1 Oshu bwabo ko Obulus oyikoko ko Oyesu Okristi ipu koyoya ko Owuso kpo Otimoti oyene kaha, 2 gebe ka ayene neshi ni hagye loshu ipu ko Okristi ogya ko Okolosi ni: Owuso Ada kaha na yala oneshi na ki dala omene!

3 Ashotunehe do Owuso, ni wa Ada ka Adole Oyesu Okristi, ipu ki inarigwu ni aba ta ikweyi kala ni. 4 Ikweyi koni apwela kotuse kala ipu ko Oyesu Okristi kpi imu ni ala gbo dase ko Owuso kpiri ni, 5 Otuse kpi imu ni bose bwiyitagye na yi tagye dala ipu kiso kweyi ala kwobonu pwoshu nu ipu kela ko okwokwoshi, ko oshu neshi 6 ni wa dala ni. Ipu kese kpiri oshu neshi mani ya gwa ki ya gye, byoni owe ipu kala bweno ni ala pwo ki gyo oneshi ko Owuso ipu ko okwokwoshi nu kpiri ni. 7 Ala fu bwebe ke Epafara moshi ni awayole dudu ni, ohagye loshu ipu koko ko Okristi okwunu kaha, 8 anu ni ki kela daha ikweyi kimu yoya kala ipu ko Omaku ni. 9 Mani oni, bweno ni apwela ikweyi kala ni, aha bipu ko tinarigwu dala ki ba kado Owuso na yala shini ala nwu kpo ozagyogye kotu nu bwebe koziyi ko Omaku kpo ogyogye nu. 10 Kweyi aha tinarigwu shini ala yawu owe ni ya sha Adole otu owe kpiri ni: Ko gwa ipu koko neshi, ki gye ipu ko ozagyogye ko Owuso, 11 Ala hagye loshu kposhu kala kpiri byoni oshu ki igyashi nu we ni shini ala zotu ki gbotumene 12 kweyi shotunehe da Ada, ni yala shu ko rogwu kpawase neshi ipu kobula kebe yoyu ni. 13 Koni ongmaha shoshu kebe dibu kweyi byaha gobula koyi gotu nu, 14 ipu nu angmaha, ayozalabi kaha rigbaha.

15 Okristi sayi ko Owuso ni aba ma lo ni, Oyi kikyikyo, ni shoko kabo ko Owuso kpiri ni. 16 Bwebe nu Owuso yojoji kpiri, ipu kiso kpo okpagye, oni iyi ma ni kpo oni iyi ma lo ni, ebe, kwo oshu, kwa awose, kwa awoshu kpiri; ayojoji kpiri bwebe nu ki danu. 17 Okristi yaba kwobonu dojoji kpiri, kweyi ojoji kpiri baba dudu ipu nu. 18 Anu pi wikweyi kikpiye nu ni wole ko Owuso ni; anu pi wotu ko olayi kikpiye la, owikyikyo ki wo Oyi kikyikyo ipu kawase ni nyiso bwikwu ni, shini ona gboshu ikweyi ko oza kpiri. 19 Koni osho Owuso otu ko miyinu gyogya ipu ko Oyesu. 20 Kweyi bwebe nu Owuso ya kwikye ojoji wobutu nu, koza kese koza kiso, ko byomene wa bwebe koyi nu ni shonu ikweyi ko oshi sepa ni. 21 Ishi oye ala lenu kpo Owuso ki womonyekwotu nu ikweyi kozabibi ni ala ba ya ni. 22 Anani ke okwikye ala wobutu nu bwebe kikpiye ko Okristi owe kikwu shini ona byala webe nu byawine kotu sere, ni gbofo lo ake ba kwuwepwo lo ni. 23 Owoni ala gohobu ipu ko otuse kala, ki hagye giri, gbo shaga shiyitagye kala ni ala pwo ipu koshu neshi ni lo. Omani pi woshu neshi ni ala pwo ni aki ka doza kpiri ni Owuso ya ese mani, ni ami Obulus woyole nu ni.

24 Anani nyya shotunehe ipu ko owe moma hin ikweyi kala, nki ya yimu shini ipu kikpiye hin na gohobu ko mowe ko Okristi dikpiye nu, ni wase ko Okristi ni. 25 Nwwoyole nu bwebe koleho ni Owuso tun ko kela ko Owuso gyogye dala ni. 26 Oza ni oyi teba dawoyi nekye ni shigbo ni, anani Owuso yi gwa dawa ase nu. 27 Owuso gbo ko yoza ni teba ni gwa dawase ni wase ko Oyahuda lo ni mo, Okristi yipu wo, oya yipu kigyashi ko Owuso. 28 Aba tono dananoho. Aba pyase akpaha ki ba fuwoza kpoziyi wonyonya ni agbo ni, shini ana byananoho wobutu ko Owuso byase ni kwobonu gye ipu ko Okristi ni. 29 Ozani ya ni nyya yoko ni oma, ya takirikwu kpo oshu nu kpiri, ni ya yoko ipu hin ni.