Milagres de Jesus

Yesu kowahonya pfifita weli

27 Yesu koka kulawa hanu ahala; na hayang’ali kamzila pfipofu weli wamuwinza, akuno wokemelela, "Utwonele libatsi, ghwemwana wa Daudi!"

28 Yesu hayapfikile kung’anda, wapfipofu awala wamghendela; Yesu kawaghutsa, "Apfi mwoamini kuwa nene nodaha kuwahonya?" Wedika,

"Ona, ghwe Mtwatsa!"

29 Kuya kakinda tsinenge tsawo, kalonga, "Iwalawile kama pfamuamini!" 30 Bahala tsinenge tsawo tsidaha ukwona. Yesu kawaghoma ghendo, kalonga, "Mwalangitse, munu wowose yaleke kumanya aghano." 31 Lekeni wawo woka, wenetsa tsimbuli tsake mna isi aila yose.

Yesu kowahonetsa pfifita weli

29 Yesu ne iwanang’ina wake hawang’ali wakuka Yeriko, iwanu wengi tsawamuwinza. 30 Pfifita weli iwang’ali wokala mmbalimbali mwe inzila hawahulike Yesu kobita, wandusa kukemelela, "Imtwatsa, Mwana wa Daudi, utwonele libatsi!"

31 Iwanu wawakembela wawalongela wanyamale, lekeni waghendelela kukemelela, "Imtwatsa, Mwana wa Daudi utwonele libatsi!"

32 Yesu kema, kawakema kawaghutsa, "Mwobama niwatendele choni?"

33 Wamwidika, "Imtwatsa, twobama twone!"

34 Yesu kawonela libatsi, katsikinda nenge tsawo, bahala wadaha ukwona, nawo wamuwinza.

Yesu komuhonetsa ichifita ako Betisaida.

22 Tsawapfika Betisaida, iwanu wangi wamghalila Yesu ichifita, wamlomba amkinde. 23 Kamkinda ghumoko ichifita yula, kamlapfa kunze kwe chijiji. Kuya kambwalulila ghamate mnenge, kamwikila ghamoko ghake, kamghutsa, "Kwodaha kwona ichinu chochose?"

24 Imunu ayo kalola kuya kalonga, "Nakwona iwanu, wakoneka ka imibiki itsunguluka."

25 Yesu keka keli ghamoko mne tsinenge tse imunu ayo. Kuya tsinenge tsake tsifughuka, naye kona pfinoghile ipfinu pfose. 26 Yesu kamlongela aghende ukaye yake na kamghoma kwingila mne ipfijiji na kuwalongela iwanu.

Yesu komuhonetsa imunu iyali chitsiwi na chibubu.

31 Kuya Yesu koka mne ghumji ghwa Tiro, kaghenda Galilaya kwa kubitila Sidoni na mne ghumji ghwa Dekapoli. 32 Iwanu wangi wamghalila imunu chitsiwi na iyang’adahile bae ukulonga pfinoghile, wamlomba Yesu amwikile ghamoko imunu ayo. 33 Apfo Yesu kamseghetsa imunu ayo hambali ne iwanu. Keka pfidole pfake mne ghamaghutwi ghe imunu ayo. Kuya kabwalula ghamate na kaludonza lulimi lwake. 34 Yesu kalola kulanga, kahumula kwe ingupfu, kamlongela imunu ayo, "Epfata," (mana yake, "Ghubuka!").

35 Bahala ghamaghutwi ghe imunu yula ghaghubuka, lulimi lwake luleghela, kandusa kulonga pfinoghile. 36 Kuya Yesu kawalaghitsa waleke kumlongela imunu wowose. Lekeni ka pfayaghendelele kuwaghoma, waghendelela kulalatsa mbuli ayo. 37 Iwanu wakangawala ghendo. Walonga, "Katenda ghoya chila ichinu. Hata pfitsiwi kowatenda wahulike, na pfibubu walonge!"

Yesu komuhonetsa ichifita Batimayo

46 Kuya wapfika Yeriko, Yesu ne iwanang’ina wake hamwe na kingili lye iwanu hawang’ali wakuka mne ghumji, ichifita yumwe iyakemighwe Batimayo imwana wa Timayo kakala mmbalimbali mwe inzila kolomba. 47 Naye hayahulike Yesu Mnatsareti kobita, kandusa kukemelela, "Yesu, Imwana wa Daudi! Mbonele libatsi."

48 Iwanu wengi wamkembela, wamlongela yenyamale, lekeni kaghendelela kukema, "Imwana wa Daudi, mbonele libatsi!"

49 Yesu kema, kalonga, "Mlongeleni yatse." Apfo wamkema, wamlongela, "Wighangamitse! Winuke kokukema."

50 Kalyasa lighwanda lyake, kadaluka kamghendela Yesu.

51 Yesu kamghutsa, "Kwobama nikutendele choni?"

Ichifita ayo kamwidika, "Mlangulitsi, nobama kwona."

52 Yesu kamlongela, "Ghenda, ukutoghola kwako kukuhonetsa."

Bahala kadaha kwona, kuya kamuwinza Yesu mnzila.

Yesu komuhonetsa ichifita

35 Yesu hapfikile habehi na Yeriko, imunu yumwe ichifita tsakakala mmbalimbali mwe inzila kolomba. 36 Haulike iwanu wobita, kaghutsa, "kuna choni?" 37 Wamlongela, "Yesu wa Natsareti kobita."

38 Naye kakemelela, "Yesu, Mtsukulu wa Daudi, mbonele libatsi!"

39 Wanu wala iwalongole wamkembela wamlongela anyamale, lekeni yeye kaghendelela kukemelela, "Mtsukulu wa Daudi, mbonele libatsi!"

40 Yesu kema kalaghitsa wamghale imunu ayo hana yeye. Hapfikile habehi, Yesu kamghutsa, 41 "Kwobama nikutendele choni?"

Kedika, "IMNDEWA, nobama mbone."

42 Yesu kamlongela, "Wone! Kutoghola kwako kukuhonetsa!"

43 Bahala ichifita ayo kadaha kona, kamuwinza Yesu, aku komtunya Imulungu. Iwanu wose hawonile apfo, nawo pfipfila wamtunya Imulungu.

Yesu komhonya imunu iyelekighwe chifita

1 Yesu hayang’ali yoluta, kamwona munu chifita kulawa ukwelekighwa kwake. 2 Wanafunzi wake wamghutsa, "Mlangulitsi, yuhi iyatendile nzambi, mbaka imunu ayuno yelekighwe chifita, imunu ayuno au iwamweleke?"

3 Yesu kawedika, "Si imunu ayuno, wala iwamweleke baye iwatendile nzambi, lekeni ilawila apfino ili tsisang’ano tsa Imlungu tsoneke mna ugima wake. 4 Twobamighwa kusang’ana tsing’onde tsa ayula iyanitumile hakung’ali misi. Chilo chakutsa ng’akutsakuwa na munu iyodaha kusang’ana baye. 5 Hanili muisi, nene na ghumwanga ghwa isi."

6 Hayamalitse ukulonga apfo, kabwalula ghamate mna lidongo, kapfulugha kododo kwa ghamate aghala, kambaka ichifita mna tsinenge, 7 kamlongela, "Ghenda ukehopfughe kuna litsimbu lya Siloamu" (Siloamu mana yake "Iyatumighwe"). Apfo imunu ayula koka kaghenda kwihopfugha, kuya koya aku kakona.

2 Baho, munu yumwe yana ukoma kamghendela, kamwinamila hambele hake, kamlongela, "Ghwemtwatsa, ung’abama, kwodaha kunitenda nideghete." 3 Yesu kagholosa ghumoko ghwake, kamkinda imunu ayo, kalonga, "Nobama, haya udeghete!" Bahala imunu ayula kadegheta ukoma wake. 4 Kuya Yesu kamlongela, "Lola, uleke kumlongela munu wowose; ila ghenda wikelanguse kwa mlapfa nambiko; kuya ulapfe inambiko iyalaghitse Musa, ili iwe ukalangama kuna wawo."

2 Baho, wamghalila imunu iyaholole kawasa mchilagho. Yesu hayonile ukutoghola kwawo, kamlongela imunu ayula iyaholole, "Ughumighwe ghumoyo mwanangu, nzambi tsako tsileghusighwa."

3 Bahala waandishi wangi wa Ghamalaghitso welongela. "Imunu ayuno komligha Imlungu."

4 Naye Yesu kamanya achila chawang’ali wofikitsa, apfo kawaghutsa, "Hebali mfikitsa ighehile mna imimoyo yenu? 5 Chihi ichibewe, ukulonga, ‘Nzambi tsako tsileghusighwa,’ au ukulonga, ‘Inuka uke’? 6 Lelo mwobamighwa mmanye kuwa Imwana wa Adamu kana uwetso muisi wa kuwaleghusila nzambi iwanu." Kuya kamlongela imunu iyaholole, "Inuka, usole ichilagho chako, uke ukaye yako!"

7 Baho imunu ayula kenuka, koka ukaye yake.

10 baho tsakukala na munu yumwe yana ghumoko ighuholole. Wamghutsa, walonga, "Apfi ng’aighomighwa baye kumhonetsa imunu mna litsuwa lya Sabato?" Wamghutsa apfo ili wapate imbuli ya ukumghoghela.

11 Kawalongela, "Apfi munu yuhi kuna mwemwe yana ing’olo yumwe, na ing’olio ayo yang’engila mwipondo mna Litsuwa lya Sabato, yang’atsomkwegha yamlapfe kunze?" 12 Imunu kana samani kubita ing’olo mala ngapi? Apfo ng’aighomighwa baye kutenda ighanoghile mna litsuwa lya Sabato. 13 Kuya kamlongela imunu ayula, "Gholosa ghumoko ghwako." Kaghugholosa, nagho ghuhona, ghuwa mgima kama ghumoko ghwake ghungi.

30 Mai mkwe wa Simoni tsakakala kawasa mlusatsi koghula lihoma. Yesu hayapfikile, wamlongela mbuli tse ipinga ayo. 31 Kamghendela, kamkinda ghumoko kamwinula. Utamu umlawa, kandusa kuwatumikila.

Yesu komuhonetsa imunu iyoghula ukoma

40 Imunu yumwe iyoghula ukoma tsakamghendela Yesu. Kamtowela ghamaghoti kamlomba, kalonga, "Ung’abama, kwodaha kunideghetesa." Ukoma tsaukala utamu iumghoma imunu kumlomba Imulungu, kwaapfila imunu yane utamu awo tsakakala keha.

41 Yesu kamwonela libatsi imunu ayo, kagholosa ghumoko ghwake, kamkinda. Kuya kalonga, "Nobama, degheta!" 42 Bahala utamu umlawa, kahona.

3 Baho iwanu wane wapfika, wambapa imunu iyaholole wamghalila Yesu. 4 Kwaapfila iwanu tsa wengi, ng’awadahile bae kumghala habehi na Yesu. Apfo watobola mchiswili, kuchanya mwe hanu hayakalile Yesu. Baho, wamhulumsa imunu ayo iyawasile mchilagho. 5 Yesu honile ukutoghola kwawo, kamlongela imunu ayo iyaholole, "Mwanangu, nzambi tsako tsileghusighwa."

6 Wangi we iwolangulitsa Ghamalaghitso gha Musa iwakalile baho weghutsa mne imimoyo yawo, 7 "Angu ichinu chachi ichimtenda alonge pfino? Komligha Imulungu. Imulungu yaliyeka iyo iyodaha kuleghusa nzambi!"

8 Bahala Yesu kamanya achila chawang’ali wokwalangula mne imimoyo yawo, kawalongela, "Ebali mwakwalangula ipfinu pfino? 9 Chihi chibewe, kumlongela imunu iyaholole, ‘Nzambi tsako tsileghusighwa,’ au kumlongela, ‘Winuke, usole chilagho chako ughende’? 10 Nobama mmanye ka Imwana we Imunu kana uwetso wa kuleghusa nzambi muisi." Baho kamlongela imunu yaholole, 11 "Nokulongela, winuke, usole chilagho chako uke ukaye!"

12 Naye kenuka, kasola chilagho chake kaghenda aku iwanu wose womlola. Iwanu wose tsawakangawala, wamtunya Imulungu, walonga, "Ng’ana twone ghendo ichinu ka chino!"

Yesu komuhonetsa imunu yane ghumoko ighuholole

1 Kuya Yesu kaghenda keli mne ing’anda ye ukulombela. Aho kukala ne imunu yane ghumoko ighuholole. 2 Iwanu wamwenga wang’ali wobama imbuli ya kumghoghela Yesu. Apfo wamlolesa ka ang’amhonetse imunu ayo mne Litsuwa lya Sabato. 3 Yesu kamlongela imunu ayo, "Utse hano hambele." 4 Kuya kawaghutsa iwanu, "Apfi chihi chinoghile cha kutenda mna litsuwa lya Sabato, kutenda ghanoghile au ghehile? Kuukombola ughima au kuukoma?" Lekeni wawo ng’awalongile chinu chochose bae.

5 Kawalolesa iwanu kwa maya, baho kona usungu mmoyo mwake, kwa usughu we imimoyo yawo. Kuya kamlongela imunu yula, "Ugholose ghumoko ghwako." Naye kaghugholosa, na ghumoko ghwake ghuhona.

Yesu komuhonetsa imunu

12 Yesu hang’ali mne ghumji ghumwe, tsakatsa imunu yane ukoma lukuli lwose. Imtamu ayo hamwonile Yesu, keghwisa hasi, kalomba "IMNDEWA, ka kwobama, kwodaha kunitenda nihone!"

13 Yesu kagholosa ghumoko, kamkinda, kalonga, "Nobama; Uhone!" Bahala ukoma umlawa.

18 Iwanu wangi wapfika, wamduta machela mne lutsatsi imunu yaholole, wabama wamghale mng’anda, hambele ha Yesu. 19 Lekeni ng’awadahile bae, kwaapfila tsahana iwanu wengi sideke. Apfo wamghala, wamwika mchiswili, wafumla kuya wahulumsa machela mbaka haghatighati he iwanu awo, hayali Yesu. 20 Yesu honile ukutoghola kwawo, kamlongela imunu yaholole, "Sale yangu, nzambi tsako tsileghusighwa."

21 Iwolangulitsa Ghamalaghitso na Mafarisayo wandusa kwighutsa, "Ayuno imunu wachi iyomligha Imulungu? Yuhi iyodaha kuleghusa nzambi? Angu si Imulungu yaliyeka iyodaha kuleghusa nzambi!" 22 Yesu kamanya chawang’ali wakwalangula, kawaghutsa, "Mkwalangula choni mne imimoyo yenu? 23 Chihi chibewe; kulonga ‘Nzambi tsako tsileghusighwa’ au kulonga ‘Winuke ughende?’ 24 Nobama mmanye, Imwana we Imunu kana uwetso wa kuleghusa nzambi mne iisi." Apfo kamlongela imunu yaholole, "Nokulongela, winuke usole chilagho chako uye ukaye!" 25 Bahala imunu ayo kenuka hambele hawo, kasola chilagho chake. Koka ukaye yake aku komtunya Imulungu.

Imunu yane ghumoko ghuholole

6 Mne Litsuwa lingi lya Sabato, Yesu tsakaghenda kulangulitsa mne ing’anda ya ukulombela. Mne ing’anda ila ye ukulombela tsakukala ne imunu yaholole ghumoko ghwa ukujila. 7 Iwolangulitsa Ghamalaghitso wangi na Mafarisayo tsawabama imbuli ya kumghoghela Yesu. Apfo wamlolesa ka ang’amuhonetse imunu mne Litsuwa lya Sabato. 8 Lekeni Yesu kamanya chawang’ali wakwalangula, kamlongela imunu ayo yaholole ghumoko, "Utse wime hano." Imunu ayo kenuka, kema hala. 9 Kuya Yesu kawalongela, "Nowaghutseni mwemwe, apfi mna Litsuwa lya Sabato pfinogha kutenda ghanoghile au kutenda ghehile? Kuukombola ughima we imunu au kuukoma?" 10 Kawalolesa iwanu wose iwali hala, kuya kamlongela imunu ayo, "Ugholose ghumoko ghwako." Katenda ka Yesu pfamlongele, na ghumoko ghwake ghuhonetsighwa.

Yesu komuhonetsa imtumwa we imkulu wa asikali wa Roma

1 Yesu hayamalitse ukulonga ipfinu pfino kwe iwanu, kaghenda Kaperinaumu. 2 Ako tsakukala ne imkulu yumwe we asikali miya imwe wa Roma, naye kakala ne imtumwa wake iyamnoghele ng’ani. Na imtumwa ayo ang’ali yoghula chidogho yafe. 3 Imkulu ayo hayahulike mbuli tsa Yesu, kawatuma iwabala wangi wa Wayahudi wamlombe Yesu atse amhonetse imtumwa wake. 4 Wamghendela Yesu, wamlomba ng’ani, walonga, "Umwapfile imunu yuno, 5 kwaapfila kowanoghela iwanu wetu, naye iyo iyatutsengele ing’anda ye ukulombela."

6 Apfo Yesu kaghenda nawo. Hapfikile habehi ne ing’anda ye imkulu ayo, imkulu ayo kawatuma sale tsake wamlongele Yesu, "IMNDEWA, uleke kwitsupfa kutsa kuno. Nene sinoghile bae ghweghwe kwingila mng’anda mwangu. 7 Ndo mana tsambona nene sinoghile bae kukutsila ghweghwe. Lekeni ulonge imbuli iliyeka, imtumwa wangu katsohona. 8 Kwaapfila nene imwenyegho na imunu yane ukulu, nina asikali iwali hasi hangu. Ning’amlongela yumwe, ‘Ghenda!’ Naye koghenda, na ning’amlongela yungi, ‘Itsa!’ Naye kakutsa, na ning’amlongela imtumwa wangu, ‘Tenda achino!’ Naye kochitenda."

9 Yesu hahulike apfo, kakangawala, kawahundukila iwanu iwelongotse naye, kawalongela, "Nowalongela ghendo, sina mbone bae imunu iyotoghola ka imunu yuno, hata mne isi ya Isiraeli!" 10 Kuya iwanu wala hawoyile ukaye kwe imkulu wa asikali wa Roma wampfika imtumwa yula kahona.

11 Baho tsahana ipinga yumwe yane ichinyamkela iyamtendile yaghule kwa miyaka kumi na nane. Tsakapfeduka na ng’adahile bae kwigholosa. 12 Yesu hamwonile, kamkema, kamlongela, "Mai kuhonetsighwa utamu wako!" 13 Kuya Yesu kamwikila ghamoko ipinga ayo, bahala kagholoka na kamtunya Imulungu.

Yesu komuhonetsa imunu imtamu

1 Litsuwa limwe lya Sabato, Yesu tsakaghenda kuja mne ing’anda ye imkulu wa Mafarisayo. Iwanu wang’ali wamlolesa ng’ani Yesu. 2 Imunu yapfimbile lukuli kaghenda hambele ha Yesu. 3 Yesu kawaghutsa iwolangulitsa Ghamalaghitso na Mafarisayo, "Apfi pfinogha kumhonetsa imunu mne Litsuwa lya Sabato au ng’apfinoghile bae?"

4 Lekeni ng’awalongile chinu bae. Apfo Yesu kamkinda imtamu ayo, kamhonetsa, kamleka yoke.

Yesu kowahonetsa iwakoma kumi

11 Yesu hang’ali kamnzila koghenda Yerusalemu, kabitila mghati mwa Samariya na Galilaya. 12 Hang’ali yakwingila mne ichijiji chimwe, tsaketingana ne iwakoma kumi, wema kutali. 13 Wakemelela, "Yesu, IMNDEWA, twonele libatsi!"

14 Hawonile kawalongela, "Mghende mkelanguse kwa wakulu we inambiko." Hawang’ali woghenda, tsawahona. 15 Yumwe mna wawo honile kahona, koya kuchughu, aku komtunya Imulungu kwa kukemelela. 16 Keghwisa hasi hane maghulu gha Yesu kamlongela mighede. Ayo tsakakala Msamariya.

17 Yesu kalonga, "Apfi si iwanu kumi bae iwahonile? Lelo awala tisa walikwani? 18 Ng’oneke yungi iyoyile na kumtunya Imulungu ila imhenza ayu aliyeka?" 19 Kuya Yesu kamlongela imunu ayo, "Winuke uke, Ukutoghola kwako kukuhonetsa!"

Yesu komhonya ichimbete

1 Hambele chidogho, hakala na chihungo cha Wayahudi, naye Yesu kagheluka kaghenda Yerusalemu. 2 Ako Yerusalemu, habehi na lilango ilikemighwe Lango lya Wang’olo, tsahana tsimbu ilikemighwe Betizata kwa Chieburaniya, litsimbu alyo tsa litsungulukighwa na pfibwalu pfitano. 3 Mna ipfibwalu apfo wang’ali wowasa wanu wengi iwatamu, pfipofu, pfimbete, na iwanu iwaholole. Awo wang’ali wobeta ghamatsi ghatibulighwe, 4 kwaapfila malaika wa Imtwatsa yang’ali yohulumkagha mna ghamatsi na kughatibula. Imtamu iyakwandusa kwingila mna ghamatsi ighatibulighwe, tsakahonyighwa utamu wo wose uyali nawo. 5 Lelo ahala hakala na munu yumwe iyakalile mtamu kwa miyaka selasini na nane. 6 Yesu hayamwonile imtamu ayo kawasa ahala, aku kamanya ka yang’ali yoghula kwa matsuwa mengi, baho kamghutsa, "Pfii kwobama uhone?"

7 Imtamu ayula kamwidika, "Ghwe Mndewa, nahela munu wa kunyingitsa mna litsimbu ghamatsi haghotibulighwa, hanibama kwingila, munu yungi konongolela."

8 Yesu kamlongela, "Winuke! Sola ichilagho chako uke." 9 Bahala imunu yula kahona, kasola ichilagho chake, koka.

Ichinu achino tsachilawila mna Litsuwa lya Sabato.

46 Kuya Yesu kaghenda keli kuna ghumji ghwa Kana ako Galilaya, hanu ahala hayaghaluse ghamatsi kuwa dipfai. Lelo kukala na chilongotsi yumwe yana imwana iyoghula ako Kaperinaumu. 47 Ichilongotsi ayo hayahulike ka Yesu kapfika ako Galilaya kulawa Yudeya, kamghendela kamlomba yaghende yakamhonye imwanaghe, iyakalile laghalagha mauti.

48 Yesu kamlongela, "Mwemwe ng’amtoghola ghendo baye bila ukwona ipfitango na ipfihulo."

49 Ichilongotsi ayo kamwidika, "Ghwe Mndewa, hulumka hima ng’ana imwanangu yafe." 50 Yesu kamwidika, "Haya uka, imwanagho kahona."

Imunu ayula katoghola alila liyamlongele Yesu, kalawa koka. 51 Hayang’ali kamnzila kohulumka, ketingana na iwatumwa wake, wamlongela ka imwanaghe kahona.

52 Kawaghutsa imwana yahonile saa ngapi, nawo wamlongela, "Jana saa saba nemisi ihoma imleka." 53 Baho baba ayula katanga ka yiyo isaa aila Yesu hayamlongele, "Imwanagho kahona." Apfo kamtoghola Yesu, yeye hamwe na iwanu wose wa ikaye yake.

54 Lelo achino chikala chitango cha keli chayatendile Yesu hayalawile Yudeya kughenda Galilaya.

20 Baho, pinga yumwe iyang’ali yoghula utamu wa kulawa idamu kwa miyaka kumi na mili kamtsila Yesu kuchughu, kakinda lipindo lya ligwanda lyake. 21 Mana tsakelongela imwenyegho mmoyo mwake, "Ning’akinda ligwanda lyake tu, baho nitsohona."

22 Yesu kahunduka kamwona ipinga ayo, kamlongela, "Mwanangu, ughumighwe moyo mkulu! Ukutoghola kwako kukuhonya." Bahala ipinga ayo kahona.

25 Baho tsakukala ne ipinga yumwe yane utamu we kulawa idamu kwa miyaka kumi na mili. 26 Ipinga ayo tsakadununzika ghendo kughenda kwe iwaghanga na kaghisa ipfinu pfake pfose, lekeni ng’apatile ng’apfu bae na kaghendelela kughula. 27 Ipinga ayo hayahulike mbuli tsa Yesu, kabita mne likingili, kamghendela Yesu kwa kuchughu na kukinda ghwanda lyake, 28 na kelongela imwenyegho "Ning’akinda ghwanda lyake nitsohona."

29 Hayakindile lighwanda lyake, bahala idamu ileka kumlawa, naye kamanya mne lukuli lwake ka utamu wake uhona.

43 Pinga yumwe yadununzike kwa utamu wa kulawa idamu kwa miyaka kumi na mili, hata ka tsakaghisa mali tsake tsose kwa waghanga, tsakuduhu imunu yadahile kumhonetsa, tsakakala mne iwanu awo. 44 Pinga ayo tsakatsa kuchisogho kwa Yesu kakinda pindo lya ghwanda lyake. Bahala idamu ileka kumlawa. 45 Yesu kaghutsa, "Angu yuhi yanikindile?"

Iwanu wose wabela. Petiri kalonga, "IMNDEWA, iwanu wakutsunguluka na wakumemela!"

46 Lekeni Yesu kalonga, "Kuna imunu kang’inda, nimanya kwaapfila ngupfu tsangu tsindawa." 47 Ipinga hayonile ng’odaha bae kwipfisa, tsakatsa aku koghudema, keghwisa mmaghulu mwa Yesu. Kamlongela Yesu hambele he iwanu iwali hala ichinu ichimtendile amkinde na bahala pfayahonetsighwe. 48 Yesu kamlongela ipinga ayo, "Mwanangu, ukutoghola kwako kukuhonetsa. Ughende tseghamba."

Imndele iyafile na ipinga imtamu

18 Hayang’ali yowalongela agho, mkulu wa sinagogi yumwe kamghendela, kamwinamila, kalonga, "Mwanangu mndele kafa sambi ghendo; lekeni utse wike ghumoko ghwako mlukuli lwake, naye katsakuwa mgima keli."

19 Yesu kenuka, koka kelongotsa naye, hamwe na iwanafunzi wake.

23 Kuya Yesu kapfika kuna ing’anda ya imkulu ayula wa lisinagogi, naye kona awala iwotowa tsifilimbi, na mtingano ghwa iwanu iwaghanzike; 24 kawalongela, "Mke ahano, imndele ng’afile baye, ila kawasa!" Lekeni wawo wamseka ng’ani. 25 Ghumtingano ghwa iwanu haghulapfighwe kunze, Yesu kengila mng’anda, kamkinda ghumoko, na kamwinula imndele ayula.

22 Kuya imkulu yumwe we ing’anda ya ukulombela iyakemighwe Yairo tsakatsa, hayamwonile Yesu, keghwisa mmaghulu mwake, 23 kamlomba "Imwanangu mdodo pinga koghula ng’ani. Nokulomba utse, umwikile ghamoko ghako ahone na yawe mghima."

24 Apfo Yesu kaghenda naye. Na likingili lye iwanu limuwinza na kumkunughitsa kunughitsa.

38 Hawapfikile mne ing’anda ya Yairo, Yesu tsakona tsogho na kahulika iwanu wolila. 39 Yesu kengila mng’anda kawalongela, "Ebali mwotenda tsogho na kulila? Imwana ng’afile bae ila kawasa."

40 Lekeni wamseka, apfo kawalapfa kunze, kawasola aba na mai wa imwana ayo ne iwanang’ina wake iyakalile nawo, wengila mne chiheleto chawasile imwana. 41 Kamkinda ghumoko kamlongela "Talita kumi," mana yake, "Mwana mdodo pinga, nokulongela lamka!"

42 Bahala imwana kenuka na kandusa kughenda (imwana ayo tsakakala na miyaka kumi na mili). Ichinu achi hachilawile, iwanu wakangawala ghendo.

31 Yesu kaghendelela kulonga, "Apfi iwanu wa mweleko ghuno weghala ne chinu chachi? Weghala na choni? 32 Weghala ne iwana iwakalile kusoko. Wekema wenyegho kwa wenyegho, ‘Tuwatowela chimbeta, ng’ampfinile bae, tuwembila uwila we usungu, ng’amlilile bae!’ 33 Yohane Mbatitsa tsakatsa, ng’ajile bae ichijo na ng’anwile bae imbwali, mwemwe mlonga, ‘Yohane kana chinyamkela!’ 34 Imwana we imunu katsa, kakuja na kakunwa, namwe mlonga, ‘Imunu yuno kakujisa na kopatika sideke, sale wa iwasola kodi na wane nzambi!’ 35 Lekeni ihekima yoneka inogha kwe iwanu wose yawaitoghole."

Ipinga yane nzambi kombaka ghamafuta Yesu

36 Mfarisayo yumwe tsakamkema Yesu atse kuja naye ichijo cha nemihe. Yesu kaghenda mne ing’anda ya Mfarisayo ayo, kakala hasi yaje ichijo. 37 Mne ghumji ghula, tsakukala ne ipinga yane nzambi. Hayahulike Yesu kakuja mne ing’anda ya Mfarisayo ayo, ipinga ayo katsa na ichupa inoghile imemile ghamafuta ighonung’ila ghoya.

41 Kuya katsa imunu yumwe yakemighwe Yairo, iyakalile mkulu we Ing’anda ya ukulombela. Keghwisa mmaghulu mwa Yesu, kamlomba aghende ukaye yake, 42 kwaapfila imwanaghe ipinga nyalimwe yane miyaka kumi na mili yang’ali yobama yafe.

Yesu hayang’ali yoghenda, iwanu wammemela chila hanu.

49 Yesu hang’ali yolonga, tsakatsa imunu kulawa mne ing’anda ya Yairo. Kamlongela Yairo, "Uleke kumtsupfa Imlangulitsi."

50 Lekeni Yesu haulike apfo kamlongela Yairo, "Uleke kupfuka, ghwe toghola na imwanagho katsohonetsighwa."

51 Hapfikile ukaye kwa Yairo, kawaghoma iwanu waleke kwingila naye mng’anda, lekeni Petiri, Yohane, Jakobu, aba wa imwana yula iyafile na mai wake. 52 Wanu wose wang’ali womlila imwana iyafile akuno weyayana. Yesu kawalongela, "Mleke kulila, imwana ng’afile bae, ila kawasa!"

53 Iwanu wose wamseka Yesu kwaapfila tsawamanya imwana kafa. 54 Yesu kaghukinda ghumoko ghwe imwana iyafile, kamlongela, "Mwanangu, lamka!" 55 Imwana iyafile ughima wake umuyila, na bahala kalamka. Kuya Yesu kawalongela wamwing’e imwana yula ichijo. 56 Aba wake na mai wake tsawakangawala, lekeni Yesu kawaghoma kumlongela imunu wowose achila ichilawile.

Lifwa lya Lazaro

1 Lelo munu yumwe iyakemighwe Lazaro tsamtamu. Ayo yang’ali yokala Betaniya, kaye yake Mariya na dada yake Marita. 2 Mariya ayuno tsakakala yuyula iyambakile Imndewa ghamafuta ighonung’ila mmaghulu, na kughabaghusa kwa tsimvili tsake, yuyo ilumbu wake Lazaro iyakalile mtamu. 3 Apfo lumbu tsake wamtumila Yesu usenga, "Ghwe Mndewa, sale yako yumkunda koghula." 4 Yesu hayahulike apfi, kalonga, "Utamu auno si wa lifwa baye, ila ulawila kwa ajili ya utunitso wa Imlungu, ili Imwana wa Imlungu yatunitsighwe kubitila utamu auno." 5 Naye Yesu tsakawakunda Marita, na lumbu lyake, na Lazaro. 6 Yesu hayahulike Lazaro koghula, kongetsa matsuwa meli gha ukukala ahala hayakalile. 7 Kuya Yesu kawalongela wanafunzi wake, "Tukeni keli Yudeya." 8 Wanafunzi wake wamlongela, "Mlangulitsi, matsuwa chidogho ighabitile wapfilongotsi wa Wayahudi wang’ali wobama wakutowe na ghamabwe, heule ubama ughende ako keli?"

9 Yesu kawedika, "Apfi imisi ng’aina masaa kumi na meli baye? Munu yang’anga nemisi ng’ekwala baye kwa apfila koghwona ghumwanga ghwa isi aino. 10 Lekeni imunu yang’anga nechilo kekwala, kwa apfila kahela mwanga mghati mwake." 11 Kaghalonga agho, kuya kaghendelela kuwalongela, "Sale yetu Lazaro kawasa, lekeni nene noghenda nikamlamse."

12 Wanafunzi wake wamwidika, "Ghwemtwatsa, kama kawasa, katsohona." 13 Lekeni Yesu tsayang’ali yolonga imbuli ya ukufa kwa Lazaro, ila wawo wafikitsa kolonga imbuli ya ukuwasa tsinongo. 14 Apfo lelo Yesu kawalongela mwatsimwatsi ghendo, "Lazaro kafa,

Yesu koikembela inyahemu

23 Kuya Yesu kadina mna ghumnumbwi, na iwanafunzi wake wamuwinza. 24 Bahala ilawila nyahemu ng’ulu mna litsimbu, mbaka ghamawimbi ghang’ali ghakwingila mna ghumnumbwi; lekeni Yesu tsakawasa fofofo. 25 Wanafunzi wake wamghendela, wamlamsa, walonga, "Gwemtwatsa, utukombole, twotsama!" 26 Kawedika, "Hebari mpfuka, mwemwe yamli na noghola ndodo?" Kuya kenuka, kaikembela inyahemu na ghamawimbi, baho litsimbu litulia tuli! 27 Iwanu wose wakangawala ghendo, weghutsa, "Angu ayu munu wachi? Hata libeho na ghamawimbi pfose pfomhulikitsa!"

15 Nemihe haipfikile, wanafunzi wake wamghendela, wamlongela, "Hanu ahano nyika iliyeka, na litsuwa liswa, lelo uwaleke iwanu woke waghende mna ipfijiji wakeghulile ipfijo waje." 16 Lekeni Yesu kawalongela, "Ng’awobamighwa woke baye, weng’eni mwemwe ichijo waje."

17 Wamwidika, "Ahano ng’atuna chinu baye, ila pfighate pfitano pfiliyeka, na somba weli."

18 Naye kawalongela, "Ngalileni ahano ipfinu apfo." 19 Kuya kawalaghitsa iwanu wakale hasi mna imitsani. Kasola ipfighate apfila pfitano na wasomba weli, kalola kulanga, kapfibaliki; kapfibena ipfighate apfila, kaweng’a wanafunzi wake, nawo wawagholela iwanu. 20 Iwanu wose waja, weghuta. Na iwanang’ina wake wadondola ipfighate ipfisighale, wamemesa kapo tsimemile kumi na mbili. 21 Nawo iwajile tsawang’ali wopfika wamale elufu tano, bila kupeta wapinga na iwana.

25 Haipfikile nzamu ya kane ya ichilo, habehi na ukucha, Yesu kawaghendela, aku koghenda kwa maghulu mchanya mwa ghamatsi.

Yesu koweng’a ichijo wanu elufu nne

32 Yesu kawakema wanafunzi wake, kawalongela, "Noghwonela libatsi ghumtingano, kwaapfila wakala na nene kwa matsuwa madatu, na wahela chaukuja. Kuya sibama niwaleke woke na inzala baye, hela watsotsilika mnzila."

33 Wanafunzi wake wamghutsa, "Tudaha kupata kwani, kunyika akuno kwatuli, pfighate pfingi pfa kuwetsa kuweng’a ghumtingano ghwose aghuno waje?"

34 Yesu kawaghutsa, "Mna pfighate pfingapi?"

Wamwidika, "Saba na somba wadowado chidogho."

35 Kalaghitsa ghumtingano ghwa iwanu wakale hasi. 36 Kapfisola ipfighate apfila saba na wasomba, kapfibaliki, kapfibena kaweng’a wanafunzi wake, nawo wanafunzi wawagholela iwanu. 37 Wose waja weghuta; wadondola pfihande pfa pfighate ipfisighale pfikapo pfimemile saba. 38 Nawo iwajile wapetighwa, tsaiwamale waliyeka wakala elufu nne, bila kupeta wamapinga na iwana.

Kuliha ikodi ya Ing’anda ya Imlungu

24 Hata hawapfikile Kaperinaumu, iwasola kodi ya lihekalu wamghendela Petiri, wamghutsa, "Apfi imlangulitsi wenu koliha inusu shekeli, ikodi ya lihekalu?"

25 Naye kawedika, "Ona."

Petiri hayengile mng’anda, Yesu kalongola ukumghutsa, "Simoni, ukonatse? Wafalume wa isi wosola kodi au ushulu kwa wanu wachi? Kwa iwanawo au kwa iwahenza?"

26 Petiri kamwidika, "Kwa iwahenza."

Yesu kalonga, "Pfinogha, ka apfo iwana wawo ng’awobamighwa kuliha kodi baye. 27 Lekeni, ili tuleke kuwakwatsa, ghenda kuna litsimbu, wase indoano yako, umsole isomba ayula yulongola kumlowa; na ung’amwasama ghumlomo ghwake kutsakona shekeli. Isole ukaweng’e kwaajili ya ikodi yangu na yako."

Yesu koulighita mbiki

18 Nemitondo lupfilipfili, Yesu hayang’ali kakuya mne ghumji, tsakona inzala. 19 Kaghwona mbiki mmbalimbali mwe inzila, kaghughendela lekeni ng’onile chochose bae ila imitsani iliyeka. Apfo kaghulongela, "Uleke ukweleka keli ghamatunda!" Bahala mbiki ghula ghunyala.

20 Iwanang’ina wake hawonile apfo wakangawala, wamghutsa, "Ule mbiki ghuno ghusumka kunyala?"

21 Yesu kawedika, "Nowalongelani ghendo mng’atoghola na kuleka kwalangula, mwodaha kutenda si achila chiliyeka ichanendile mne mbiki, ila mwodaha kuchilongela chidunda chino, ‘Wibule, wikeyase mwibahali,’ kuya itsakuwa pfipfo. 22 Mng’atoghola, chochose chamlomba mtsobokela."

37 Inyahemu ilawila na ghamawimbi ghautowa mnumbwi mbaka ghwandusa kumema ghamatsi. 38 Yesu tsakakala kuchughu kwa mnumbwi kawasila ghumto. Iwanang’ina wake wamlamsa, wamlongela, "Mlangulitsi, apfi ng’aukona usungu bae, ka twetwe twotsama?"

39 Yesu kalamka, kalikembela libeho na kaghalongela ghamawimbi, "Nyamala," kuya libeho linyamala na kukala kutindiwala.

40 Kuya kawalongela iwanang’ina wake, "Ule mpfuka? Pfii, mng’ali ng’amtoghola bae?"

41 Nawo wapfuka ghendo, weghutsa, "Ayu munu wachi, libeho na ghamawimbi ghose ghomhulikitsa?"

35 Mihe haipfikile, iwanang’ina wake wamghendela wamlongela, "Hanu hano hana nyika iliyeka, na litsua liswa. 36 Waleke woke kune imighunda ne ipfijiji, ili wakeghulile ichijo iwenyegho."

37 Lekeni kawedika, "Mwemwe muweng’e ichijo waje."

Wamghutsa, "Apfi kwotubama tughende tukawaghulile pfighate pfa sendi miya mbili tuweng’e waje?" 38 Kawaghutsa, "Mna pfighate pfingapi? Mghende mkalole."

Hawamanyile, wamlongela "Kuna pfighate pfitano ne iwasomba weli."

39 Kuya Yesu kawalongela iwanang’ina wake, wawalongele iwanu wose weghole mne makingili, wakale hasi mne mitsani imibisi. 40 Apfo wakala mne makingili ghe iwanu, hano miya, hano hamsini. 41 Kuya Yesu kasola pfighate pfila pfitano ne iwasomba weli, kalola kulanga, kapfibaliki kuya kapfibena pfighate pfila. Kaweng’a iwanang’ina wake waweng’e iwanu. Pfipfila kawagholela iwanu wose iwasomba wala weli. 42 Iwanu wose waja weghuta, 43 ne iwanang’ina wake wadondola pfighate ne iwasomba yawakalile wamemetsa pfiseghe kumi na pfili. 44 Iwamale iwajile wakala elufu tano.

48 Tsakawona iwanang’ina wake woghaya mne mnumbwi, kwaapfila libeho ling’ali lyowatowa kwa ingupfu. Habehi na kucha, kawaghendela, yang’ali yoghenda mchanya mwe ghamatsi. Kabama awalute, 49 nawo hawamwonile koghenda mchanya mwe ghamatsi, tsawepfikitsa tsakakala mtsimu. Walila kwa litsi likulu, 50 kwaapfila wose tsawamwona na wang’ali wopfuka.

Bahala Yesu kawalongela, "Nene! Mleke kupfuka." 51 Kuya kengila mne mnumbwi hamwe nawo, na libeho linyamala, iwanang’ina wake wakangawala ghendo.

Yesu kowaghutitsa iwanu elufu nne

1 Mne ghamatsuwa agho, kingili lingi likulu litingana. Kwaapfila tsawakala wahela ichijo, Yesu kawakema iwanang’ina wake, kawalongela, 2 "Nowonela libatsi iwanu wano, kwaapfila wakala na nene kwa ghamatsuwa madatu bila ukuja. 3 Ning’awalongela woke mmakaye mwawo ne inzala, wodaha kutsilika mnzila, kwaapfila wangi wolawa kutali."

4 Iwanang’ina wake wamghutsa, "Apfi hano kunyika imunu kodaha kupata kwani ichijo chokuweng’a iwanu wose wano waghute?"

5 Yesu kawaghutsa, "Mna pfighate pfingapi?"

Wamwidika, "Saba."

6 Yesu kawalongela iwanu wakale hasi. Kasola pfighate pfila saba, kapfibaliki, kapfibena na kuweng’a iwanang’ina wake waweng’e iwanu, nawo watenda pfipfo. 7 Pfipfila tsawakala ne iwasomba wadowado chidogho. Yesu kawabaliki pfipfila na kuwalongela iwanang’ina wake waweng’e iwanu. 8 Iwanu waja na kwighuta. Kuya iwanang’ina wake wadondola pfiseghe saba ipfimemile ipfijo ipfisighale. 9 Iwanu iwajile tsawakala elufu nne. Kuya Yesu kawaagha,

Yesu koghulighita ghumbiki ghwa mtini

12 Nemitondo yake hawang’ali wolawa Betaniya, Yesu tsakakala na nzala. 13 Kaghwona ghumbiki ghwa mtini kwa kutali ghune imitsani mingi. Kaghenda kulola ka kodaha kupata tini. Lekeni hayapfikile ng’apatile bae tini ila imitsani iliyeka, kwaapfila msimu wa tini tsaghung’ali. 14 Kuya Yesu kaghulongela ghumbiki, "Kulawa lelo na kughendelela, kuduhu imunu iyatsokuja keli ghamatunda ghako." Ne iwanang’ina wake wamuhulika hayalongile apfo.

Ghamalaghitso ghe ghumtini ghunyalile

20 Nemitondo yake, hawang’ali woghenda waghwona ghumtini ghula ghunyala kulawa msina. 21 Petiri kakumbuka chayalongile Yesu, kamlongela, "Mlangulitsi, ulole! Imbiki ghughulighite ghunyala!"

22 Yesu kedika, "Mumtoghole Imulungu. 23 Nowalongela ghendo, imunu wowose ang’achilongela chidunda chino, ‘Ghenda wiyase mwibahali’ na ka ng’akwalangula mne ghumoyo ghwake na kutoghola chayalongile chitsolawila, chitsotendeka kwaajili yake. 24 Apfo nowalongela, hamlomba na kulomba ghoghose, mtoghole ka mwoghabokela, nagho ghatsokuwa ghenu. 25 Na hamlomba, ka kuna imunu kakutendela pfihile, umleghusile ghamatotso ghake, naye Aba wenu yali kulanga katsowaleghusila nzambi tsenu."

Yesu kowakema iwatumighwa wa mwanduso

1 Litsuwa limwe Yesu tsakema mmbalimbali mwa tsiwa Genesareti, baho iwanu wammemela na kumkunughitsa kunughitsa, wategheletsa Imbuli ye Imulungu. 2 Kayona minumbwi mili mmbalimbali mwe tsimbu, ilekighwe na iwalowa somba iwang’ali wohopfugha nyapfu tsao. 3 Yesu kengila mne mnumbwi ghumwe ghwa Simoni, kamlongela aghusoghetse mnumbwi chidogho kulawa mmbalimbali mwe tsimbu mbaka mne ghamatsi. Kuya kakala hasi na kalangulitsa mtingano ghwe iwanu aku kamne mnumbwi.

4 Hayamalitse kulonga, kamlongela Simoni, "Usoghetse mnumbwi ghupfike haghatighati, kuya utsase nyapfu tsako mne ghamatsi upfule iwasomba." 5 Simoni kamwidika, "IMNDEWA! Tusang’ana ichilo chose ng’atupatile ichinu bae. Lekeni kwaapfila kulonga apfo, notsasa!" 6 Watsasa nyapfu tsao na wapfula iwasomba wengi ng’ani mbaka nyapfu tsao tsandusa kudegheka. 7 Apfo wawabengutsa wayawo iwakalile mne mnumbwi ghungi watse wawapfile. Wapfika, waweka iwasomba mne minumbwi yose mili mbaka ibama kutsama. 8 Simoni Petiri hayonile achila ichilawile, kamtowela Yesu maghoti kalonga, "Ughende IMNDEWA! Nene ne imunu yane nzambi!"

9 Simoni na weyaghe wakangawala kwe iwasomba wengi wawalowile. 10 Pfipfila weyaghe Simoni, Jakobu na Yohane, iwanaghe Sebedayo nawo wakangawala. Yesu kamlongela Simoni, "Uleke kupfuka, kulawa sambi na kughendelela kutsowapfula iwanu." 11 Waikwegha minumbwi yawo mbaka mmbalimbali mwe tsimbu, waleka chila ichinu, wamuwinza Yesu.

Yesu koikembela inyahemu inyamale

22 Litsuwa limwe Yesu kengila mne mnumbwi ne iwanang’ina wake, kawalongela, "Tuloke kumwambu mwe tsimbu." Apfo wandusa ghumwanza. 23 Hawang’ali mne ghumwanza, Yesu kawasa. Bahala, nyahemu ng’ulu ng’ani tsailawila mne tsimbu na mnumbwi wandusa kumema ghamatsi, apfo wose tsawabama watsame. 24 Iwanang’ina wake wamghendela wamlamsa, "Mtwatsa, Mtwatsa! Twotsama!"

Yesu kalamka, kalikembela libeho ne inyahemu, napfo pfinyamala. Litsimbu linyamala tulu. 25 Kuya Yesu kawaghutsa iwanang’ina wake, "Kulikwani ukutoghola kwenu?"

Lekeni wakangawala, wapfuka, welongela, "Ayu imunu wachi? Kokembela libeho ne inyahemu, napfo pfomhulikitsa?"

Yesu koikembela inyahemu inyamale

22 Litsuwa limwe Yesu kengila mne mnumbwi ne iwanang’ina wake, kawalongela, "Tuloke kumwambu mwe tsimbu." Apfo wandusa ghumwanza. 23 Hawang’ali mne ghumwanza, Yesu kawasa. Bahala, nyahemu ng’ulu ng’ani tsailawila mne tsimbu na mnumbwi wandusa kumema ghamatsi, apfo wose tsawabama watsame. 24 Iwanang’ina wake wamghendela wamlamsa, "Mtwatsa, Mtwatsa! Twotsama!"

Yesu kalamka, kalikembela libeho ne inyahemu, napfo pfinyamala. Litsimbu linyamala tulu. 25 Kuya Yesu kawaghutsa iwanang’ina wake, "Kulikwani ukutoghola kwenu?"

Lekeni wakangawala, wapfuka, welongela, "Ayu imunu wachi? Kokembela libeho ne inyahemu, napfo pfomhulikitsa?"

Yesu komuhonetsa imunu yane pfinyamkela

26 Yesu ne iwanang’ina wake waghendelela na ghumwanza, wapfika mne isi ya Gerasi, ili kumwambu mwe tsimbu Galilaya.

12 Litsua haling’ali lyikuswa, iwanang’ina kumi na weli wamghendela Yesu wamlongela, "Walongele iwanu waghende mne ipfijiji na kaye itsili mne imighunda tsa habehi kubama ichijo na hanu ha kuwasa, kwaapfila twakunyika."

13 Lekeni Yesu kawedika, "Mwemwe iwenyegho muweng’e ichijo waje."

Wamwidika, "Twetwe tuna pfighate pfitano ne iwasomba weli waliheka. Pfii kwobama tughende tukawaghulile iwanu wose wano?" 14 Hanu hala hana wamale elufu tano.

Yesu kawalongela iwanang’ina wake, "Muwalongele iwanu wakale mne makingili, na chila kingili wanu hamsini." 15 Kuya iwanang’ina watenda apfo, iwanu wose wakala hasi. 16 Yesu kasola pfighate pfitano ne iwasomba weli, kalola kulanga, kapfibaliki. Kuya kamegha pfighate ne iwasomba, kaweng’a iwanang’ina wake waweng’e iwanu. 17 Iwanu wose tsawaja weghuta. Ne iwanang’ina wadondola pfihindi pfe pfighate ne iwasomba ipfimemile Pfiseghe kumi na pfili.

Ichihungo cha ukukwela ako Kana

1 Litsuwa lya kadatu hambele, tsakukala na chihungo cha ukukwela ako Kana, mna isi ya Galilaya. Na mamo wake Yesu tsakabaho. 2 Yesu na iwanafunzi wake nawo pfipfila tsawakemighwa mna ichihungo acho. 3 Idipfai haimalile, mamo wake kamlongela Yesu, "Wahela idipfai."

4 Yesu kamwidika, "Mamo, tuna choni cha ukutenda nene na ghweghwe? Isaa yangu ng’ana ipfike baye!"

5 Kuya mamo wake kawalongela iwatumighwa, "Chochose chiyowalongelani tendeni."

6 Bahala tsahana mabigha gha mabwe sita gha ghamatsi, ighekighwe kwa ajili ya ichihendo cha Wayahudi cha ukwihopfugha, chila bigha lyodaha kumema galoni ishilini mbaka salasini. 7 Yesu kawalaghitsa iwatumighwa, "Memetseni ghamatsi mna ghamabigha agho." Nawo waghamemetsa topu ghendo!

8 Kuya kawalaghitsa, "Lelo mdeghe, mkamwing’e imkulu wa ichihungo."

Nawo wadegha, wamghalila. 9 Naye imkulu wa ichihungo kalanza ghamatsi ighaghaluke kuwa dipfai, wala ng’amanyile baye kwailawile, lekeni iwatumighwa iwadeghile ghamatsi tsawamanya. Kuya imkulu ayo kamkema immale iyokwela hambalimbali, 10 kamlongela, "Chila munu kandusagha ukulapfa idipfai inoghile, kuya iwanu hawakuwa wapatika, kolapfa lilusu. Lekeni ghweghwe kuyika idipfai inoghile mbaka sambi!"

11 Ichinu achino cha mwanduso cha ukukangawatsa Yesu kachitenda ako Kana, mna isi ya Galilaya; kalangusa utunitso wake, na iwanafunzi wake wamtoghola.

6 Yesu tsakaghutsa apfino kumghetsa Filipi, kwaapfila tsakamanya chayafikitse ukutenda.

7 Filipi kamwidika, "Hata fetsa dinari miya mbili ng’atsidaha baye kughula pfighate chila imunu yapate ngaa chidogho!"

8 Mwanafunzi yungi wa Yesu, Andereya, ndughu yake Simoni Petiri, kamlongela Yesu, 9 "Ahano hana msongolo yumwe, kana pfighate pfitano pfa shayiri na somba weli, lekeni apfo pfitsowenelatse iwanu wengi kama awano?"

10 Yesu kalonga, "Walongeleni iwanu wakale hasi." Hanu ahala tsahana mitsani mingi. Baho iwanu wakala hasi, na ihesabu yawo tsayopfika iwamale kama elufu tano. 11 Baho Yesu kasola ipfighate apfila, kalonga, mighede kwa Imulungu, kawagholela iwanu iwakalile hasi mbaka wose wenela. Na kwa wasomba atenda pfipfo. 12 Iwanu wose haweghutile, kawalongela iwanafunzi wake, "Dondoleni ipfihande pfa ipfighate ipfikalile, chochose chileke kwagha."