1 Gwejeji, ayene hin, ala shotunehe da Adole. Nyya nwa ko kyo oza ni nta dala ni ta lo ikweyi koni oza mani ya gbeho kala. 2 Ala gbera kpa awiwo, awo yoza bibi, awase ni ba shebe kase tola ni. 3 Aha pini wofu shoshe la, kweyi aha ba geyagye do Owuso ipu ko Omaku nu, ni shotunehe ipu ko Okristi Oyesu, aha yowada kpi imya kofu shoshe lo, olayi kaha gyotuse kaha ipu ko Okristi Oyesu. 4 Koni ami abiyun ya totusiyun kpo oza ni nyya ni. Owoni ashe ya totusa asuse, ami gbo oza ko yotuso ni sho oni ni. 5 Nshofu ishini ngyo obize oye ni, amun okpagye ki Izrayila ipu ko ose ko Obenjami. Ene hin kpa ada hin wase ki Oyahuda, ami ki wo Oyahuda. Owoni owa ko gboso ono kase ko Oyahuda ami ya gbera ko gboso ono kpiri koni ami wikpo ko Ofarasi ni. 6 Kweyi nyya do oda ko Owuso egye koni nyya gboso ono kase ko Oyahuda sheyi gagye. Owa ko gboso ono ko Oyahuda ami wa kikyikyo ashishe ya pyowe ko kwume epwo lo. 7 Kpiri ka awoza mani ke nyyuwa ka wa abola ebe hin, nabani awoza mani nwwa gye kamo awoza yeye ikweyi ko Okristi 8 Kpiri kawoza mani kin la lo, nwanyi ko oza kpiri ikweyi koza ni nmo shoshi ikweyi ko Okristi Oyesu Adole hin. Ikweyi nu nyya woza mani kpiri shonu 9 nyya mani, shini na rema kpa anu. Ami wa aseneshi ebe ko Owuso kelo ikweyi koni nyya gboso ono ni, Owuso ke yun wase neshi bwebe ko otuse do Oyesu Okristi. 10 Oza ni nyya yimu nabani kpiri wako gyo Okristi, kpo oshu ko nyiso amiri nu shini ami na mowe byanu na ki gekwu byanu gekwu ni, 11 nyyi iyitagye mo ami wa nyiso amiri ko gbo olayi kweyi na ki showu.

12 Nyya kamo nkwobonu yi pye kwe nggya wa lo. Nyya takirikwu ko pya abola ni Okristi Oyesu kwobonu rogwa hin diyinu ni. 13 Ayene hin, okwokwoshi ngye mun re wa lo. Oje kponu ni nke yaya ni, nyya nwanyi kpo oza kpiri ni shigbo ni, nyya tikpo ko pyoza ni yohobu ni. 14 Mani oni, nyya nyinya tiriri shini na pya abola, ni Owuso yumo ogwu bwebe ko Okristi Oyesu ko gbo olayi iso.

15 Kpiri kaha ni gye ipu kotuse ni ahan gbe edo kotu oye kponu owoni ashishini kala gbotu oye gogo, Owuso ya yala ba gyoza mani neneshi. 16 Kole mojoji, ahan yabo byoza aha kwobonu pye ni.

17 Ala gba ami, ayene hin. Ala zakpaha da ase ni ba kowe ni ashala ni. 18 Nkela mani dala ishi nwashika, anani nkyi ya ka dala kpi ize iyi: ase nwashika, bwebe koza yoya wa, awo omonyekwotu ki ikwu ko Okristi ikweyi koshi. 19 Okweyi wa wole kola, ikweyi koni ipu wa pini wowuso wa la. Aba gwakya kpo oza ni woza kiweyi ni, kweyi aba yela kiyo kese mani kin. 20 Aha ke wayi kole ki iso la, kweyi aba gbeyi ko owowa kino ngmaha Adole Oyesu Okristi ni yawa bwiso ni. 21 Oya yi ikpiye kaha ni ya gekwu ni pya kweyi ya yuwa ba le bya akakanu. Oya yoko kpo oshu nu ni yoya gege ko kpogwu kojoji ni.