1 Awadole, ala byawoshe kala neshi, ikweyi koni ala gye mala gba Adole mamani ipu ki iso.

2 Ala hagye loshu ipu kinarigwu tota, kweyi bagye kpera ba shotunehe do Owuso. 3 Ala tinarigwu daha mamani, Owuso na gwowe doshu kaha, shini an tono koza teba ko Okristi, ni nyyo oruduru ikweyi nu mani. 4 Tinarigwu shini na tono nu neshi, byoni nshu ko ya ni. 5 Ala gbera kpoza ni ala ba ya kpase kese ni; yoko neshi kpishi kpiri ni ala pye ni. 6 Ela koka kala ishi kpiri na wela koneshi, ki lonye byonwa shini ala gishi ko kyogwu kela dananoho.

7 Otayikyikwus ni woyene kaha moshi ni ya koshu kpiri ikweyi hin ya dala, owoya koko kaha ni ya yoko nu kwokwoshi ni, ki woye ipu kaha ayole ipu ka Adole. 8 Nyya toleho ebe kala shini ala gyoza ni aha bipu nu ni, shini ona ki talotugbagba. 9 Oya wa kpo Onesimus, oyene kaha moshi ni gbokwokwoshi, ni woye ipu kala ni. Aba kojoji niya gbodagye ebeni dala. 10 Aristakus, ni yoruduru kpami ni ya talogbogba, Omarkus oyene ko Obarnabas ya talogbogba mamani. Byoni nka dala ikweyi nu ni; owoni owebe kala, ala yomaba. 11 Ojoshuwa ni aba yogwu mo Oyustus ni ya talogbogba. Awa mani kin pi wa Ase ko Oyahuda ipu kase ni ba yoko kobula ko Owuso kpami ni la, kweyi ashinyi shosha shumotu kotata. 12 Epafara ni woye ipu kala kweyi ki woyole ko Okristi Oyesu ni ya talogbogba, Ishi kpiri oya takirikwu ipu kinarigwu tota dala, shini ala hagye giri ipu koza kpiri ni Owuso ya yimu ni, shini ala gye ki kyogwu otu oye kponu. 13 Nyyolobene nu moya yoko loshu dala kpawase ni bo Olawudikiya kpo Ohirapolis ni. 14 Oyene hin Oluka ni woloboshi ni kpo Odemas ba talogbogba. 15 Ala tayene ni bo Olawudikiya ni ogbogba dami, ala ki to Onimfa kpogbayi kayene ni bole nu ni ogbogba.

16 Ishini ala mokpa mani kweyi, ala toleho kpanu gogbayi kayene ko Olawudikiya shini ana ma. Kweyi ala ki molamu ni aba biwa bwo Olawudikiya ni.

17 Ala ka da Arkipus mo, <<Takirikwu shini oma mo oyoshishini koko ni adawo ipu ka Adole ni ya kweyi.>>

18 Ami Obulus togbogba mani abo hin. Ala ka nwanyi mo nyyo oruduru lo! Nyya beshi ko Owuso na yo kpala.