Maria

Lilagano lyo belekwa kwa Yesu

26 Pawikite mwei wa sita, malaika Gabulieli aatumilwe na Nnu’ngu' ayende kukilambo sakikemelwa Nasaleti, akwo ku Galilaya, 27 kwa mwi’nja yumo ywangalikuntanga nnalu’me ywakemelwage Malia, aakobekilwe na Yusupu bu’ka mulukolo lwa Daudi. 28 Malaika ngannyendelya na kummakia, "Abali wenga wauyaliwite na Nnu’ngu', Nnu’ngu' abile pamope na wenga."

30 Malaika ngammakia, "Malia, kaneuyogope, nnyino Nnu’ngu' akupendile. 31 Ulu’a yi’ma ndumbo, waalu’a papa mwana nnalu’me, na lina lyake wantine Yesu. 32 Ywembe aalu’a panga mpi’ndo na aakemelwa Mwana wa Nnu’ngu' nku’lu'. Nnu’ngu' alu’a kumpeya kiti’gu' sa lenji bu’ka mulukolo lwa nkulungwa Daudi. 33 Kwa nyo, alu’a tawala lukolo lwa Yakobi milele na ukulungwa wake wayomokali."

Belekwa kwa Yesu

18 Belekwa kwake Yesu Kilisitu kwaabile nnyanya. Malia mau' bake pabaayi’ki’tyaniye kobekana na Yusupu, lakini babile balo egelyana, Malia aabonekine abile na ndumbo kwa makakala ga Loo Mpeleteu.

Mwambo wa Malia kannumba Nnu’ngu'

46 Malia ngabaya,

"Mwoyo wangu' unnumba Nnu’ngu',

47 Na loo yangu' impulaikya Nnu’ngu', ywanikombwile.

48 Kwa mwanjaa anninguli kwa liyo lya kiya, ntumisi wake ywa nnyu’wa.

Kwa nyo, bu’ka nambi’yambi' bandu boti balu’a nikema na ywayaliwite.

49 Kwa mwanjaa Nnu’ngu' mwene makakala anipangi maku’lu',

lina lyake lipeleteu.

50 Kwabi’kya kiya balu' bandu babamwisimu,

lama bu’ka lubelekwo mpaka lubelekwo.

51 Apangite makowe maku’lu' kwa luboko lwake,

Aasengemwaniye bene mpyata mumyoyo yabe.

52 Aulwiye bene makakala bu’ka muiti’gu' yabe ya lenji,

na kwakatuya aki’ba.

53 Ayukutiye manogau bene njala,

na kwabu’ya moko gabule bene mali.

54 Annyangatiye ntumisi wake Isilaili,

aku’mbu’ki kiya sake.

55 Kati mwaalagi api’ndo bitu,

Bulaimu na lubelekwo lwake mpaka milele."

4 Yusupu nembe aayabwi mwanja bu’ka kukilambo sa Nasaleti kuwilaya ya Galilaya li’nga akabalangilwe. Mwanjaa ywembe aabile mulukolo lwa Daudi, aayi’i kukilambo sa Betelehemu, kunkoa wa Yudea kwaabelekuli nkulungwa Daudi. 5 Aayi’i balangilwa pamope na Malia nnwawa ywankobekage, naywembe pamasu’ba go aai ntopelwe. 6 Pabaabile kwo, ngaliika lisu’ba lyake lyo komboka. 7 Ngakomboka mwana nnalu’me mmele wake, anng’walike tugu’bo twa kyana na kunng’onjeka mukili’lyo sa ng’ombe mwanjaa baapatikeli pogonjo, nyumba ya ageni yai yatwi’la.

19 Lakini Malia aagabi’i mumwoyo wake goti no gania.

34 Simioni aatikwayalya, ammakiye Malia mau' bake, "Mwana yu' alu’a panga kitumbu so oba no kosopolelwa kwa bandu baingi mu Isilaili. Nembe alu’a panga kati mwasu wo kanilwa na bandu, 35 li’nga gabagania bandu baingi kwo iya gaumukulwe. Na wenga wamwene, lwu’ngu' lwalubile kati lipanga linola lwalu’a kuoma pamwoyo wako."

48 Abelei bake pabaamweni, baatisangala. Malia mau' bake ngabannaluya, "Wamwana wangu', mwanjaa namani utupangite nyo? Tati' bako na nenga twendekupala, malango gaatuobike." 49 Ywembe ngayangwa, "Mwanjaa namani munipalage? Mwatangikeli panga, nipalilwa tama munyumba ya Tati' bangu'?" 50 Lakini abelei bake baatangiteli makowe go galombolya namani.

51 Bai, baabuyangine nakwe mpaka ku Nasaleti, na apeyage isima yabe yoti. Mau' bake baagabi’kite makowe ago goti pamwoyo wabe.

3 Divai payaayomwike, mau' bake ngabammakia Yesu, "Divai iyomwike." 4 Yesu ngaabakia mau' bake, "Mau', lyanipalikwa panga nilitangite, ila saa yo panga lyengo lyangu' inaikali." 5 Mau' bake Yesu ngaabakia balu' apangakasi ba lisengele, "Lyolyoti lyaalu’a kummakia, mwapange."

25 Papipi na nsalaba wake Yesu baayi’mi mau' bake, nku’we mau' bake, Malia nnyumbowe Kleopa na Malia Makatalena. 26 Yesu paabweni mau' bake, na papipi yake ayi’mi yu’lu' mwanamasi' ywaampendile, ngaabakia mau' bake, "Mau'! Mulole, aywo nga mwana winu." 27 Bu’kapo ngammakia yu’lu' mwanamasi', "Ulole aywo nga mau' bako." Na tangu' saa yi’lu' aywo mwanamasi' antweti mau' bake Yesu atame kasake.

Mau' na anunabe Yesu

31 Mau' bake Yesu na anunabe baaikite palu', ngabayi’ma panja na kuntuma mundu yenda kunkema. 32 Bandu bambone baatami po kabanti’li’ta. Bai, ngabammakia, "Lola, mau' bako na anunabo bai panja, bapala kukubona." 33 Yesu ngaayangwa, "Mau' bangu' na anunangu' nga kinyai?" 34 Apo ngaalola bandu babanti’li’tike kabaya, "Lolange, mwenga nga mwakinamau' bangu' na mwakinannunangu'! 35 Mundu ywoywoti ywapanga gapala Nnu’ngu', aywo nga nku’lwangu', nnu’mbwangu' na mau' bangu'."

55 Buli, ayu' mwana wa yu’lu' selemala li? Mau' bake akemelwali Malia, na akinaalongobe ki Yakobi, Yusupu, Simoni na Yuda? 56 Na alu’mbu’be boti babileli pano pamope na twe? Buli, apatike kwaku' aga goti?"

14 Aba boti baai kabakongolekana kwo lu’ba Nnu’ngu' pamope na alwawa nsi’si', Malia mau' bake Yesu, na anunabe.