Maria

Ɓəwyegye ntu Yeisu mama ɓó

26 Dna ń əpya tnanyii she Alizebətu ɓə la nubwo, Shekwoyi wa tnu maləka Gəbiri wa lo Nazereti əzhi ń Gəlili, 27 lo da ɓyinyikwoyi kwului ń a ɓəə la wo dù nabai wa so ənu n a ɓə zhni ai yi wo ge Yusufu nyi, Dawuda yawyi. Əɓyinyikwoi kwului əye ɓə nyi Mariyamwu nu. 28 Maləka wa lo əwo aba wa gna wo, "Mi ɓyi ho əgna lo, əho ń ho la bmyashi yaakwo ɓwa nyi! Dagayi n kwnusnu lo n hoi."

30 Ama maləka wa gna wo, "To wodna m, Mariyamwu, ho la bmyashi ɓwa n Shekwoyi aba. 31 Ho ɓa la nubwo jesnu ho ɓə ma əɓyinugbai, ho ɓə yi əwo ge, Yeisu. 32 Wo ɓə la zhni əza yaakwo jesnu ai yi wo ge Əza Duduyi Nugwnu. Dagayi Shekwoyi ɓə ga wo əbeshnikpegye əwo dada nya; Dawuda. 33 Wo ɓə gyi əbe tu ń Yakwuɓwu pwuwa nyalonyalo; əwo əbegyi to ɓə shna zo m."

Yeisu Masifu mama

18 Yeisu Kirisiti mama əɓo ɓə wu nlanyi nu: Yusufu ɓəə la Mariyamwu, Yeisu əya, dù, ama to ɓai yeɓədo m, a gye wo gnyi ń nubwoi Zafnu Gyigyiyi nya.

Mariyamwu anyí

46 Mariyamwu wa gna,

"Əmi wyewyeyi kwo lá Dagayi tu lo,

47 jesnu əmi zafnu kwo dagbma lo dna n Shekwoyi əmi Gnyiyi.

48 Ntuge wo pá əwo tnutnuyi tukwogbayi ɓo lo.

Ənya n kwo laka nsaiye kwoi lo n abyei, cala vnyanya ɓə yi mi nge anabəlikada,

49 ntuge Shekwoyi Duduyi Ikwoda wo kwu aɓo ayaakwo zhni ga mi,

əwo əye zhni gyigyiyi nu.

50 Əwo snusnugye lo aza yi aba ń ɓa wó əwo ədna nyi,

kwoi laka ń cala gbmanyi kwoi lo cala ədo.

51 Wo kwu ikwo aɓo zhni n əwo ɓwagbmai;

wo la aza gnamyi n ɓa ń tukwomwai fyi n əɓa bwugba aɓənubwozhni.

52 Wo la abegyiyi kazhi n əɓa abeshnikpegye, wonyi ce wo la atukwogbayi kwu kpe.

53 Wo kwu anya amanaii ga amyikwnuyi,

ama wo la anyaɓwayi nyaya n aɓwa gbəloii.

54 Wo kwu Israila əwo tnutnuyi bmazhni;

woi pá woi wu snusnugye

55 ga Ibrahim ɓədo n əwo ayawyii nyalonyalo,

n ɓwasnu shi wo ɓə ga əyi azakwoyi ɓəgbeshi nyi."

4 Ntulonu Yusufu cè, wa fa Nazereti dna n Gəlili, wa gwnulo Baitalamyi ń Yahudiya əknyi ń Dawuda əzhi, ntuge wo ɓə gbmi ń əbyé yi nu. 5 Wo ɓə lo əzhi yi aa ka əwo əye nu ɓədo n Mariyamwui ń a ɓə la wo dù, wa pamwula n woi nyi, jesnu əwo əɓyima sa ɓə la gá kwa si. 6 Əsa ń ɓa ɓə fyi ncei n ɓo, əsa kwa si ń wo ɓa ma əɓyi. 7 Wa ma əwo əɓyi kpmisnui, əɓyinugbai. Waa wo kpmidna n aje, wa wo ya dna ń anyakpa nyagyibwe, ntuge azhiɓeyi əgbe to ɓə ye nyi ntu n əɓa ɓo m.

19 Ama Mariyamwu wa kwu aɓo ye vnyanya wnakna jesnu woi zhni ɓa nubwo fyi ń əwo ədu.

34 Nlonu Simyiyon wa tu ɓa anabəlika wa gna Mariyamwu əwo əya: "Əɓyi ye ń wonyi, əwo ɓətukwo ge, wa zhni aza bəgyé ɓa myiya nu; azaho ɓa kwukazhi ń Israila, jesnu wo ɓaa zhni əznù nu, ń a ɓa daɓo tu n əkwo tukwo, 35 nabai ń a ɓa kpmi adu bəgyé ɓənubwozhni ya wu. Jesnu əbeyaakwo ɓa fnyi əhohni wyewyeyi ce."

48 She əwo azamayi ɓə gye wo əwye, ca wo ɓa. Əwo əya wa gna wo, "Nugwnu, knyiyi nu na zhni honyi zhni əɓo kpe yi n wu nlai a? Əho dada n mii, yi kwu laɓa yii zna ho shni n aɓəsai."

49 Wa nyaɓo, "Knyiyi nu ɓə zhni fyei zna mi shni a? Fye ta kpəlo ge kwo ɓə zhni ɓəshishi nu maa dna n əmi Dada pwuwa m?" 50 Ama ɓa to ɓə ɓwa awyega əɓo n wo ɓə gnyi woi gna ɓa nyi m.

51 Nlonu wa shnilo Nazereti n kwnusnu n ɓai jesnu wa vyi əɓa ɓəda. Ama əwo əya wa kwu aɓo ye vnyanya sofyi n əwo ədu.

3 She anamnuwna ɓə kwu zo, Yeisu əya wa gna wo, "Anamnuwna kwu ɓa zo."

4 Yeisu wa dnaɓəgbe, "Nyikwoza, knyiyi nu zhni hoi la mi dna n ɓəye a? Əmi əsa to si kpa m."

5 Əwo əya wa gna atnutnuyi, "Fye zhni ɓəhoɓəhoi n wa gna fye."

25 Yeisu əya, n əwo əya zadoi, Mariyamwu Kleyopas nyikwo n Mariyamwu Magadalayii, ɓa ɓə zhi n wo vyivyiwyi n Yeisu znudu abai. 26 She Yeisu ɓə gye əwo əya gnyi n ɓo, jesnu n mwutuyii n wo ɓə zhni woi ye wo nyi, n gnyi vyivyiwyi n ɓo, wa gna wo, "Nyikwoza, əho nugwnu nu gnyi nyi," 27 jesnu wa gna mwutuyi yi, "Əho əya nu gnyi nyi." Ənya n kwo ɓə laka nsayii, mwutuyi yi wa lo n Yeisu əyai n əwo pwuwa.

31 Nlonu Yeisu əya n əwo azajei ɓa si abaayi. Ɓa kwu zhi n əbmyi, ɓa tnu əzaho nge wo lo əmi wo yi wo ɓe ncei. 32 Deeji ɓə sase zhi n shegwnu wo, ɓa gna wo, "Əho əya n əho azajei, ɓa zhi lo n əbmyi, ɓa ye lo ɓa gye ho əwye."

33 Wa nya, "Anyikado nu zhni əmi əya n əmi azaje a?"

34 Nlonu wa shi aza awye n ɓa ɓə sase zhi n shegwnu wo nyi, wa gna, "Əmi əya n əmi azajei nu zhi nyi! 35 Əzahozahoyi n wo zhni Shekwoyi ɓəye, əwo nu zhni əmizado, əmi mapwii n əyai."

55 Əza ye nu to zhni kafyinta nugwnu m? A ta yi əwo əya nu ge Mariyamwu m, jesnu əwo azaje nu to n Jemyisii, Yusufu, Sima n Yahudai m? 56 Əwo amapwi vnyanya to kwnusnu lo əyi m? Nsaiye, n nanu n əza ye wo ɓwa aɓo ye vnyanya a?"

14 Əɓa vnyanya ɓai yezhi ciici fyi n abagbmanyi n aduwazhni, n kwnusnu n anyikwozai n Mariyamwui Yeisu əya, ɓədo n əwo amajei.