1 Bwebe ko Obulus kpo Otimoti, ayole ko Okristi Oyesu

Gebe kase ko Owuso kpiri okpagye ko Ofilipi, kpa anyakwase kpa awase ni ba yo oko tuwa abo ni. 2 Oneshi kpo omene da ala bwebe ko Owuso Ada ka aha kpo Adole Oyesu Okristi.

3 Nyya shotunehe do Owuso ishi kpiri ni nrela kala; 4 ipu kishi kpiri ni nyya tinarigwu dala, nyya tinarigwu kpo otunehe 5 ikweyi koni ala tumabo ko tono ko oshu neshi bweno kikyikyo wishi mani. 6 Mani oni ngye mo Owuso ni kwotu ko oko neshi mani ipu kala ni, oya gohobu kpa anu gbe eno ko Okristi Oyesu. 7 Oshoshi shini nabi rela kala kpiri, koni ela kala yipu kotu hin ni; koni kpiri kala baba kpa ami anani ni ayun shetu ni kpi ishini ayun shetu walo ni, ala hagye loshu kpa ami ipu ko oneshi ko Owuso. 8 Owuso wo olobene hin mun kokwokwoshi dala ikweyi kimu ni ngbo dala kpiri ni, ni bwotu ko Okristi Oyesu abiyinu.

9 Inarigwu hin pini yoma: imu kala na gye gohobu ipu ko gyogye kokwokwoshi kpo gyoza oyoya neneshi, 10 omani ya talabo ko shoza ni shoshi ni. Shini ala bose sho ozalabi shini ala ka gbepwo lo Eno ko Okristi. 11 Olayi kala ya wo olayi neshi ni Oyesu Okristi fufunu yama ni shini ase na migyashi nu kweyi sho Owuso iye.

12 Nabani nyya yimu shala gye, ayene, oza ni tami ni yo oshu neshi gohobu. 13 Ikweyi koni, kawo gbeho kole ko ose, kpa ashishini kase gye mo ayun shetu ikweyi koni nwwo yole ko Okristi ni la. 14 Oda ko shetu ni nyyanu ni ya ayene nwashika ipu ko Adole pyo oshu kweyi tono kela ko Owuso gboshi lo. 15 Owo kwokwoshi ashini wa ba tono ko Okristi ikweyi kanya yoya kpa apwo gbogbo la, ashini wa ke ba ya kpotu neshi. 16 Aya mani ipu kimu, ikweyi koni agye mo ayun shetu ikweyi ko hagye doshu neshi la. 17 Ashini ba tono ko Okristi kpo okwokwoshi la lo, aba ikweyi kiyiwa la; aba mamo aba bwela manu dami ipu ko oruduru la.

18 Owoza kepwo lo! Nshotunehe ikweyi koni atono kela ko Okristi, ka abwowe neshi, ka abwowe labi. Kweyi nyya gohobu ko shotunehe, 19 ikweyi koni ngye mo bwebe ki inarigwu kala kpa abo tota bwebe ko Omaku ko Oyesu Okristi, aba yun ngma. 20 Otu hin ya yimu nki totuse mo nyya zigbo ipu koko hin lo, ipu kishi kpiri ke, ka anani, nyya yoshi lo, shini ikpiye hin kpiri na geyagye do Okristi, kwun gbo olayi kwun gekwu. 21 Koni ebe hin, owoni ngbo olayi owo Okristi la, owoni ngekwu owa abola la. 22 Owoni nke gohobu ko yiyi nyya gohobu ko yoko neshi, nggyonya ni nyya shu ipu nu lo. 23 Otu hin kepa. Nyya yimu ko sho olayi mani bita na ga yagye kpo Okristi, oni ya shoshi she; 24 oke ya shoshi shoshe dala shini na yiyi. 25 Ngye mani, mani oni ngye mo nyya yiyi. Nyya yagye kpala kpiri, shini ala gohobu ki gbo otushosha ipu kotuse, 26 shini owoni nki yo kpala, ala ba gboza ni ala ki ba gwabotu kpami ipu koyagye kala ipu ko Okristi Oyesu.

27 Anani, oza yoya kala na shoshi gyogye kpo oshu neshi ko Okristi, shini, kun wa mala, kun wa mala lo, nyya pwoshu kala mala hagye loshu kpotu oyekponu ba nonu dudu do otuse ko oshu neshi. 28 Ala ka yoshi ko omonyekwotu kala lo; ala hagye loshu ishi kpiri, omani ya sayi dawa maba zigbo kweyi ala ba rogwa, ikweyi koni Owuso pini ya yala ba rogwa la. 29 Owuso dala ishi ko yoko do Okristi, wa ko kyogwu kpanu kin la lo, ka ko mowe danu. 30 Nabani ala wa shan kpefu dudu. Efu ni ala mun ya kpo nekye-nekye ni, kweyi byoni ala pwo ni, ntayayo ya kpefu mani kwikyikyeni.