1 Mani oni, ayene hin, nyya yimu kala nwashika kweyi nyya showu ko mala! Ala yotu hin sha kotata, kweyi nyya gwabotu kpala! Ayene hin moshi, ala hagye loshu mani ipu ka Adole.

2 Nyya ba ala Oyodiya kpo Osintikyi ala bagye neshi ka ayine kpi iyikala ipu ka Adole. 3 Kawawo oya ko oko hin kokwokwoshi, nyya yimu shini ota anya mani abo; koni atumabo kotata ko tono ko oshu neshi, kpo Oklemen kpa ashishini ka awoya ko oko hin, ni ayi iye wa ta ipu ko okpa ko olayi ko Owuso ni.

4 Ala shotunehe ipu ka Adole ishi kpiri. Nkyi ya kyanu ya ka: ala shotunehe!

5 Gbotumene kpa ananoho, Adole yawa kwekwe mani. 6 Ala ka byotu ikweyi kojije lo, ipu ki inarigwu kala kpiri, ala do Owuso oka koza ni ala ba yimu ni, doka kpo otunehe ishi kpiri. 7 Kweyi omene ko Owuso, ni sho ogyogye ka asuse kpiri ni, na gbala gbogbo ipu ko otu kpo omaku kala ipu ko Okristi Oyesu.

8 Ogwejeji ayene hin moshi, ala yawoza mani shipu kotu kala: oza ni wako okwokwoshi, oza ni shoshi, oza ni yo gyogye, oza ni gbinyi lo, oza ni wa ki imu, oza ni aba myanu, kpo oza ni aba kanu ni. 9 Ozani ala fu kpoza ni ala nye bwebe hin ni, ala yoko kpanu, kela koka hin, koza yoya hin. Kweyi Owuso ni ya da ase omene ni ya yo kpala.

10 Ipu ko yagye hin ipu ka Adole, owoza kotunehe dami ni itikpi kishi nwashika ala kyi pyishi ko shami mala ba do otose hin ni. Nyya kamo ala nwanyi ami lalo, ala ke pyishi ko sayi nu lo la. 11 Nyya kela mani koni atela hin ni la lo, nkwobonu fu ko shotunehe kpoza ni ngbo ni owe wonyonya. 12 Ngyoza ni owe ni ko yagye ipu ke eha nkyi gyoza ni owe ni ko gboza sheyi gagye. Nfoje ni ase gye lo ni, ko gbotu kpo oza ni ngbo ni, ishi kpiri ipu kowe wonyonya, kun roza yipu kun ya ngmemye, kun gboza nwashika kun gboza titi. 13 Nyya gege ko yojoji bwebe ko Okristi ni dami oshu ni.

14 Oke shoshi shini ala tumabo ipu kotu byobya hin. 15 Ala ase ko Ofilipi, ala gye neneshi mo bwi ikyikyo hin ko tono ko Oshu Neshi, ishini nsho Omakidoniya bita ni, ala fufu kala pini woda ko Owuso ni tumabo ni la; ala fufu kala pini gbingbo ipu ko oza ni nze kpo oza ni nnye ni la. 16 Owi igbo oye lo, ishini nyya doka koza Otesalonika ni, ala toleho da ami. 17 Ala ka ma byo nyya yimu keshi la lo; nke ya yimu shini Owuso na fu manu dala la. 18 Ala peshi nwashika sheyi gagye dami, osho oza ni nyya doka ni. Epafroditus bye eshi kala kpiri wa da ami. Olema byo oza kpehe ni aze eshi do Owuso ni, eshi popa ni Owuso nye koni oshotu ni. 19 Owuso hin ya dala ojoji ni ala ba doka ni bwipu ko odu nu ni sheyi gagye ni bwebe ko Okristi Oyesu. 20 Igyashi wa ko Owuso Ada kaha ko gbogbo-gbogbo! Nalemani

21 Nyya tase ko Owuso kpiri ni wase ko Okristi Oyesu ni ogbogba. Ayene ni bebeni kpa ami ni ba talogbogba. 22 Ase ko Owuso kpiri ni bebeni ba tala ogbogba, otata wase ki ipwole ko Ose Okesa. 23 Nyya beshi ka Adole Oyesu Okristi na yo kpa ala kpiri. Nalemani.