1 Nyya yimu shini ala gyedo ko takirikwu nwashika ni nyya ya ikweyi kala kpa awase ni bwo Olawudikiya, kpa awase ni gyiyi kpa ami wa lo ni. 2 Nyya mani ko tuwotugbagba shini ana bagye dudu ipu ki imu, shini ana gbogyogye nwashika, shini ana gyoza teba ko Owuso, ni wo Okristi abiyinu ni, 3 ni ayo olashiko koziyi kpogyogye kpiri yi teba ipu nu ni. 4 Nkela mani dala shini ashishe naka gyalegya kpawashu kokwunu lonye lo. 5 Koni Nyyo kpala ipu kikpiye lo ni, Nyyo kpala ipu ko omaku, Nyya shotunehe kpoza yoya kala ni ala hagye loshu ipu kotuse kala ipu ko Okristi ni.

6 Byoni ala zo Oyesu Okristi wa Adole ni, ala gohobu ko gboso. 7 Ala yogba kala na hagye loshu ipu nu, ki hagye loshu ipu ko otuse byo ni afala ni, kweyi ala nwonwu kpo otunehe. 8 Ala ka yashishe na gyalegya kpo ogyogye kokame kasuse lo, ni bwese mani, oke wa ko Okristi lo. 9 Ikweyi koni Owuso kpiri-kpiri yagye ipu ko Okristi, ipu kikpiye nu kasuse, 10 kweyi adalo Okristi kpiri-kpiri, ni woteyi kawose kposhu kpiri ni. 11 Ipu ko Okristi ala le byawase ni ashuwofu ni, wa kasuse la lo, ke wo ni Okristi yaya ni la, shini ana ngmala shoko kikpiye kozalabi, 12 koni ishini ayala Obatisma ni, ayala nyi kpanu pini yoma. Ala ki nyiso kpanu bwebe ko otuse ipu ko oshu ko Owuso, ni shiyi bwamiri ni. 13 Ishi oye ala gekwu ipu ko ozalabi kala kweyi bikpiye ni ya yala ba yozalabi ni, Owuso ke yala shiyi kpo Okristi. Oyozalabi kala kpiri rigbala, 14 oyenena kepwo labi kaha bya, kpawono nu, ni yikweyi kaha ni; oyi bize, ga yigwo boshi sepa. 15 Oyoshu kawose bize; ogbuwowuru iyi kananoho, ogwuwagye ikweyi ko oshi sepa.

16 Mani oni ala ka yashishe na kwalepwo ikweyi ko oza ni ala ba re kwoza ni ala ba gwa, kwe ikweyi kimya sere, kwe imya ko oya pepe, kwe Eno ko Minyo lo. 17 Awoza mani kpiri woyi kawoza ni bawa ni shishi la: Oza kotata ke wo Okristi. 18 Ala ka yawino yikweyi bagye kokame kpo geyagye da ayoleho na walobi ko pyabola lo. Edo kasuse mani ya yotu nu kpiri doza ni oma ni, kweyi otulabi nu yo ya zikweyi iso. 19 Oyebe lenu kpo Okristi ni wikweyi kikpiye ni, ni bwebe nu ikpiye kpiri gbayi bwebe kigo kikpiye kpanyakpa, kweyi ya gye byoni Owuso ya yimu ni.

20 Byoni ala gekwu kpo Okristi ni, ala kabo kposhu ka awomaku kese ni gboshu ikweyi kala ni, ojiyala ba ya byala tayayo wa kese? Ojiyala ki ba ko ono nu kwikyikyeni byo: 21 <<Ka bi lo! Ka mama lo! Ka gabo anu lo!>> 22 Kpiri kawoza mani ishini ayoko kpawa kweyi aba gboko kelo, ikweyi koni awono kpoza fofu kasuse ni. 23 Edo kawono mani le byo agboziyi ipu wa ni, ikweyi koni aba yase ya geyagye dayoleho ki ya yikweyi bagye kokame, kpowe ko dikpiye. Ake gboshu ko tase abo ko shimu kiyo kese bita lo.