛ nɛ ɛsik.»

Ɛbyel ɛ Yezu Klisto

18 Gwakeka ɛsuk ɛ ɛbyel ɛ Yezu Klisto. Maali nyɛɛg nabɛ ɛ́ ghɔɔd ɛ Zozɛf. Ɛsok nɛ bɛ nɛ di moma nɛ motom, ye nabɛ ɛ́, Maali eezɛbela ɛbum nɛ ghwyil ɛ Sisim na Dɛɛ.

Djeeb ɛ Maali

46 É di’enek, Maali eezɛke náá:

«Mɛ ɛpeduwal Ghɛŋ nɛ lyem’am djas.

47 Sisim’am ɛ́ pɛ tɔ boo mɛmyaala kɔ ɛsu ɛ Zɛɛb Mɛtsik-bot mam.

48 Etɛɛ náá, nyɛ eeliig mis mɛ, gwyák mot-mɛsa mɛ,

mam ààkobɛ yam mot ɛtela ɛ nyel.

Nɛ tsɛɛtsɛ, kana dwoo lak mos, membu nɛ mesee,

bot aakadjóo mɛ ɛ́ "moma Zɛɛb nazesɛɛ mɛtel ɔ".

49 Etɛɛ náá, Zɛɛb Mɛkaake eesa eboo esonok tɔ lam.

Nyɛ ɛ́ Zɛɛb na Dɛɛ.

50 Nyɛ nɛ bu enɛm esa,

mɛlu nɛ mɛwala djas dum nɛ bot ɛ di eduwal mɛtiŋ mɛ ɔ.

51 Nyɛ eesa mɛsa mɛ mɛbwala nɛ eghɛŋ bɛ.

Nyɛ eetwak bot ɛ di nɛ mɛbet tɔ elyem ɔ.

52 Nyɛ eedis bɛmɛkoozi kɔ mɛbhóó mɛ mɛkoozi mɔɔ.

Bhii tak, nyɛ eedjɛ bot ɛ di ààbɛ nɛ ɛbet ɔ,

mɛbhóó mɛ mɛkoozi.

53 Nyɛ eedjɛ bot ɛ nadi nɛ za ɔ ekum.

Nyɛ eeswaal bɛkum ɛ bot mɛmbɔ mɛ toto.

54 Nyɛ nazyɛ ɛ́ zɛkwyee Yisalaɛl, mot-mɛsa mɛ.

Nyɛ ààdjisa ɛlyaal enɛm nɛ embɛɛ bɛ

55 nɛ Abalaam bɛ nɛ bɛdha bɛ,

kɔm-kɔm sii nɛ kɔm,

dáa nyɛ nakɛk bɛbhaab binaka ɛ.»

4 Zozɛf zokadus pɛ kyee dik Ghalile, pɛ ghaada Nazalɛt, nyɛ neezɛtɔ́ pɛ kyee dik Yude, pɛ dɛl ɛ Bheteleɛm, etɛɛ náá, nyɛ nabɛ ɛ́ dha ɛ Dhavid. 5 Nyɛ ɛ́ bootɔ́ pɛ ɛlɛɛga nɛ ekwyala e min bɛ nɛ ghɔɔd’ɛ Maali. Maali nadi ɛ́ nɛ ɛbum.

6 Dáa bɛ nakadi tin ɛ, wɔ gwaa, ɛwala ɛ nabɛ náá, Maali ɛ́ waasyas ɛ zokazɛkum. 7 Nyɛ ɛ́ boozɛbya mɔn mɔɔ mɛgwyak mɛ. Tin, nyɛ ɛ́ boozɛbét nyɛ ɛghɔɔd, pil nyɛ tɔ bhelangiti, bhii tak nyɛ eezɛkɛl nyɛ kɔ mɔɔ tɛɛg bɛ nadi ekekɛl edee e ebhata ɛ, etɛɛ náá, bɛ nabɛ ɛ́ ààbela di tɔ ndjaa bɛdjoŋ.

19 Yɛ kabɛ Maali ɔɔ, nyɛ nazobaal etɛp binek djas ɛ́ tɔ bum lyem’ɛ. Tin, nyɛ moo esiiza ɛbuɛpe.

34 Simɛyɔŋ ɛ́ boozɛsɛɛ bɛ mɛtel, nyɛ nɛ Maali nyɛɛg náá: «Zɛɛb dhis mɔn’ak ɛ, étɛp ɛkwyesal bot ɛbuɛpe nɛ ɛwyɛl bot ɛbuɛpe pɛ kɔ Yisalaɛl. Nyɛ aadi ɛ́, ndem ngɔt ɛ Zɛɛb. Bot ɛbuɛpe ɛ́ waasyaala bhyeed kɔ lo’ɛ. 35 Tin, nyɛ waalyaal popoopwon egeka ee di syela tɔ ebhum elyem e bot ɛbuɛpe ɛ. Yɛ kabɛ wɔy Maali ɔɔ, mezuk ɛ́ waatuu wɔ lyem kɛtuula pɛ yii kyee dáa pɛl.»

48 Dáa sɛɛg nɛ nyɛɛg nabee nyɛ ɛ, wɔ gwaa bɛ zɛdjoka ɛbuɛpe. Nyɛɛg ɛ́ boozɛke nɛ nɛ náá: «Mɔn’am, étɛp yé wɔ sa bis deenek? Bhum elyem e bis nɛ soog di ɛ́ pɛ ɛko. Bis eesaa wɔ, saa saa.» 49 Nyɛ ɛ́ boozɛbɔɔza nɛ nɔɔ náá: «Bi saa mɛ étɛp yé? Bi ààgu náá, mɛ ɛ́ tɔ ndjaa Saagam, étɛp ɛsa mɛsa mɛ?» 50 Kabela náá, bɛ nabɛ ɛ́ ààmɛt ɛsuk ɛ sa nyɛ nadi elii ɛ.

51 Bhii tak, bɛ eezɛsik nɛ nɛ pɛ Nazalɛt. Nyɛ nadi elooba nɛ nyɛɛg nɛ sɛɛg. Tin, nyɛɛg zokabaal etɛp binek djas tɔ lyem’ɛ.

3 Dáa mɛnyok nabɛ náá, ye naawyii ɛ, nyɛɛg ɛ Yezu ɛ́ booke nɛ Yezu náá: «Bɛ tokapɛ nɛ mɛnyok.» 4 Tin, Yezu ɛ́ boozɛbɔɔza nɛ nyɛɛg náá: «Wɔy moma, yenabɛl mɛsɔ ɛ́ yé é tɛp’ak? Ɛwala ɛ lam dinaa ààpakum.» 5 Deenek nyɛɛg eezɛke nɛ bot ɛ mɛsa náá: «Saka sa djas nyɛ aalɛɛ bin náá, bi sa ɛ.»

25 Nyɛɛg ɛ Yezu nabɛ ɛ́ tin tetel, é ngwoob mɛlaaba, bɛ nɛ mɔn-nyɛɛg, zɛnɔɔ Maali mwaa Keleopas, dɔɔ nɛ Maali, moma dɛl ɛ Makdala. 26 Yezu eezɛbee nyɛɛg, tin, djekel nyɛ nadyeebakwyɛl ɔ é ngwoob’ɛ. Nyɛ ɛ́ boozɛke nɛ nyɛɛg náá: «Nyaagam, beea mɔn’ɔ.» 27 Bhii tak, nyɛ eezɛke nɛ djekel tak náá: «Beea nyoog é». Tin, kana ɛwala ɛlenek, djekel yenɔk eezɛnɔɔ nyɛ, tɔ́, kɛdi é di wat bɛ nɛ nɛ tɔ ndjaŋ’ɛ.

Tɛtɛ bot ɛ mɛbyel ɛ Yezu

31 Nyɛɛg ɛ Yezu nɛ bɔn-nyɛɛg eezɛkum, bɛ eezɛtyaa pɛ kel, ààni tɔ ndjaa. Bhii tak, bɛ eezɛlwom mot, nyɛ kɛdjóo Yezu. 32 Etɛɛ náá, zukamwaa nɛ mot nadi ɛ́ mendiindil nyɛy kuku ɛbwak. Wɔ gwaa, bɛ zɛlɛɛ nɛ nɛ náá: «Nyoog nɛ bɛdhyeeb bɔ, zɛnɔɔ bɛkɛl bɔ ɛ́ pɛ kel. Bɛ ɛpesaa wɔ.» 33 Tin, Yezu eezɛbɔɔza nɛ nɔɔ náá: «Nyaagam ɛ́ zɛ? Da bɔn-nyaagam ɛ́ kadi bɛzɛ?» 34 Wɔ gwaa, nyɛ bulal mis, gwyák ɛdhuu ɛ bot binɔk djas. Nyɛ ɛ́ booke náá: «Beeka nyaagam nɛ bɔn-nyaagam di wak é. 35 Etɛɛ náá, mot di esa ɛkwosak ɛ Zɛɛb ɔ, nyɛ ɛ́ di mɔn-nyaagam, kɛl’am nɛ nyaagam.»

55 Mɔn’ak tok wak mɔn salpande? Ye tok Maali di wak nyɛɛg é? Zak bɛ nɛ Zozɛf, nɛ Simɔŋ, zɛnɔɔ Zuud tok bɛdhyeeb é? 56 Haaa ye tok bɛkɛl mena nɛ bɛnɔɔ di mɛlu djas é di wat’aak é? Haaa nyɛ kɛbela yenek mɛbwala paa?»

14 Bɔɔ djas, bɛ nabɛ ɛ́ nɛ mɛfulu mɛ ɛsesɛɛga é zɛɛga mendjaala bɛ nɛ boa, nɛ Maali nyɛɛg ɛ Yezu, zɛnɔɔ bɔn-nyɛɛg ɛ Yezu esok nɛ esok.