1 Kuya ayubu kawedika, kalonga,

2 Nomanya ghendo ka apfi pfipfo pfaili,

lekeni imunu yodahatse kuwa na haki hambele ha Imulungu?

3 Ka imunu kobama kuhila naye,

ng'odaha baye kumwidika mbuli imwe mna mbuli elufu imwe.

4 Yeye kana hekima mmoyo na kana ngupfu nyingi,

nani iyampingile na kumhuma?

5 Yeye iyobula imidunda, bila yenyegho kutanga,

na koibindulila kutali kwa imaya yake.

6 Yeye iyoihighisa isi kulawa hanu hake,

na iyotsitenda tsingutso tsake tsighudeme.

7 Yeye kolilaghitsa litsuwa lileke kulawa,

kotsidiwa tsinondo tsileke kulangatsa.

8 Yeye yaliyeka iyotsitandatsa tsilanga,

na kughabajugha ghamawimbi gha ibahali.

9 Yeye iyaumbile tsinondo tsa Dubu,

na Orioni na chilimila na mabughulu gha tsinondo tsa kusini.

10 Yeye iyotenda ighali makulu ing'aghomanyika baye,

na gha kukangawatsa, ing'aghopeteka baye.

11 Ulole! Yeye kobita habehi yangu, lekeni simwona baye,

na kakuka aku nene simtambula baye.

12 Lola, Yeye yang'asola chinu, nani wa kumghoma?

Nani yatsomghutsa, "Utenda choni?"

13 Imulungu ng'oighoma baye imaya yake,

hata awala iwomwapfila Rahabu, liboka lya ibahali, wokung'unyala hambele hake.

14 Lelo nidahatse kumwidika Imulungu?

Angu nighasaghula kwani malonga gha ukulonga naye?

15 Hata ka nahela totso, nene sidaha baye kumwidika,

nobamighwa nimlombe mlamtsi wangu iyonihigha yambonele libatsi.

16 Hata ka ning'amkemile, naye yanyidike,

tsasidaha baye kutoghola ka kanitegheletsa.

17 Yeye iyonitowa kwa inyahemu,

na konyongetsela hela ipfilonda pfangu.

18 Ng'ondeka ghendo baye nihumle,

lekeni yeye konyongetsa usungu.

19 Tung'alola tsingupfu, yeye kana ngupfu sideke,

na kwa imbuli ya ihaki, nani iyatsomghala kwibalatsa?

20 Hata ka nene nina haki, chanilongile kwa mlomo ghwangu ching'anihighile,

na hata ka nahela totso, acho chanongile ching'ambonese nene nina totso.

21 Nene nahela totso, lekeni nene nakona si chinu baye,

hata ugima wangu wenyegho noubetsa.

22 Agho ghose chinu chimwe, apfo nolonga,

Yeye kowamalitsa wose, iwalihela matotso na iwehile.

23 Maghayo haghakutsa na kukoma iwanu kwa kwidukitsa,

yeye kowaseka iwanu iwalihela totso pfawotenyuka ghumoyo.

24 Isi ing'aghwila mna ghamoko gha iwanu iwehile,

Imulungu katsifumba tsinenge tsa iwalamlitsi wa isi ayo,

ka iyotenda apfo si yeye baye, lelo nani?

25 Matsuwa ghangu ghopfosa himahima kubita imunu iyotsuma,

ghopfosa bila ukona ighanoghile.

26 Ghopfosa himahima ka ingalawa ya midete.

ka chitema iyomkweng'ula ichitsiya.

27 Ning'alonga nitsesemwa ukulila kwangu,

lelo nichitende chihanga changu chileke koneka chinuna,

na nene nyoneke nisangalamka,

28 lekeni nene ning'ali nighapfuka ghamaghayo ghangu,

kwaapfila nomanya ghweghwe kutsombona ka nene nina totso.

29 Apfo ka nitsakoneka nina totso,

heule lelo nighanzike hela?

30 Hata ka ning'oghile na ghamatsi ighelile,

na kuhopfugha ghamoko ghangu kwa isabuni,

31 lekeni ghweghe kutsonyasa mna lipondo,

hata ghamagwanda ghangu ghatsombona nyiha.

32 Kwaapfila yeye si munu baye ka nene hebu nimwidike,

hata tughende kuna libalatsa tukahighe naye ghomba.

33 Kuduhu wakutulamlitsa twetwe,

iyodaha kutwikila ghumoko twose weli.

34 Leka Imulungu yaisoghetse ing'weku yake mchanya mwangu,

ili aghala ighoghela wogha ghaleke kunitenda nipfuke,

35 apfo ning'alongile naye bila kumpfuka,

kwaapfila nene sili pfipfo baye mna ghumoyo ghwangu.