Milagres de Jesus
Os Evangelhos registram dezenas de milagres realizados por Jesus — curas, ressurreições, domínio sobre a natureza e libertações. Cada milagre revelava sua divindade e compaixão.
Curas de cegos e surdos
Jesus devolveu a visão aos cegos e a audição aos surdos, manifestando seu poder sobre toda enfermidade e deficiência.
Oyesu Gwo Ofiyi Epa Iyi.
Ishini Oyesu shebeni bita yaga ni, ango epa niwo ofiyi ni gboso ba shogwu yo mo, <<Oyi ko Odawuda! Miyinyinyi kaha.>>
Ishini ogipwole ni, ango epa ni wofiyi webe ko Oyesu, kweyi oduwoka, <<Ala gbotuse mo nyya gege ya yala mebe?>> Akyogwu kamo, <<Ayotuse mani adole.>>
Ebeni onyuwa abo iyi kweyi kamo, <Byoni ala yo otuse ni, nyya diyi kala ogege!>> kweyi iyi wa gwa. Oyesu pyuwa akpaha ko tata kweyi kamo, <<Ala kaya ashishe na gye kamo ami diyi kala ogege lo.>> Abose gese ke ga ko oshu oni ebe kpiri okpagye ni.
Opwiyi epa Oyesu yuwa me ebe
Ni Oyesu kpa awogboso ba sho Ojeriko bita ni, ase nwashika gbosuwa itikpi. Opwiyi epa bagye ashikwu ko owe. Ishini apwo mo Oyesu yawa ni, ango oko iso kamo, <<Adole, Oyi ko Odawuda! Miyinyinyi ka aha!>>
Ebeni ewa ka asuse ni gboso Oyesu ni gbuwa apwo mo ana sha. Akwotu ko ngo oko iso mo, <<Adole, Oyi ko Odawuda! Miyinyinyi ka aha!>>
Oyesu hagye kweyi yuwo ogwu kamo, <<Oji ni ala ba yimu na ya dala?>>
Aka danu mo, <<Adole, aba yimu ko me ebe.>>
Iyinyinyi kwo Oyesu kweyi ogawabo iyi. Ebebeni amebe! Kweyi agboso.
Ado Opwiyi Ogege Obetseda
Awo Obetseda, ebeni abyo ofiyi oye wa danu kweyi abo mo ona ganu abo. Obyo ofiyi abo kweyi byo bose sho ogya. Otehe shi iyi kweyi ya abo so. Oyesu do oka mo, <<Omo oje?>>
Otiyi mi iso kweyi kamo, <<Nma asuse bye efu ba yawu.>>
Oki ga anu abo iyi. Ebeni iyi nu gwa, ebe moma nu kwikye, kweyi ome ebe neneshi. Oyesu ka danu mo, <<Go ole, ka kwikye gipu ogya lo.>>
Oyesu da Ase ni Kyi Igbenu ni Ogege
Ebeni Oyesu sha agye ko Otaya bita kweyi bwo ogya ko Osido gi ishu ko Ogalili kweyi ga agbabo ko Odikapoli. Ebeni abyo ongo oye ni wo odoho oki ya shigwu ni wa do Oyesu abo mo na sa aboneshi eyi.
Obyo go okoka sho otutehe ke ewa kweyi ya abo nu la akpaha kweyi otehe kweyi oga anu abo igbenu. Oyesu ngiyi iso kweyi ogbo layi faa, kweyi ka danu mo, <<Ifata!>> Ikweyi nu wo, <<Gwa!>> Bwebe ni akpaha ko ongo ni gwa, Igbenu nu ra kweyi okwotu ko kela neneshi.
Oyesu pyuwa akpaha mo ana ka ka da ashishe lo. Oya wuwobi ko ka, awa ke ba go ohobu ko ka. Ase nwonwu kpi igbashi. Kweyi akamo, <<Oyo ojoji kpiri neshi, ko odoho oyo pwaha, awo kyigbenu oyuwa kela.>>
Opwiyi ko Obatimawu Pyo Ogege
Ebeni ago ogya ko Ojeriko. Byoni Oyesu kpa awogboso kpe ewa ka asuse ba sho ogya nyakwu oni bita ni, ofiyi oye ni aba yo mo Obartimawus (oyi ko Otimawus) ni yagye okunu kowe ya boza. Ishini opwo mo Oyesu ko Onazaret ya shigbo ni, okwotu ko ngmegba mo, <<Oyesu, Oyi ko Odawuda, miyinyinyi hin!>>
Awase ni be ebeni gba apwo kweyi kamo ona sha, anu ke ya zoko iso nwa ya kamo, <<Oyi ko Odawuda, miyi nyinyi hin!>>
Oyesu hagye kweyi kamo, <<Ala yo ogwu.>>
Ebeni ayo ofiyi oni ogwu mo, <<Shotunehe! Nyiso sho hagye! Oya yo ogwu.>> Oyo oshiye nu shonu kweyi shibi we ebe ko Oyesu.
Oyesu do oka mo, <<Oji ni oya yimu shini na ya da awo?>>
Opwiyi mani kamo, <<Inofoza, nyya yimu ko ki me ebe.>>
Oyesu ka danu mo, <<Ga, otuse wo da awo ogege.>> Ebebeni iyi nu gwa kweyi ogboso Oyesu.
Opwiyi ni ya boza ni Oyesu yo mebe
Ni Oyesu yo pee kpo Ojeriko ni, ofiyi oye yagye okoka ko owe ya boza. Ishini opwoko kewa ba shigbo ni, odoka mo oji ya gbodagye. Aka danu mo, <<Oyesu ko Onazareti pini ya shigbo la.>>
Oka mo, <<Oyesu, Oyi ko Odawuda, miyinyinyi hin!>>
Awase ni bohobu ni gbapwo kweyi kamo ona sha, anu ke ya zoko iso mo, <<Oyi ko Odawuda miyinyinyi hin!>>
Oyesu hagye kweyi ka dawa mo ana byo ongo oni wa danu. Ishini abyo wobutu nu ni, Oyesu do oka mo, <<Oji ni oya yimu shini na ya dawo?>>
Okyogwu mo, <<Adole, nyya yimu ko mebe.>>
Oyesu ka danu mo, <<Gwiyi shini omebe, otuse wo dawo ogege.>> Ebebeni omebe kweyi gboso Oyesu, ya sho Owuso iye. Ishini kpiri kase ni bebeni ma mani ni, awa ki sho Owuso iye.
Oyesu do Ongo oye ni Amo wo Ofiyi ni Ogege
Ni Oyesu ya shigbo ni, omongo oye ni amo wofiyi ni. Awogboso doka mo, <<Inofoza, anoho yo ozalabi, ongo mani la kwe inanu kpa adanu, ni amo wo ofiyi ni?>>
Oyesu kamo, <<Ongo mani kwe inanu kpa ada nu pini yozalabi lalo, omani ke gbodagye shini ase na moza ni Owuso ya gege koya bwebe ko ongo mani. Owotiri shini na yoko kase ni tumoleho ni. Anani ni otu bi walo ni. Otu yawa biba ni ashishe ya yoko lo ni. Byoni ntayayo yese ni, nwo oyoyu kese.>>
Ni Oyesu ka mani, otehe shokpagye, oyikwabo kweyi oyi nyo ongo mani iyi. Oka danu mo, <<Ga yi na ibwu ko Osiluwa,>> ikweyi nu wo Oleho. Ebeni ongo ni ga niyi, kweyi okwikye go ole ya mebe.
Curas de paralíticos e enfermos
Paralíticos caminharam, leprosos ficaram limpos e todo tipo de doença foi curada pelo toque e pela palavra de Jesus.
Ongo oye ni gbose kiyiwa ni wa kwagye obutu nu, kweyi kamo, <<Adole, owoni okyogwu, oyun na pyogege.>>
Oyesu nabo ta kweyi ganabo kamo, <<Nyya yimu, ikpiye wo na pyogege.>> Ebebeni opyogege kikpiye nu. Ebeni Oyesu ka danu mo, <<Kaka dashishe oza mani lo. Gebe kosapa shini na mogege wo; kweyi ozeshi do Owuso byoni ono ko Omusa kani, nawo oza ni ya shiyase kamo ogbogege.>>
Awashe byo ongo oye ni gbose kikpiye winyi ni webe nu, gwutagye ikweyi kote. Ishini Oyesu mo otuse wa ni, oka dine kikpiye winyi mo, <<Ka gbotu lo, oyi hin; ayozalabi wo yina.>>
Ikweyi kela ni Oyesu kani, ashini ka awofono ka diyiwa mo, <<Ongo mani yoza bibi oya ziyinu byo Owuso!>> Oyesu gyoza ni yotu wa ni kweyi okamo, <<Ojiya ni ala ba yela kozabibi ipu kala mani? Onya shashi she, ko kamo, <Ayozalabi wo yina kwe ko kamo, nyiso sho yawu>? Nyya yoza ni ala yagye mo Oyi ka Asuse gboshu ese mani ko yozalabi kase yina.>> Ebeni oka dine kikpiye winyi mo, <<Nyiso, zote wo shino ogole.>>
Kweyi ongo ni nyiso ganu gole.
Ebeni, omo ongo oye ni abo nu winyi ni. Kweyi ashishini ko Awofarisi ba labo ko owe ko kwo Oyesu epwo kweyi adoka mo, <<Owo ono la, ko da ase ogege ki ikpiye eno ko minyo ko Ase ko Oyahuda?>> Oyesu kyogwu mo, <<Owoni ashe kala gbo otukpo oye kweyi gbo gogo eno ko minyo, oya nabo yayi ngma lo? Asuse shoshi sho otukpo lo! Ni olemani owo ono la koyo neshi eno ko minyo.>> Ebeni okado ongo oni mo, <<Na abo ta.>> kweyi ona abo ta, opyo gege ka abo nu byoni abo nu ko me epa weni.
Oshu ye ene ko onya ko Osimo kwu, ogwutagye ikweyi ko ogwudu, Oyesu wa ebebeni aka danu. Ebeni oga ta anu, obya abo kweyi zo iso. Ebebeni oshu kweyi, kweyi oyo ozarore da awa.
Oyesu do Ongo ni Gbo Ose ki Iyiwa ni Ogege
Ongo oye gbo ose ki iyiwa wa kwagye obutu ko Oyesu ya bo mo, <<Owoni okyogwu, ogbo oshu ko da ami ogege.>>
Oyesu mo ongo ni kpi iyinyinyi kweyi oga anu abo kweyi kamo, <<Ngbi imu, pyo ogege!>> Ebebeni iyiwa nu kweyi, kweyi ongo ni pyo ogege.
Ebeni ango ene bya ashe ni winyi ni we ebe nu ikweyi ko ote. Ni ama mo aba gege ko ge ebe ko Oyesu lo koni ewa shoshu ni, agwi iso ki inu kweyi yo sa wo okpagye ikweyi ko ote nu obutu ko Oyesu. Ishini Oyesu mo otuse wa ni oka di ino winyi mo, <<Oyi hin, ayo ozalabi wo na.>>
Ashishini ka awofono ke ba kela ipu ko otu wa mo, <<Ojiya ni, ongo mani ya ka mani? Oya kela ka arigbetu! Anoho ya gege ya no ozalabi? Ke so Owuso.>>
Ebebeni Omaku ko Oyesu ka danu oza ni yo otu wa ni, kweyi oduwoka mo, <<Ojiya ni ala ba kela mani ipu ko otu kala? Onya le kwee: ko ka di ino winyi mo, <Ayo ozalabi wo na,> Kwe ko ka mo, <Nyiso, zote wo shini oyawu>? Ami ke ya yimu shini ala gye mo Oyi ka Asuse gbo oshu ko no ozalabi ese mani.>> Ebeni oka di ino winyi mo, <<Nka da awo, nyiso zo ote wo shini ogo ole.>> Ebebeni onyiso zo ote nu kweyi yawu bwo otutehe wa ge ese. Oshi ya ananoho kwu kweyi aba sho Owuso iye ba ka mo, <<Aha moza lemani ebibye wa lo!>>
Oyesu Di Ine ka Abo Winyi Ogege
Ishi oye Oyesu ki gipu ke ekpa, kweyi omo ongo oye ni abo nu winyi ni ebeni. Ashishini kase ba tikpo ko owe ko kwo Oyesu epwo, akpi iyi kwo ko ma kwe oya danu ogege Eno ko Minyo. Oyesu ka danu mo, <<Nyiso hagye otutehe wa.>>
Ebeni Oyesu duwoka mo, <<Onya shoshi she ko ya Eno ko Minyo? Oneshi la kwe obibi, ko ngma ase kwe ko ya ase ngmo?>> Ake kela lo.
Oyesu pyi iyi muwa kpa anya kpo otu byobya nwashika ikweyi ko otu loshu wa, ebeni oka do ongo ni mo, <<Na abo wo ta.>> Ona abo nu ta kweyi opyo ogege ka abo nu.
Oyesu do Ongo ni gbo ose kiyiwa Ogege
No Oyesu tayayo yipu ko ogya oye ni, ongo oye ni gbose kiyiwa ni webenu. Ishini omo Oyesu ni, ogbo okpagye ya bo mo, <<Adole, owoni okyogwu odamogege.>>
Oyesu ya abo so ongo mani, okamo, <<Otu hin ze, ose wo na kweyi!>> Ebebeni ose kiyiwa nu kweyi.
Ango oye byine kose kikpiye winyi ni gwutagye ote ni webe ko Oyesu. Kweyi apyowe ko gipu kole lo, koni ase nwashika ni, kweyi atoshi giso kinu kweyi ayo sa tagye ote otutehe kewa obutu ko Oyesu.
Ishino Oyesu mo otuse wa ni, okamo, <<Oya hin, ayo ozalabi wo na.>>
Kweyi Awofarisi kpa awofono kwotu ko lo okwunu agye ba kamo, <<Anu mani wa anoho ya kela karigbetu? Anoho ke ya gege ya no ozalabi, so Owuso fufunu lalo?>>
Oyesu gyoza ni yipu kotu wa ni kweyi oduwoka mo, <<Ojiya ni ala ba ra mani ipu kotu kala? Onya le kwe: ko kamo, <Ayo ozalabi wo na;> Kwe ko kamo, <Nyiso shini oyawu>? Shini ala kegye mo Oyi ka Asuse gboshu ese mani ko no ozalabi,>> Okado inogbose kowinyi mo, <<Nka do mo, nyiso, zote wo shini ogole.>> Ebebeni onyiso obutu wa, ozo ote ni ogwutagye ikweyi nu ni kweyi gole yasho Owuso iye.
Ongo ni abo nu winyi ni
Eno ko Minyo oye ogipu ke ekpa Ase ko Oyahuda kweyi ya foza, ongo oye ni abo nu ka abore winyi ye ebeni. Ashishini ka Awofarisi kpa awofono ba tikpo ko oza ni aba ya abo abyo shini ana kwo Oyesu epwo ni, akpiyi shagye kwe Oyesu ya da ashe ogege Eno ko Minyo. Oyesu ke gyo oza ni yipu ko otu wa ni, oka do ongo ni gbose ka abo winyi mani mo, <<Nyiso shini ohagye obutu ka ananoho.>> Ebeni onyiso hagye.
Ebeni Oyesu duwoka mo, <<Onya shoshi ko ya Eno ko Minyo, oneshi kwe obibi, ko da ase olayi la kwe ko ya ase ngmo?>>
Ishino otiyi muwa kpiri ni, kweyi oka do ongo mani kamo, <<Nata ka abo wo.>> Oya mani byoni oka da nu ni, kweyi opyo oshu ka abo nu.
Otuse ko oteyi ka adakare ko Oroma
Ishini Oyesu kawela mani kweyi ni, ogo okpagye ko Okapanahu. Ebeni oyole ko oteyi ka adakare na adole nu ya yimu nu ko otata ni loshu lo, oyo okwunu ki ikwu. Oteyi ka adakare pwoshu ko Oyesu kweyi ota awanyakwase ka Ase ko Oyahuda oleho ebe nu, aga bo Oyesu shini nawa ngmo oshe nu. Ishini awebe ko Oyesu ni, abo Oyesu ko otata kamo, <<Ongo mani ya yimu shini ongmo oyole nu, ikweyi koni oya yimu ko okpagye ka aha oki me ekpa daha.>> Ebeni Oyesu gbosuwa ga.
Ishini oyo pee kpo ole ni oteyi ka adakare mani ta awoya nu oleho ebe nu kamo, <<Adole, ka di iyo owe lo, koni nggye mo nnye koni oya winu kole hin ni. Oza ni ya ni nmiyun mo nggye ko webe wo lo ni oma. Owoni okela kin, oyole hin ya pyo ogege. Koni ami abiyun nyya abo kashe la, kpa adakare bo otu hin. Owoni nka da ashe wa mo, <Ga!> Oya ga; <Kwikye,> oya kwikye. Owoni nka do oyole hin mo, <Yoza mani,> oya ya.>>
Ishini Oyesu pwela mani ni, igbashi yo kwu, opyi me ewa ka asuse ni ba gboso ni, okamo, <<Nyya kadala ipu ki Izrayila nma ashishe ni gbo otuse loshu byo ongo mani lo.>> Ebeni ango ni otuwo oleho ni kwikye go ole ga to oyole nu pyo ogege nu.
kweyi onya oye ni omaku bibi yo winyi ki ishayi igwahata, oyo tokoka kweyi ya gege ko nata lo. Ishini Oyesu mo ni, oyogwu mo, <<Onya, ada wo ogege.>> Ebeni oya abo nu si ikweyi, ebebeni opyo ogege kweyi osho Owuso iye.
Oyesu do ongo oye ogege eno ko minyo
Eno ko Minyo oye, Oyesu go ole ko oteyi ka Awofarisi ko ga roza, kweyi ase kpi iyi kwo. Ebeni obutu nu ongo oye gbo ose ki ikpo kpa abo myomyi. Oyesu da Awofarisi kpa awofono oka mo, <<Ono kamo an da ase ogege Eno ko Minyo kwe an ka da awa lo?>> Awa ke ko ojije lo. Ebeni obyo ongo ni kweyi oda nu ogege kweyi omo ona ga nu.
Oyesu da Awine ki Iyiwa Igwo Ogege
Eno oye Oyesu ya go Ojerusele, obwe eji ko Osamariya kpo Ogalili. Ni oya gipu ko ogya leke ni, ango igwo ni gbo ose ki iyiwa ni ga tanu ebe lenu kweyi ashogwu yo kpo oko nyakwu mo, <<Adole, Oyesu, miyinyinyi ka aha!>>
Ishini oziyi iso muwa ni, okamo, <<Ala ga shini awosapa na ma ala.>> Kweyi ishini aba ga ni apyo ogege wa.
Ashe oye ipu wa, ishini oma mo anu pyo ogege ni, okwikye wa sho Owuso iye kpo oko nyakwu. Okwagye obutu ko Oyesu kweyi yi iyi lagye kweyi shotunehe da anu. Ongo oni wa ase ko Osamariya la.
Oyesu do oka mo, <<Ala wa ase igwo pini pyo ogege lalo? Ashishini kase ahane bi ini? Ashishe ipu wa kwikye wa sho Owuso iye lo, so ogboga mani?>> Ebeni oka da anu mo, <<Nyiso shini oga, otuse wo da awo ogege.>>
Oyesu Dase Ogege Okunu Kogo ki Inyo.
Ishi oye Oyesu go Ojerusele ebe ki Imya kase ko Oyahuda. Ipu ko Ojerusele ogo kinyo ni yo pee kpofunu koda kikpowu ni aba yogwu okwunu ki ibru mo Obeseda, ni agwinu to ni. Kweyi ase ni gbo ogege lo ni bya awopywiyi, awopyepu-agye kpa awo ngmonyodu nwashika bebeni. Ishi shishini oyoleho ka Adole yawa yinyo yaya. Kweyi kpiri kase ni gbo ginyo ishini oya yinyo ya ya ni ikyikyo, oya pyo ogege. Ongo oye yebe ni, ni gbose, oya gege ko nyiso lo ishayi aweta ayahata. Ishini Oyesu mo gutagye ebe ni, ogye mo oya mowe kpere gbeji wa, odoka mo, <<Oya yimu ko pyo ogege?>>
Ini kere kyogwu mo, <<Ngba ashishe ko tumabo ko gipu ko ogo kinyo ishini inyo ya ni lo. Ishini nyya takirikwu ko gbo ginyo, ashe ya kwobonu dami.>>
Ebeni Oyesu kamo, <<Nyiso! Sho lote wo shini oyawu.>> Ebebeni ongo ni pyogege, oyote nu la kweyi yawu.
Eno ni oza mani gbodagye ni we Eno ko Minyo,
Oki kwikye gogya ko Okana ipu ko Ogalili, ogya ni oyinyo pya winyi ni. Kweyi anyakwase ka awonongbo oye ni oyi nu gutagye kere Okapanahu. Ishini ongo mani pwo mo Oyesu kwikye bwo ojudiya wo Ogalili ni, ogebe nu ga bo mo ona wa doyi nu ni yokwunu kikwu ni ogege.
Oyesu kadawa mo, <<Owoni ala mo oyi kpoza kigbashi lalo ashishe kala ya kyogwu lo.>>
Anyakwase ko onongbo oni kamo, <<Adole, wa shini ahan ga papa lalo oyi hin ya gekwu.>>
Oyesu kyogwu mo, <<Ga, oyi wo ya pyo ogege.>>
Ongo oni kyogwu kpoza ni Oyesu ka ni kweyi oga nu. Ishini otayayo yowe yaga ni, oyole nu byoshu wa danu mo, oyi nu pyo ogege. Oduwoka mo ishi wonya ni oyi nu pyo ogege. Aka danu mo, <<Oshu shobita ogye oye kisheno kene.>>
Ebeni ada ko oyi mani ra mo abo kogye oye kisheno kene Oyesu ka danu mo, <<Oyi wo ya pyo ogege.>> Ebeni anu kpase kole nu kyogwu kpanu.
Omani woza kigbashi komwepa ni Oyesu ya ome ona go ojudiya agye ko Ogalili.
A mulher com fluxo de sangue
Uma mulher que sofria há doze anos tocou a orla do manto de Jesus e foi curada instantaneamente pela sua fé.
Ebeni onya ni ya shonu kpo oyi ishayi igwepa ni kanu itikpi kweyi gabo akpaha koshiye nu. Oka diyinu mo, <<Owoni nggabo akpaha koshiye nu kin, nyya pyogege ki kpiye hin.>>
Oyesu pya kweyi kamo. <<Oyi nonya kagbo otu lo! Otuse wo ngma wo.>> Ebeni opyogege kikpiye nu.
Kweyi onya oye yebeni ni ya gboyi kishayi igwepa ni. Omebi nwashika abo ka awoloboshi, kweyi oyo oza ka abo nu ngmo kpiri shini ose na kweyi, ose ke ya go ohobu. Ni opwo oshu ko Oyesu ni, ogboso itikpi ipu ke ewa kweyi gabo oshiye nu. Oka ipu ko otu nu mo, <<Owoni nggabo oshiye nu kin, ose hin ya kweyi.>> Ebebeni ogboyi nu hagye kweyi opwo ikpiye nu mo, ose nu kweyi.
Kweyi onya oye ye ebe ni ya gboyi ishayi igwepa, oyoji ni ogbo ipu koyagye nu ngmo dawoloboshi, ashishe ke gege da anu ogege lo. Ebeni oyawu bwi itikpi wa ga abo oshiye ko Oyesu, ebebeni ogboyi nu hagye.
Oyesu doka mo, <<Anoho ga ami abo?>>
Kpiri wa tawashu. Kweyi Obitrus kamo, <<Adole, ase lewa ba sa abo.>>
Oyesu ke kamo, <<Ashe ga ami abo; nggye oshu bose ikpiyen.>>
Ebeni onya ni, ma mo anu ya gege yaga mani kin lo, oshi yo kwu, kweyi obose wa kwagye obutu ko Oyesu. Obutu ka asuse kpiri, oko oza ni ya ni ogo Oyesu abo kweyi opyo ogege nu ebebeni. Ebeni Oyesu ka da anu mo, <<Oyin, otuse wo da awo ogege, ga kpo otumene.>>
Ressurreições
Jesus ressuscitou mortos — a filha de Jairo, o filho da viúva de Naim e Lázaro. Ele é Senhor sobre a morte.
Oyi nonya ni Gekwu ni kpo Onya ni Gabo Oshiye ko Oyesu ni
Ishini Oyesu yipu kela mani ya kani, oteyi kase ko Oyahuda oye wa kwagye obutu nu kweyi kamo, <<Oyi hin nonya gekwu anana mani oma. Obiwa yabo so shini ona gbolayi.>>
Oyesu kpa awogboso nyiso kweyi ga kpanu.
Ishini Oyesu gipwole koteyi kase ko Oyahuda kweyi oma awotajigwo kpewa kasuse nwashika ba kyegba, Oka dawa mo, <<Ala bose gese, oyinonya mani gekwu lo, oke ya gbola la.>> Ebeni ayeye Ishini onewa kasuse gese ni, ogipu koda kweyi, obyo oyinonya mani abo, kweyi onyiso iso.
Ebeni oteyi ke ekpa, ni iye nu wo Oyayirus mo Oyesu ni, kweyi owa kwagye obutu nu. Kweyi obo Oyesu kamo, <<Oyi hin nonya ya yimu ko gekwu. Obi wa ya abo wo so shini ona pyo ogege na gbo layi.>> Oyesu gboso ga.
Ase lewa gboso kweyi ba nyi ikpiye.
Ni Oyesu go ole ko oteyi ke ekpa ni, ome ebe ya, ase ba kyegba ba sheha. Ishini ogipu ni, oka da awa mo, <<Ojiya ni ala ba kyegba ba sheha? Oyi mani gekwu lo, oya gbola la.>> Awa ke yo Oyesu eye.
Ishini onuwenya kpiri wese ni, obya ada kpe ene ko oyi kpa awogboso ni bebeni kpanu ni gipu koda ni ayo gwutagye ni. Obya abo kweyi kamo, <<Talita kumi!>> ikweyi nu wo, <<Oyinonya nkamo, nyiso!>> Ebebeni oyi nyiso yawu. Owo oyi ki ishayi igwepa. Oza mani yi igbashi yuwa kwu kpiri.
<<Oji ni nyya mya asuse ki ishi mani kpa anu? Ale byo oji? Alema bya ayileke ni bi ipishi ba yi iyiwa ogwu mo:
<<<Aha tajigwo da ala, ala tela ko gyoba, aha wigye ki ikwu da ala, ala tela ko kyegba.> Koni Oyohana ko yo obatisma wa, oroza kwo ogwi inyi lo, ala kamo, <Ogbo omaku bibi.> Oyi ka Asuse wa ya ro oza ya gwi inyi, ala kamo, <Oyi kinyi, oya ka awino zegba kpa awinozalabi.>>> Ala ke ba gyo oziyi ko Owuso bwe ebe ka ayi nu.>>
Onya ni Yayo Ozalabi ni Nyo Oyesu Ano
Ongo ko oFarisi oye po Oyesu ko ga roza ole nu, kweyi Oyesu ga yagye ko roza. Ishini onya ni wi inozalabi mani pwo mo Oyesu ya roza ole ko ongo ko oFarisi mani ni, obyo ogya ka ano kpeye,
Ebeni ongo oye ni aba yogwu mo Oyayirus, oteyi ke ekpa we ebe ko Oyesu wa kwagye obutu nu kweyi bo mo ona go ole nu, ikweyi koni oyi nu ki ishayi igwepa nonya yo okwunu ki ikwu.
Ni Oyesu yikweyi ko owe ko go ole ko ojayirus ni, ewa ka asuse ba sa abo.
Ni Oyesu tayayo ya kela ni, ase bwo ole ko ojayirus oteyi ke ekpa wa ka da anu mo, <<Oyi wo gekwu, ka yi inofoza apya kelo.>>
Ni Oyesu pwo mani ni, oka do ojayirus mo, <<Ka yoshi lo; totuse, kweyi oyi wo ya pyo ogege.>>
Ishini Oyesu pwo ole ko ojayirus ni, osha ashishe bita gipu kpa anu lo so Obitrus kpo Oyohana kpo Oyakubu, kpa ada kpe ene ko oyi mani. Ase shishini ke be ese ba kyegba kpo otu byobya ikweyi ko oyi mani. Oyesu ke kamo, <<Ala she egba kyokye bita, ikweyi koni oyi mani gekwu lo, oke ya gbola kin la.>>
Ayo Oyesu eye koni agye mo oyi mani gekwu ni. Oyesu ke bya abo kweyi kamo, <<Oyin, nyiso!>> Omaku nu kwikye, kweyi otakpa nyiso. Ebeni Oyesu mo ana da anu oza na re. Igbashi ya ada kpe ene ko oyi mani kwu. Oyesu pyuwa akpaha ma ana ka ka da ashishe oza ni gbodagye mani lo.
Iku ko Olazarus
Agbo ongo oye iyenu wo Olazarus ya gbere. Obwogya leke ko Obetani, ogya ko Omeremu kpo oyinanu Omata. Omeremu ni oyinanu wo Olazarus ya gbere ni, anu pini nyo Oyesu ano kpeye ikpo kweyi wikpo kpinyeyi kikweyi nu la. Ayene nonya mani toleho ebe ko Oyesu mo, <<Adole, oyawo moshi ya gbere.>>
Ishini Oyesu pwela mani okamo, <<Ere mani ya wa kikwu lo. Aayi owa ko byi igyashi wa do Owuso shini Oyi ko Owuso na pyo igyashi bwebe kere mani.>> Oyesu yimu ko Omata kpo oyinanu Omeremu kpo Olazarus. Koni opwo mo Olazarus ya gbere ni, okwikpo hebe ni oyanu ni kenepa, bwebe ni oka dawogboso mo, <<Ahan kwikye go Ojudiya.>>
Awogboso kamo, <<Inofoza, ipu kishi gbayayi ni shigbo ni, Ase ko Oyahuda takirikwu ko takyo, kwikyikyeni oki ya kwikye ya gebe ni?>>
Oyesu kyogwu mo, <<Agbo ogye igwepa ipu ke enoye la lo? Ase ni ya yawu isheno ya shikawu lo, ikweyi koni oya mebe bwebe koyoyu kese mani. Owoni ase ya yawu otu oya shikawu, ikweyi koni ebe yoyu yaba danu lo ni.>>
Ni Oyesu kela mani kweyi ni, ogohobu ko kela dawa mo, <<Oya ka aha ko Olazarus gbola, nke ya gebe ni koga shiyi.>>
Awogboso kyogwu mo, <<Adole, owoni oya gbola, oya pyo ogege.>> Oyesu ya kela ikweyi kikwu nu, awogboso ke ba ma byo oya kela kola ni agye ni la.
Ebeni Oyesu ka dawa mo, <<Olazarus gekwu,
Domínio sobre a natureza
Jesus acalmou a tempestade, andou sobre as águas e multiplicou pães. A natureza obedece à voz do seu Criador.
Oyesu yo owu loshu hagye
Ebeni Oyesu gipu kowu kinyo kweyi awogboso kanu. Agye lo, owu loshu nyiso ishu, ebeni owu ni tani kpi inyo yayimu koyo owu bya. Oyesu ya gbola. Awogboso shiyi, kamo, <<Adole, ngmaha! Inyo yayaha re!>>
Okela dawa mo, <<Ala ni gbotuse lo ni, oji yala ba yoshi?>> Ebeni onyiso kweyi okela dowu kpo ogwa kinyo, kweyi owu hagye. Ango ni bebeni, igbashi yuwa kwu kweyi adoka mo, <<Ongo mani wanoho? Ome owu kpo ogwa kinyo ba pwela nu!>>
Ni eno sha ni, awo gboso we ebe nu kweyi akamo, <<Ebeni gbashishe lo, ishi ke ya gawa ye ewa na gawa, shini ana go ogya ga ro oza ko rore.>>
Oyesu kyogwu mo, <<owo tiri koni aya ga ro oza rore ebye lo. Ala dawa oza rore na re.>>
Aka do Oyesu mo, <<Ikyoga eho kpe ebinyi epa kin pini aha gbo ebe ni la.>>
Okamo, <<Ala byo oza ni ala gbo ni wa dami.>> Ebeni oya ase bagye ikweyi ka akyashi. Ozo ikyoga eho kpe ebinyi epa, kweyi otiyi mi iso kweyi keshi ko Owuso. Kweyi oyi ko tititi da awo gboso, kweyi awo gboso ko dase. Kpiri wa ha yipu. Awo gboso kpo shishi ni mwo ogwugwu igwepa. Ewa kase ni ha ni wo okpaku eho, ijiji ka ango aya Aresawu ka anya kpo ayi le ki lo.
Abo ko ogye eta ko otu go hoki, Oyesu yawu ikweyi ki inyawo kweyi webe wa.
Oyesu dase okpaku ene oza rore
Oyesu ya awogboso ogwu kweyi ka da awa mo, <<Nyya miyinyinyi kawase ni bagye kpa ami eno eta kweyi gbo oza rore lo ni, nyya yimu ko shuwa bita naga kpe emye lo ela koni aya ga shekwu owe ni.>>
Awogboso kyogwu mo, <<Ebenya ipu ki imweshi mani, ni aha ba pyo ikyoga ko gya awe ewa mani?>>
Oyesu duwo oka mo, <<Ikyoga ema ni ala gbo?>> Akyogwu mo, <<Ahapa, kpe ebinyi gbayayi.>> Oyesu ka de ewa mo ana bagye okpagye. Ebeni ozo ikyoga ahapa ni kpe ebinyi, kweyi okeshi do Owuso, oyi fo kweyi da awogboso, ime awa da ase. Kpiri wa ha yipu. Bwe ebeni awogboso kpo oza ni aha shishini ni mwo ogwugwu ahapa. Ewa kase ni ha ni wo okpaku ene, ijiji ka ango, anya kpa ayi leke akuwa ipunu lo.
Egba zoze ole ko Owuso.
Ishini Oyesu kpa awogboso wo Okapanahu ni, awo zegba epa kole ko Owuso wa to Obitrus kweyi do oka mo. <<Adole kala ya zegba kole ko Owuso lo la?>> Oka da awa mo, <<Oya sore.>>
Ishini Obitrus wo ole ni, Oyesu wa kikyikyo ni kela kpa anu ni mo, <<Oji ni oma ipu ko oka doda mani Osaminu? Bwe ebe ka anoho ni awose kese mani ba zegba, bwe ebe ka ayiwa kwe ebe ko ogboga?>> Obitrus ka danu mo, <<Bwe ebe ko ogboga.>>
Oyesu kamo, <<Ayi wa ba ze lo oma.>> <<Ni olemani, ahan ka yotu wa na bya kpa aha lo, ala gi ishu ga she eya. Ala gwo okwunu ke ebinyi ni ala kwu kikyikyo, ikwiri ni opye, ga zegba ka aha kpa anu.>>
Oyesu te Efu ko Odegyo Igbe
Ni ebe nya ni Oyesu kwikye ya go Ojerusele kweyi emye ya ngmo. Ome efu ko ofig okoka ko owe kweyi oga ko ga wo ogwogwa nu, oke ga te efu kin la. Ebeni oka de efu mo, <<Oya gwa ke lo!>> Ebebeni efu oni ngmongmo. Ni awogboso mo aza ni gbodagye kpe efu ko ofig ni igbashi yuwa kwu. Ado oka mo, <<Olela ni efu ko ofig gekwu mani?>> Oyesu kyogwu mo, <<Nyya kadala okwokwoshi, owoni ala kyogwu kweyi gbo gbawashu lo, ala ba gege yayo oza ni sha ke efu ko ofig mani. Ala ba gege ba kade efu mo, <Shu shini ogbo gipu ki ishu,> Kweyi oya olemani byoni ala ka ni. Owoni ala gbo otuse, oza ni ala ba ebe ko Owuso kpiri ala ba pye.
Ebeni owu loshu nyiso ishu, ebe ni owu ni ta kpo ogwa ki inyo ya yimu ko yo owu bya. Oyesu ya gbola, itikpi ko owu yi kweyi nu so Otinti. Awogboso shiyi kamo, <<Adole, inyo ya yaha re, obyo otu lo?>>
Ebeni Oyesu nyiso kweyi, okela do owu kpo ogwa ki inyo mo, <<Sha! Hagye!>> Ebeni owu hagye kweyi ebe ka agye. Oka da awogboso mo, <<Ojiya ni ala ba yoshi? Kwikyikyeni ala gbo otuse lo la?>>
Ebeni oshi yuwa kwu. Aba diyiwa oka mo, <<Ongo mani wa anoho ome ni owu kpo ogwa ki inyo ba pwe ela nu?>>
Ni eno sha ni, awogboso wa ka danu mo, <<Ebeni wi ikyashi, otu ya bi wa. Ya awase mani na gipu ka awogya kpa ada ga ro ozarore abiyiwa shini ana re.>>
Okyogwu mo, <<Ala da awa oza na re.>>
Aka da nu mo, <<Ahan ga ro ikyoga ki ikwiri ni awo yo oko ka abola ba pye oya ahata ni wa da awa?>>
Oduwoka mo, <<Ikyoga ema ni ala gbo? Ala ga ma.>>
Ishini aga ma ni, aka mo, <<Ikyoga eho kpe ebinyi epa.>>
Ebeni Oyesu ka dawa mo ana yase na bagye ikpo, ikpo ikweyi ki ikyashi. Abagye, ikpo, ikpo kase ogbogbo oyoye, kpase awaweho. Ozo ikyoga eho kpe ebinyi epa kweyi otiyi mi iso, okeshi do Owuso kweyi oyiko da awogboso kweyi awogboso da ase. Kpiri wa ha yipu. Awogboso kpo shishini ko ikyoga kpe ebinyi nwo ogwugwu igwepa. Ewa kase ni ho oza ni wa ango okpakwu eho.
Ebeni oma awogboso ba nonu kpo owu kpo ogwa ki inyo ya pyuwa. Abo ko ogye ene ko otu, oyawu we ebe wa ikweyi ki inyo. Oya yimu ko shigbo gwuwa ta, ni amo yawu ikweyi ki inyo ni, ama byo owo oyi la. Angme egba, ikweyi koni amo ni oshi yuwa kwu.
Ebebeni oka da awa mo, <<Ala gbotu gbagba! Ami la. Ala ka yoshi lo.>> Ebeni oto gipu ko owu kpa awa, kweyi owu ni ya ta ni ka agye. Igbashi yuwa kwu,
Oyesu da Ase Okpakwu Ene Ozarore
Ipu ki ishi oni, ewa ka asuse ki gbayi. Agbo oza ko re lo, Oyesu ya awogboso ogwu kweyi ka da awa mo, <<Nyya miyinyinyi wa, eno eta yoma ni abebeni kpa ami kweyi agbo oza ko rore lo. Owoni nkamo ana go ole kpe emye aba ga shekwu owe ikweyi koni ashini wa bwe ebe lenu ni.>>
Awogboso do oka mo, <<Aha ke ba ga pyo ozarore ko gye ewa mani ebenya ipu ki ikyashi mani?>>
Oyesu duwoka mo, <<Ikyoga ema ni ala gbo?>>
Akamo, <<Ahapa.>>
Oka de ewa mo ana bagye okpagye. Ishini ozo ikyoga ahapa mani kweyi okeshi do Owuso, oyi ko da awogboso mo ana da ase, ake ya mani. Agbe ebenyi gbayayi, oki keshi kweyi ka da awogboso mo ana yi ko da ase. Ase roza yipu. Awogboso kpo shishini ko ozarore nwo ogwugwu ene. Awase ni ro oza ni go okpakwu ene. Ebeni oka da awa mo ana ga wa.
Oyesu te Efu ko Ofigi Igbe
Gbe ebenya ni aba sho ogya ko Obetani bita ni, emye ya ngmo Oyesu. Omefu ko Ofigi oye ni gbefu ni ebe lenu, ebeni osha bo kwe ogbo ogwogwa. Ishini ofebeni ni, omo ojije lo sefu, koni owi ishi ko gwogwa nu lo ni. Ebeni oka de efu mo, <<Ashishe ya ho ogwogwa wo kelo ko gbogbo-gbogbo!>> Awogboso pwo oza ni oka ni.
Ozafofu Ikweyi ke Efu ko Ofigi
Otukpokyi ni abose ba ga ni, ame efu ko Ofigi oni ngmongmo ko ogbogba. Ebeni Obitrus ra kweyi ka do Oyesu mo, <<Adole, ma! Efu ko Ofigi ni otigbe ni ngmongmo!>>
Oyesu ka da awa mo, <<Ala yo otuse Owuso. Nyya kadala okwokwoshi, kpiri kase ni ka de efu mani mo, <Ona shu ga gbo ipu ki ishu nyakwu,> Kweyi ogbo otu lo, oke yo otuse mo oza ni oka ni ya gbodagye, oya lemani danu. Mani oni, nyya kadala, kpiri koza ni ala tinarigwu ba doka, ala yotuse mala kwobonu pye wa, kweyi oya wa kakala. Kweyi ishini ala hagye ko tinarigwu kweyi ala bya ashe otu, yo ozalabi nu yi gbo shini Ada kala ni yi iso ni na yo ozalabi kala gbala.
Oyesu sha awogboso kikyikyo
Eno oye Oyesu ya tono okwunu kega kishu nyakwu ko Ogenesarati, ewa kasuse nwashika shogba to ba pwela ko Owuso, omo owu kinyo epa hagye okwunu kega, ni awino kwebinyi shibita kweyi aba neya wa ni. Ogipu kowu oye ni wa ko Osimo ni, oka danu mona sha gipu kishu nyakwu gbayayi. Ebeni oyagye ipu kowu ya fuwela ko Owuso.
Ishini okela kweyi ni, oka do Osimo mo, <<Yeya wo shebeni libu ni shini okwebinyi.>>
Osimo kadanu mo, <<Adole aba yoko kotu gbishini ebenya aha kwojije lo. Ikweyi koni oka mani ke, nyya sheya ipu kinyo.>> Ishini aya mani ni, akwebinyi nwashika gbishini eya wa kwotu ko sha. Ebeni aya awino kwebinyi ni bowu oye ni ogwu shini ana wa tuwabo, awa kpebinyi sho owu pepa, owu mwu gbishini akwotu ko gbobi geye kinyo.
Ishini Osimo Obitrus moza mani ni, okwagye obutu ko Oyesu, kweyi kamo, <<Ga sho obutu hin, Adole! Ami wine ko ozalabi la!>> Igbashi yo Obitrus kpa awino kwebinyi mani kpiri yikwu ikweyi kebinyi nwashika ni akwu ni, ko Oyakubu kpo Oyohana ayi ko Ozebedi mamani.
Ebeni Oyesu ka do Osimo kamo, <<Kayoshi lo; bwanani go ohobu oya kwasuse.>> Ebeni apyowu wa wese kishu, asho ojoji wa kpiri bita kweyi agboso.
Oyesu Yo Owu Nyakwu Hagye
Eno oye, Oyesu ka da awogboso mo, <<Ala gipu ko owu ki inyo shini ahan sheyi ki ishu ge ese.>> Ebeni agipu ko owu ki inyo ko sheyi. Ni aba ga ni, ola yo bize. Ebeni owu nyakwu ta ikweyi ki ishu, kweyi owu ki inyo ya yimu ko ga agye, kweyi ebi ya yimu ko ruwa. Awogboso Oyesu shi iyi mo, <<Adole, Adole, inyo ya yaha re!>>
Onyiso kweyi ka do owu kpo ogwa ki inyo mo ana hagye. Oda awogboso oka mo, <<Otuse kala yini?>>
Ipu ko oshi kpi igbashi adi iyiwa oka mo, <<Omani wa anoho, no owu kpi inyo, ba apwe ela nu?>>
Oyesu Yo Owu Nyakwu Hagye
Eno oye, Oyesu ka da awogboso mo, <<Ala gipu ko owu ki inyo shini ahan sheyi ki ishu ge ese.>> Ebeni agipu ko owu ki inyo ko sheyi. Ni aba ga ni, ola yo bize. Ebeni owu nyakwu ta ikweyi ki ishu, kweyi owu ki inyo ya yimu ko ga agye, kweyi ebi ya yimu ko ruwa. Awogboso Oyesu shi iyi mo, <<Adole, Adole, inyo ya yaha re!>>
Onyiso kweyi ka do owu kpo ogwa ki inyo mo ana hagye. Oda awogboso oka mo, <<Otuse kala yini?>>
Ipu ko oshi kpi igbashi adi iyiwa oka mo, <<Omani wa anoho, no owu kpi inyo, ba apwe ela nu?>>
Oyesu Do Ongo ni Gbo Omaku bibi ni Ogege
Oyesu kpa awogboso sheyi ki ishu ga agbabo ko oGerasa bwa agye ko Ogalili.
Ni eno ya sha ni ayikoko ko Oyesu igwepa ni wa ta anu kweyi kamo, <<Ashishe be ebe mani lo, ka da awase mani na gogya leke kpo onyakwu naga labo ko oza rore kpe ebe ko kya ikweyi koni ebe ko kya ye ebe mani lo.>>
Okyogwu mo, <<Ala da awo oza rore shini ana re.>>
Akamo, <<Aha gbo ikyoga eho kpe ebinyi epa kin la, kwe an ga roza rore wa da awase mani kpiri?>> Ango okpakwu eho pini be ebeni la.
Oke ka da awogboso mo, <<Ala yuwa na bagye ikpo ikpo ase awa aweho.>> Awogboso ya mani, kweyi ananoho bagye okpagye. Oyesu zo ikyoga eho kpe ebinyi epa kweyi otiyi mi iso, kweyi osho Owuso iye, oyi kyigbo. Ebeni oda awogboso, kweyi ako da ase. Kpiri wa ha yipu, kweyi awogboso kpo shishini sho ogwugwu igwepa.
Imya ko Onyape Okana ko Ogalili
Eno ko omweta ayonyape ogya ko Okana ipu ko Ogalili. Kweyi ene ko Oyesu yebeni, kweyi apo Oyesu kpawogboso ebe konyape. Ishini inyi kweyi ni, ene ko Oyesu ga ka danu mo, <<Agbinyi kelo.>>
Kweyi Oyesu ka danu mo, <<Ene, onya wakakahin? Ishi hin gye wa lo.>>
Inanu ka dayole mo, <<Oza ni oka kpiri ala ya.>>
Ebeni epwo kinyo ihiri ni ama kpa akyo hagye ebe ni, ko yodu kikpiye nona ka Ase ko Oyahuda, ibwu kepwo mani ya gogya awepa kwe aweta.
Oyesu ka dayole mo, <<Ala shinyo nwawepwo mani.>> Kweyi ashi nwuwa sururu.
Ebeni oka dawa mo, <<Ala shi ga dorogwu koka kimya.>>
Aya mani, kweyi orogwu koka kimya gwinyo ni ayi pya winyi mani. Ogyebe ni abyinyi mani bwanu wa ni lo, ayole ni byinyi wa ni pini gye la. Ebeni, oyoba konyape ogwu gokoka, kweyi okamo, <<Aba dase inyi neshi ba gwa ikyikyo ome la, kweyi ishini awogboga kwobonu gwa nwashika ome aba byoni shoshi fakikyikyo lo ni ya wese. Awo ke yinyi neneshi yi teba wishi mani ome obi wese.>>
Omani pini woza kigbashi kikyikyo ni Oyesu ya Okana ko Ogalili ni la. Bwebe ni oyigyashi nu yi tese, kweyi awogboso kyogwu kpanu.
Odoka mani kin shini ona moma, ikweyi koni okwobonu gyoza ni oya yimu koya ni.
Ofilibus kyogwu mo, <<Ikwiri niya roza rore dewa kasuse mani ko pyabo oyoye, ya shikwiri koko ke eno ogbogbo epa.>>
Oye ipu kawogboso, Andru, oyene ko Osimo Obitrus kamo, <<Oyi nongo oye gbo Ikyoga eho kpe ebinyi epa yoma. Omani ya yamoji ya fikweyi kewa ni bagye mani?>>
Oyesu kamo, <<Ala ka dase na bagye.>> Ebeni ikyashi nwashika kweyi aka da ango mo ana bokpagye, awase okpakwu eho. Oyesu zo ikyoga kweyi oshotunehe do Owuso, kweyi oda awogboso mana yiko dewa ni bokpagye ni, oki ya mamani kpe ebinyi.
Ishini kpiri wa roza gyuwa ni, oka da awogboso mo, <<Ala kpashini koza ni are ni tukpa. Shini ojije naka yishi lo.>> Oni akpo tukpa ni nwo ogwugwu igwepa kpo ikyoga eho ni aha ni.
Ishini ayawu kigbo eta kwe ene ni, kweyi amo Oyesu yawu ikweyi kinyo ya webe ko owu, kweyi oshi yuwa kwu. Oke ka dawa mo, <<Ami la, alaka yoshi lo.>> Ebeni azo kpabo pepa ipu kowu, ebebeni owu pwo okwunu kega ebe ni aba yimu ko ga ni.
Oyesu Bose da Awogboso Ahapa
Itikpi koni, Oyesu ki bose dayole nu okwunu ki Ishu nyakwu ko Otiberiya agye ko Galili. Owe ni obose dawa ni yoma: Awase ni bebeni wo, Osimo Obitrus kpo Otoma ni aba yogwu ma Apule ni, kpo Onataniye bwo Okana ka agye ko Ogalili, oyi ko Ozebedi, kpa ayole nu epa. Osimo Obitrus ka da awa mo, <<Nyya ga tinyi,>> aka danu mo, <<Aha ba ga kpawo.>> Ebeni abose ga gipu ko owu kinyo, ipu kotu oni akwojije lo.
Ototukpokyi, Oyesu wa hagye ega ki ishu, ayole nu ke gye mo Oyesu pi hagye lalo.
Oyesu yuwogwu mo, <<Ayene hin, ala kwe ebinyi oyoye lo?>>
Akamo, <<Aayi.>>
Oyesu ka dawa mo, <<Ala sheya kala abore ko owu ala ba kwe ebinyi.>> Ni aya mani, agege ko pyeya lo ikweyi koni ebe nwashika ipu keya ni.
Ebeni oye ipu kayole ko Oyesu ni oya yimu ni ka do Obitrus mo, <<Adole la!>> Ni Osimo Obitrus pwo ya kamo, <<Adole la,>> ni, okpo oshiye nu kese shoko kweyi shibi gipu kinyo. Ashini kayole gboso ipu ko owu kega ki ishu, kweyi apyeya nwonwu kpe ebinyi, koni alenu kpega ki ishu lo ni. Enu wa kpega ki ishu lema byikpo ogbogbo eta kin la. Ishini abose shipu ki ishu wo okpagye ni, eha kola yebe ni kpe ebinyi yikweyi nu, kpikyoga.
Oyesu ka dawa mo, <<Ala bye ebinyi ni ala kwu ni gbayayi wa.>>
Ebeni Osimo Obitrus toshi gipu ko owu kweyi pyeya go okwunu kega. Eya kwebinyi nyakwu-nyakwu ogbogbo oye saweho ayeta, koni ebinyi nwashika ipu nu ni, eya ke sha lo.
Libertações
Jesus expulsou demônios com autoridade. Os espíritos impuros não resistiam à sua palavra e saíam imediatamente.
Otuse Koteyi ka Adakare ko Oroma
Ishini Oyesu go Okapanahu ni oteyi kadakare ko Oroma webe nu, odoka shini na taabo. Okamo, <<Adole, oshe hin winyi gwutokpagye ole ya mowe kotata.>>
Oyesu ka danu mo, <<Nyya wa dano ogege kikpiye.>>
Oteyi ka adakare kamo, <<Adole, nggye koni oya wipu kole hin ni lo, kela kin, ose koshe hin ya kweyi! Ami abiyun wase ni yabo kawashe ni la, nkyi gba awadakare ba abo hin. Ngboshu, owoni nkadawa mana ga, aba ga, nkadawa mana wa, aba wa. Owoni nka da awayole hin mo ana yoza mani ake ba ya.>>
Ishini Oyesu pwozani ongo mani ka ni, igbashi yokwu kweyi okada awase ni ba gboso ni mo, <<Nyya ka dala okwokwoshi, nma ashishe okpagye ki Izrayila ni gbo otuse kotata byo ongo mani lo. Nyya ka dala mo, ase bawa bwo okpagye nwashika bawa bagye ebe kimya kpi Ibirayi, Ishaku kpo Oyakubu Obula kiso. Awase ni obula kiso shu kowa akakaha ni ke, aba tuwa ya gese, ipu kebe dibu, ebeni aba kyegba kweyi ba shabo ahanu.>>
Ebeni Oyesu kado oteyi kadakare mo, <<Gole! Oyole wo ya pyogege byoni oyotuse mo oyaweni.>> Ni, olemani oni, oshe nu pyogege kikpiye nu.
Oyesu da Ango Epa ni gbo Omaku Bibi ni Ogege ki ikpiye
Ishini Oyesu sheyi kishu gokpagye ko Ogadarin ni, ango epa ni gbo omaku bibi ni bwa amiri wa gbayi kpanu. Awozakoshi ni ashishe yagege ko bwo owe ni lo. <<Angmegba kweyi kamo, Oji ni oya tikpo ebe kaha, Oyi ko Owuso? Owebeni ko daha owe ome ishi ko Owuso ko daha owe naya la?>> Pee kpawa ebeni, aruma nwashika ba roza. Awomaku bibi mani bo Oyesu kamo, <<Owoni ongmaha shipu kawa mani, naha enya shini ahan gipu kawaruma mani.>>
Oka dawa mo, <<Ala ga,>> ebeni abose gipu kawaruma, kweyi kpiri kawaruma sa bwiso kefu gipu kinyo kweyi agekwu. Awani ba gbeho kawaruma ni nyinya wa gipu kogya kweyi koza ni gbodagye kpa ango ni gbo omaku bibi ni. Ebeni kpiri kase kogya bose koga gbayi kpo Oyesu. Kweyi ishini amoni, abo mo naga shokpagye wa bita.
Oyesu yo odoho faha
Ishini ofiyi epa ni shebe ni bita ba gese ni, awashe byo ongo ni gbo omaku bibi ni ya gege ko kela lo ni wa to Oyesu. Ishini ono omaku bibi enya gese ni, ongo niya kela lo ni kela. Igbashi yuwa ku kweyi akamo, <<Ojije lemani gbodagye Izrayila ni amamani wa lo.>>
Oyesu kpo Obelizebu
Eno oye awa ashe byo ongo oye ni gbo omaku bibi webe ko Oyesu. Ongo ni wo ofiyi okiya kela lo ebe ni Oyesu dano gege ki ikpiye bwebe ko ngmo omaku bibi, kweyi ongo mani ya kela oki ya me ebe!
Otuse ko onya ko Okana
Oyesu she ebeni bita go okpagye ko Otaya kpo Osidon. Ebeni, onya ka agye ko Okana bye egba we ebe nu kamo, <<Adole, Oyi ko Odawuda, miyinyinyi hin! Oyi hin nonya ya mowe kpo omaku bibi ba.>> Oyesu ko ojije lo. Ebeni awogboso we ebe nu kweyi bo mo, <<Pwe egba nu, shini na ga, oya gbosaha kpe egba.>> Ebeni Oyesu ka do onya ni mo, <<Nwwa ela ka wo otukpo ki ipwoma ki Izrayila ni gebi ni kin la.>> Onya ni wa kwagye obutu nu kweyi kamo, <<Adole, Oyesu tumabo.>> Oyesu kyogwu mo <<Ashoshi ko yo oza rore neneshi ka ayi yi di iwo lo.>>
Olemani ko okwokwoshi, <<Adole: iwo ba ro oza ka adole wa ni shonu okpagye ni.>>
Ebeni Oyesu kyogwu mo, <<Onya, otuse wo loshu! Na lema byoni oba ni!>> Ishi oni oyinu pyo ogege.
Oyesu do oyi ni gbo omaku bibi ni ogege ki ikpiye
Ishini awe ebe ke ewa ni, ongo oye we ebe ko Oyesu kweyi wa kwagye obutu nu kweyi kamo, <<Adole, miyinyinyi ko oyin, ogbo ose ki ikpikpi, oya mowe nwashika. Ishi nwashika oya gbo go ola kwe ipu ki inyo. Nbyo we ebe ka awogboso, agege ko dano ogege ki ikpiye lo.>> Oyesu ka da awa mo, <<Ala ase ki ishi mani, awine ko otuse gbayayi kpo oza bibi, gbi ishi wonya ni nyya yagye kpa ala? Gbi ishi wonya ni nyya gbotu kpa ala? Ala byo we ebeni.>> Ebebeni Oyesu gbo omaku bibi eha, kweyi obose shi ikpiye ko oyi oni. Bwi ishi oni opyo ogege ki ikpiye nu.
Ebebeni ongo oye ni gbo omaku bibi ni ngmegba ipu ke ekpa mo, <<Oji ni oya tikpo ebe ka aha Oyesu ko Onazareti, owa ko wa yaha bya la? Ngya ase ni owe ni! Awo pini wa ase Sere ko Owuso la!>>
Oyesu gbeha mo, <<Sha! Bose sho!>> Omaku bibi ja anu ebe ni kweyi ongmegba ome osho bita.
Oyesu do Ongo ni Gbo Omaku Bibi ni Ogege
Oyesu sheyi ki ishu nyakwu ga agbabo ko Ogerasa. Ishini Oyesu bose bwi ipu ko owu ni, ogbayi kpo ongo oye ni bose bwa amiri ni ebeni, ongo mani gbo omaku bibi ikpiye nu. Ongo oni ya kya ebe ka amiri, kwa ashirika, ashishe ya gege ko yo gbo kpa anu lo. Ongo mani ishi nwashika aba yo sha ashirika, oya ya ashirika yayi kweyi ya yo ogye ki ikpo nu ya yi kyigbo. Ashishe ya gbo oshu ko gege byo bagye lo. Ko otu, ke eno oya gyehe ipu ka amiri kpi ikweyi kikpokyi, oya kyegba ya shi iyinu ikpiye kpa akyo ni gba ahanu ni.
Ishini omo Oyesu ebe lenu ni, onyinya kweyi wa kwagye obutu nu. Osheha kweyi kamo, <<Oji ni oya tikpo ebe hin, Oyesu, Oyi ko Owuso? Nyya bo mo ka yumo ojije lo!>> Oka mani ikweyi koni Oyesu kwobonu ka do omaku bibi mo, <<Bose shi ikpiye ko ongo mani awo omaku bibi.>>
Ebeni Oyesu do oka, <<Iye wo wo oji?>>
Okyogwu mo, <<Iye hin we Ewa, ikweyi koni aha nwashika ni.>> Ebeni omaku bibi bo Oyesu mo ona ka nawa enya sha agbabo ni lo.
Aruma nwashika ba roza ashikwu kikpokyi ni kuwa ni. Awo omaku bibi mani bo Oyesu kamo, <<Na aha enya shini ahan gipu ka awaruma mani.>> Oyesu da awo okwunu, kweyi omaku bibi bose sho ongo ni kweyi gipu ka awaruma. Aruma okpakwu epa sa bwi ikpokyi gipu ki ishu.
Awase ni ba gbeho ka awaruma ni nyinya gogya wa kpa awo ole ni kwuwa ni kweyi ga ko oza ni gbodagye ni da ase, kweyi abose ge ese ga mo oza ni gbodagye ni.
Ala ke kamo owoni ase ka da ada nu kwe inanu mo, <Kpiri ko oza ni ala bi ba pye ebe hin ni, nkwobonu gbomu ko yi do Owuso wa,> Ebeni ala shobita yo oza da ada nu kpi inanu kelo. Bwebe ko omani ala yela ko Owuso yi tokoka ikweyi ko odu kala ni ashibita tagye da ala ni. Kweyi ala ya awoza nwashika mani.>>
Oza ni ya Ase ya Kyinyi ni
Oyesu ye ewa ka asuse kpiri ogwu we ebe nu kweyi ka da awa mo, <<Ala ya akpaha tagye shini ala pwo, kpiri kala shini ala gyo oza mani. Oza ni bwe ese gipu kase pini ya ya ase ya <Kyinyi> lalo, ke so oza ni bwi ipu kase we ese ni pini ya ya ase ya <Kyinyi> la.
Onya ni Gbo Otuse ni
Bwe ebeni Oyesu nyiso go okpagye ko Otaya kpo Osidon. Ogipu kole oye, kweyi oya yimu shini ashishe naka gye lo; oke gege yi iyinu teba lo. Ebebeni onya oye ni oyi nu gbo omaku bibi ni pwe ela ko Oyesu ni, owa gbo obutu nu. Onya ni wa ase ko Ogirik, amo Osiriya okpagye ko Ofinikiya. Obo Oyesu mo ona ngmo omaku bibi shi ikpiye ko oyi nu.
Oka danu mo, <<Sha ayeke bita na ro oza yipu ome, ikweyi koni oya shoshi shini ana yo ozarore ka ayi shagye di iwo lo.>>
Onya ni kyogwu mo, <<Olemani Adole, iwo ke ba roza ni shonu bwabo kayi ni.>>
Ebeni oka danu mo, <<Ikweyi koni okyogwu mani ni, kwikye gole, omaku bibi sho oyi wo bita wa.>>
Ogo ole ga to oyi nu gwutagye ogwudu, omaku bibi bose sho.
Ongo oye ipu ke ewa kamo, <<Inofoza, nbyo oyi hin ni gbo omaku bibi ni ya wobi ko kela lo ni wa da awo. Kpiri ki ishini okwo, oya gwo gbo, kweyi okwunu nu ya kyowu kweyi ya hahanu oki ya ngmongmo kwakya. Nba awogboso ake gege ko no omaku bibi oni enya lo.>>
Oyesu ka da awa mo, <<Ala awine ko otuse gbayayi ki ishi mani, gbi ishi wonya ni nyya yagye kpa ala? Gbi ishi wonya ni nyya gbotu kpa ala? Ala byo we ebeni wa da ami.>>
Kweyi abyo wa danu. Ishini omaku bibi mo Oyesu ni, ebebeni oyo gwo gbo ya ja okpagye kweyi okwunu nu ya kyowu.
Oyesu da ada ko oyi mani oka mo, <<Ose mani kwo gbeji wa?>>
Ada nu kamo, <<Bwi ishini owo oyi leke ni. Ishini okwo kpiri oya yo ta go ola kwe inyo ko yo ngmo. Owoni oke ya gege, miyinyinyi ka aha shini otahabo.>>
Oyesu ka da nu mo, <<Ojiya ni omo owoni oya gege?> Ojoji ya le kwee da ase ni yo otuse ni.>>
Ebebeni ada ko oyi mani kamo, <<Nyyo otuse, otuse hin pa nwa lo, fu manu da ami!>>
Ishini Oyesu me ewa ba we ebeni ni, oka do omaku bibi mo, <<Awo omaku ko odoho kpo okyi igbenu, nyya ka da awo, bose sho, ka kwikye gi ikpiye nu ke lo.>>
Omaku bibi sheha, kweyi ja oyi mani ko otata ime obose sho. Oyi oni tagye byo okwu kweyi ase nwashika ba kamo, <<Ogekwu.>> Oyesu ke bya abo kweyi nga anu hagye kpi ikpo nu, kweyi ohagye iso.
Oyesu Dase Nwashika Ogege
Oyesu shekpa bita kweyi go ole ko Osimo. Oshu yene konya ko Osimo kwu, kweyi abo Oyesu mona danogege. Oweyi kwagye obutu nu kweyi ka doshu mona shobita, kweyi oshu shobita. Ebebeni onyiso kweyi okwotu ko yozarore dawa.
Ishini Oyesu sa ega ki ishu ni, ogbayi kpo ongo oye ni gbo omaku bibi bwo ogya ni. Ogbeji ni ongo mani ya osho oshiye lo ni, oya yo ole lo, oya kya ebe ka amiri. Ishi no omo Oyesu ni, ozoko iso ya kyegba kweyi kamo, <Oji ni oya yimu ebe hin, Oyesu, Oyi ko Owuso Ada Nyakwu? Nyya bo mo ka yumo ojije lo!>> Oka mani ikweyi koni Oyesu sho omaku bibi eha mo ona bose sho. Ongo mani ishi nwashika aba yo sha ashirika, oya ya aba yayi kweyi omaku bibi ya byo ge ebe ni gba ashishe lo ni. Ase ko Oyahuda.
Oyesu do oka mo, <<Iye wo wa anoho?>>
Okyogwu mo, <<Iye hin wo nwashika,>> ikweyi koni omaku bibi nwashika bi ikpiye nu ni. Awo omaku bibi mani bo Oyesu mo ona ka nawenya ga aleku lo.
Aruma nwashika ba ashikwu kikpokyi ba roza. Awomaku bibi mani bo Oyesu mo ona na awa enya gipu ka awaruma ni, kweyi oda awo okwunu. Ishini awomaku bibi mani bose sho ongo mani, agipu ka awaruma mani, awaruma nyinya ga shonu ipu ki ishu, kweyi ishu yuwa re.
Awase ni ba gbeho ka awaruma mani mo oza ni gbodagye ni, anyinya gipu ko ogya ga gbi igwu ko oza ni gbodagye ni da awa ipu ka awogya leke kpo onyakwu, kweyi ase bose ge ese ko ga mo oza ni gbodagye ni. Ishini awe ebe ko Oyesu ni, awa to ongo ni omaku bibi bose sho mani yagye obutu ko Oyesu, osho oshiye kweyi otu nu ka agye; kweyi oshi yuwa kwu.
Nyya kadala okwokwoshi, ashishini kala ni hagye ebe mani ni, aba gekwu ome ba mo obula ko Owuso lo.>>
Ikpiye ko Oyesu Pya
Oyesu kela mani kpe eno ahata, kweyi oyo Obitrus kpo Oyohana kpo Oyakubu ogwu, kweyi atoshi gi iso ke efu ko tinarigwu. Ni oya tinarigwu ni, aheyi nu pya, kweyi oshiye nu ki pya wo shehe purututu. Ango epa, Omusa kpi Iliya, bose ipu kigyashi neshi ba kela kpo Oyesu. Aba kela ikweyi ki ikwu nu ni oyawa gbodagye Ojerusele ni.
Ola yo Obitrus kpa awoya ki iyawu nu bize ge ebe lenu, ishini ake shiyi ni, amo ipu kigyashi nu, kpa ango epa hagye kpa anu. Ni ango mani ba sho Oyesu bita ni, Obitrus kamo, <<Adole, oshoshi ni aha be ebeni ni, an gwa adaba eta, oye na wa akakoho, oye na wa ko Omusa, oye na wa aki Iliya.>> Obitrus gyo oza ni oya ka ni lo.
Ongo oye ipu ke ewa wa kyegba do Oyesu mo, <<Inofoza, nyya bo mo wa mo oyin. Anu fufunu woyin la. Omaku bibi yo oyin kwu, kweyi oyo ya sheha; oki yi ikpikpi kwo kweyi okwunu nu ya kyowu. Oya shobita lo so oyo ofo. Nba awogboso ko nenya, agege lo.>>
Oyesu kyogwu mo, <<Ala ase ki ishi mani, awo gbotuse lo ki gbo otu meme, gbi ishi wonya ni nyya yagye kpa ala? Gbi ishi wonya ni nyya gbotu kpa ala? Byo oyi wo we ebeni.>>
Ni oyi mani yawu ya we ebe ko Oyesu ni, omaku bibi yi ikpikpi gwo tonu. Oyesu ke gbo omaku bibi eha, kweyi oyi mani pyo gege, kweyi oyo da Ada nu Kweyi igbashi ya ananoho kwu ikweyi koni amo neneshi ko Owuso ni.
Igbashi ya ananoho kwu ikweyi ko oza ni Oyesu ya ni. Oka da awogboso mo,
Oyesu kpo Obelizebu
Oyesu ya ngmo omaku bibi ni yo ongo oye ya kela lo ni. Ishini omaku bibi mani bose ni, ongo oni kwotu ko kela, igbashi ya ase ni be ebeni ni yi kwu.
Kweyi oye ipu ka ayikoko ko Oyesu nu yo oshe ka anyakwase ko osapa oye akpaha ka abore ngma kpe ewakpa.
Oyesu ke kamo, <<Ala shibita!>> Kweyi ogabo anu akpaha kweyi da anu ogege.
Ni awogboso Oyohana ba she ebeni bita ni, Oyesu kwotu ko kela de ewa ka asuse ikweyi ko Oyohana mo: <<Ishini ala ge ebe ko Oyohana ododa ni oji ni ala ga ko ma? Ala ga ko ma agwu ni owu ya tuwa ni la? Owoni olemani lo, oji ni ala ge ese ko ma? Ongo ni sho oshiye neneshi ni la? Aayi, awase ni ba sho oshiye neshi ni bo ole ka awose la. Kwe, oji ni ala gese ko ga ma? Ala ga ko mi inobane la? Olemani, ase ni ala ge ese ko mo ni shi inobane. Oyohana pini wa ase ni okpa ko Owuso ya kela ikweyi nu ya kamo,
<<<Ma, nyya to oyoleho hin oleho ya kwobonu dawo,
shini nawa kyowe gbishi wo.>
Nyya kadala, ipu ka asuse ni anya mani ashishe sho Oyohana lo; kwikyikyeni ase ni wo ogwejeji obula ko Owuso ni sho.>>
Kpiri kase, kpa awozegba, ishini apwela ko Oyesu ni, agye mo owe ko Owuso wokwokwoshi, ikweyi koni Oyohana yuwo obatisma ni. Awofarisi kpa awofono ke tela ki imu no Owuso gbo da awa ni, ikweyi koni Oyohana yuwo obatisma lo ni.