1 IMNDEWA kamlongela Ayubu,

2 Angu imunu iyesonga na Imulungu yana ing'upfu kodaha komlonga Imulungu katotsa?

Leka ayula iyomwona Imulungu katotsa yamwidike.

3 Baho Ayubu kamwidika IMNDEWA, kalonga,

4 Nene sili chinu ghendo baye, nikwidika choni?

Nodiwa ghumlomo ghwangu na ghumoko.

5 Tsanonga mala lumwe, na sitsakwidika baye,

tsanonga lwakeli, lekeni sitsoghendelela keli baye.

6 Kuya IMNDEWA kamwidika Ayubu kulawa mna ichipfulapfumbi, kalonga,

7 Wime lelo, ka ghweghwe kwa mmale,

nikughutse, naghwe unyidike.

8 Pfihi ghweghwe kolema apfila pfanikuhighile?

Angu kombona nene nitotsa, ghweghwe ng'utotsile baye?

9 Pfihi ghweghwe kuna ngupfu ka nene Imulungu,

na kodaha kuduma ka nene?

10 Lelo wighubike ghumwenyegho ukung'ala na iheshima,

na wipfatse ukutogholeka na utunitso.

11 Ulanguse apfila imaya yako pfaili ng'ulu,

umlole chila munu yana ichidandali na umhulumse,

12 umlole chila munu iyeghoda, umughwise hasi,

na uwabajughe iwanu wehile baho hawakwima.

13 Wose uwatsike hamwe mtimbwisi,

pfihanga pfao upfipfise mna likabuli.

14 Babo hanitsokutambula,

ka tsingupfu tsako mwenyegho tsodaha kukukombola.

15 Umlole ichiboko,

nene nimuumba ka apfila pfanikuumbile ghweghwe,

iyakuja mitsani ka ng'ombe.

16 Lola, tsingupfu tsake tsili mchuno mwake,

na lola tsinyughe tsake tsili mna lida pfatsili na ngupfu.

17 Kohighisa ghumkila ghwake ka mbiki ghwa mweletsi,

na tsinyughe tsili mna ghamahatsa ghake tsilungighwa hamwe,

18 imipate yake ka mibomba ya shaba,

na tsimbapfu tsake ka pfibao pfa chuma.

19 Yeye kawakwanza mna ipfinu pfayaumbile Imulungu,

yeye iyamuumbile yuyo iyodaha kumghendela na lipanga.

20 Pfidunda pfomghalila ipfijo,

ako iwanyama wa kubagho wodawala.

21 Wowasa hasi mna libagho lya imihonga,

wepfisa mna imidete ili mlwanda mna ichitsapfa.

22 Imidete ayo yomghubika kwa chimbeho chake,

na imibiki ikota mmbalimbali mwa ipfikolongo yomtsunguluka.

23 Ghumto haghumema ghamatsi, yeye ng'oghudema baye,

kokala tulu, hata ghamatsi gha ghumto Yoridani ghang'amema ghapfike mna ghumlomo ghwake.

24 Angu kuna munu iyodaha kumghogha aku kolola kwa tsinenge tsake?

Au kodaha kumwonza mna ghumtegho kwa ukumtobola imula yake?