1 Owoni olayi wo ipu ko Okristi totugbagba, kweyi imu ko Okristi yotu kala sha, ala ba rema kpo Omaku, kweyi ala ba gbotu mene kpi iyinyinyi kiyikala. 2 Mani oni nyya bala, ala yun na shotunehe kpiri-kpiri, otu kala na woye, imu kala na woye, omaku kala kpotu kala na woye kponu. 3 Ka yojije kimu kiyo kwa ako gwakya kpanu lo, ka zikweyi iso lo, zase ashini mo asho. 4 Ka yoza ikweyi koneshi kiyo kin lo, ke yoza ikweyi koneshi kase ashini mamani. 5 Arinya wo na woye kponu kpa ko Okristi Oyesu:

6 Ni le byoni Owuso we ni,

oke zo gyogye nu kpo Owuso wojije lo.

7 Abishi koni, okyogwu sho ojoji kpiri ni ogbo ni bita,

kweyi ziyinu byo oshe.

Owa bya asuse,

kweyi bose wese byasuse.

8 Ozikweyi iso lo kweyi oyipu ko geyagye gbishini ogekwu.

Ikwu ni okyogwu ma anayo poshi ni.

9 Oza ni ya ni Owuso ngga anu sha ananaho kweyi odanu iye ni shiye kpiri ni

10 Ni olema oni, ipu ki iye ko Oyesu,

oza kpiri ni biso, kpo oni yo okpagye ni, kpo ni ba alekwu ni ba geyagye do Oyesu,

11 igbenu kpiri ba kamo Oyesu Okristi wa Adole,

ebe ki igyashi ko Owuso Ada.

12 Ni olemani oni ala ayene hin moshi, byo ni ala ba geyagye dami ishini kpiri ni, onaka wishi ni nyyo kpa ala lo ni, ishi mani ke, oshoshi shini ala geyagye dami ni nyyo ni kpa ala kelo ni. Ala gohobu kpo geyagye kpo oshi shini ala ngmiyi kala, 13 ikweyi koni Owuso oya yoko kpa awo kweyi yo sho yimu ko geyagye doza ni oya yimu shini oya ni.

14 Ala ka yoza ipu ka akyose kwe awashu tota lo, 15 shini ala ka gbepwo kwi inyi lo byoni ala wayi ko Owuso gyogye ni bese kawase ni yishi kpoza labi ni. Ala yu ipu wa byi inyiwo ni ba yu akpa ni, 16 byoni ala ba dawo oleho ko olayi ni. Owoni ala ya mani, nyya gwabotu kpa ala Eno ko Okristi, oya shiya ase mo otakirikwu hin kpoko hin wo oyeye lo.

17 Ko owoni aba yun ngmo kweyi yo oyi hin tu shonu byinyi ni otuse kala ya peshi do Owuso ni, otu hin yasha kweyi nyya shotunehe kpala kpiri. 18 Mani oni, owotiri shini otu kala na sha kpa ami mamani.

19 Owoni Adole kyogwu, nyya to Otimoti oleho ebe kala papa, shini na byotu gbagba ishini npwo oshu ikweyi kala. 20 Anu fufunu pini gbotu oyekponu kpami la, kweyi oya dotose kala kwokwoshi. 21 Ananoho ba yela kiyiwa kin la, wela ko Oyesu Okristi lalo. 22 Ala abiyikala gye mo Otimoti sayi ka arinya neshi, ami kpanu yoko dudu byo oyi kpa ada, ikweyi ko oshu neshi. 23 Mani oni nyya yimu ko toleho ebe kala ishini nmoza ni oya we ebe hin ni. 24 Kweyi nki ya totusa Adole mami abiyun ya gege ya webe kala kwekwe mani. 25 Nke ma mo oya shoshi shini na to oyene kaha ke Epafroditus oleho ebe kala, anu ni yoko kweyi ki kpefu dudu kpami kweyi ki wo oyoleho kala ni ala yo wa tumabo ni. 26 Oya yimu ko mala kpiri kweyi otu nu bya koni ala pwo mo oya gbere ni. 27 Kokwokwoshi ogbere byo oya gekwu oni. Owuso ke miyinyinyi nu, anu fufunu lalo, omiyinyinyi hin mamani, kweyi oyotu byobya nyakwu bize shun. 28 Oni ki wo otata koza ni yun ya yimu ko toleho ebe kala ni, shini otu kala na ki sha ishini ala mo, kweyi otu byobya hin ya kweyi. 29 Ala zo kpo otushosha, byo oyene ipu ka Adole. Ala geyagye dase kpiri ni le byanu ni, 30 koni oyiyinu dikwu byo oya gekwu oni ikweyi koko ko Okristi, shini ona tumabo, owe ni ala gege lo ni.