1 Owuso shaliyi bwikwu wo olayi kpo Okristi ni, ala yotu kala sawoza ni biso, ebe ni Okristi yagye abore ko Owuso ni. 2 Ala yotu kala sawoza ni biso ni, woza kese mani la lo. 3 Koni ala kwobonu gekwu wa, kweyi anani olayi kala teba kpo Okristi ipu ko Owuso. 4 Ishini Okristi, ni wo olayi kala ni bose, ala ba bose kpanu mamani ipu kigyashi nu.

5 Mani oni, ala yojoji ni wi imu kikpiye kala ni yi ngmo, awoza mani wo: eba boba, inyi, imu kiyi, imu ki ikpiye, kpimu kiyo kese, kpa afuyoya (afuyoya kpo geyagye deka woje kponu la). 6 Ikweyi kawoza mani, anya ko Owuso ya wa ikweyi kawase ni geyagye danu lo ni. 7 Ishi oye ala ba yawoza mani, ipu ko olayi kala nekye. 8 Anani oke wotiri ko yawoza mani kpiri shonu: anyakyokye, otuyoya, fokwunu, yasishi, kpela susu ko bose bwokwunu kala. 9 Ala ka kokame diyikala lo, koni ala kwobonu yikpiye kala nekye kpo ozayoya nu ngma wa 10 ala ki shikpiye pepe wa, ni kwikye wo pepe ipu ko gyogye ipu ko oyi ka Ase ni yo ni. 11 Mani oni ela kase ni wo Oyahuda lo ni kwe ase ni wo Oyahuda yaba lo; ela kase ni shofu kwe ela kase ni shofu lo ni yaba lo; kase ni gwiyi kase ni gwiyi lo, ko oshe, kase ni yabo kiyinu, Okristi wo ojoji, kweyi ki yipu ko ojoji.

12 Mani oni, ala wase ni Owuso shu, ase sere ni oyimu ni, ala shoshiye kiyinyinyi, kpotu neshi, kpi ikweyi bagye, kpo otumene ki kpo otuzoze. 13 Ala gbotu kpi iyikala kweyi anya ni ala gbo kpi iyikala kpiri ala rigbiyi kala. Ala rigbiyi kala byoni Adole rigbala ni. 14 Kweyi oni sharinya neshi mani kpiri ni, ala ki yimu yoya manu, imu ni kpuwa gbayi kpiri ipu ko dudu neshi ni. 15 Ala yo omene ko Okristi na wo ose ipu kotu kala, byoni ala bipu kikpiye oye kponu ni ayalogwu gipu ko omene. Kweyi ala bi shotunehe. 16 Ala yela ko Okristi na yagye ipu ka ala neneshi ishini ala ba fu ki ba diyikala ela kpo oziyi kpiri ni. Ala wigye ko Odawuda, kpi igye tota, kpi igye sere ko Owuso, kweyi ala wigye kpanu shotunehe do Owuso ipu ko otu kala. 17 Kweyi oza ni ala ba ya kpiri, ipu kela koka kwe ipu ko za yoya, ala ya ipu ki iye ka Adole Oyesu, ba shotunehe do Owuso Ada iye bwebe nu.

18 Anya loba, ala geyagye dawobu kala, byoni oshoshi koya ipu ka Adole ni.

19 Awoba, ala yimu kanya kala kweyi ala ka yuwa jaja lo.

20 Ayi, oko kala yoma, ala faha kawa ada kpa awene kala ipu kojoji, koni osho Owuso otu mani.

21 Awada kpa awene, ala ka yotu kayi kala na bya lo, lalo ikpiye wa ya sha.

22 Awo oshe, ala faha kawa adole kala kikpiye ipu ko ojoji. Wa kishi ni iyi wa bi ikpiye kala kwe shini ala shuwotu lalo, ala ke ya kpotu oye kponu ki kpo oshi ka Adole. 23 Ojoji ni ala ba ya, ala yoko ipu nu kpo otu oyekponu, byala ba yoko da Adole la, wasuse lalo. 24 Koni ala gye mala ba wa rogwu bwebe ka Adole okwunu kabola kala. Adole Okristi pini ala ba gbeshe danu la. 25 Kpiri kase ni yobibi aba sanu ore kpo obibi nu, Owuso ya yimu kashe shashe ipu kepwo koka nu lo.