1 Imunu iyelekighwe na ipinga,

matsuwa ghake gha ukukala chidogho,

nagho ghamema maghayo mengi.

2 Kosanula ka luwa, kuya koholola,

kakuwa ka chimbeho ichisumka ukubita, wala ng'okala baye.

3 Hebali utsodola tsinenge tsako kwa imunu ka ayo,

na komghala hambele hako umhighe?

4 Nani iyodaha kulapfa chinu chelile kulawa mna chinu chihile?

Kuduhu ghendo iyodaha.

5 Kwaapfila matsuwa ghayokala imunu ghapetighwa,

naghwe koimanya imiyetsi yake mingapi,

na kumwikila imibaka naye ng'odaha baye kuiloka.

6 Uleke kumlola yeye, umleke yadeng'elele ukumalitsa ghamatsuwa ghake,

ka ichibaluwa pfayodeng'elela ukumalitsa ing'onde yake.

7 Kwaapfila hata ghumbiki ghuna cha ukulolela ahala haghuganighwa,

kwaapfila ghutsotsuka keli,

na nyotela tsake ng'atsileka baye ukutsuka.

8 Hata ka imitsisi yake inyalila mna litimbwisi,

na lisina lyake kufila mwidongo,

9 lekeni kwa mnyeke ghwa ghamatsi ghutsotsuka,

naghwo ghutsotula maputila ka mbiki ghwotile sambi.

10 Lekeni imunu kakufa, na ako kuko ukumala kwake.

kolapfa imuhe ya ukumalitsila, naye kohupa ghendo.

11 Ka apfila ghamatsi pfaghonyala mna ibahali,

au ka apfila ghamatsi gha ilukolongo pfaghakuhwa na kunyala,

12 apfi pfipfo pfayakufa imunu, na ng'akwinuka keli baye,

mbaka kulanga hakuhupa, ng'atsolamka baye

wala kwinuka mna tsinongo.

13 Ng'apfu ung'anipfisile kutsimu,

ung'anipfisile mbaka imaya yako haitsohola,

na ghamatsuwa ghaunyikile ghang'amala, unikumbuke keli.

14 Pfihi imunu yang'afa, kakuwa mgima keli?

Ing'awa apfo, nene nitsobetetsa mna ghamatsuwa ghangu gha ukughaya.

na nitsobetetsa mbaka ghamaghayo ghangu haghatsotsigha.

15 Ghweghwe kutsokema, na nene nitsokwidika,

na kutsobama ukumbona nene yuniumbile kwa ghamoko ghako.

16 Lelo sambi ghweghwe kopeta tsihatua tsangu,

lekeni uleke kukaghula tsinzambi tsangu,

17 na ghamatotso ghangu ghekighwa mna ghumkoba,

naghwe koghubika ighehile ghangu.

18 Lekeni ka apfila lidunda pfalikilimka,

na ka apfila libambalawe pfalibuka hanu hake,

19 ka apfila ghamatsi mengi ighobita pfaghosughula na kumoghola ghamabwe,

na ka apfila ghamatsi ghamemile pfaghokulusa lidongo,

apfi pfipfo naghwe pfaumtenda imunu yaleke kuwa na chinu cha ukulolela.

20 Ghweghwe kuna ngupfu kumbita yeye matsuwa ghose, naye kopfosa,

na ghweghwe kochighalusa ichihanga chake, na komwasa kutali.

21 Iwanaghe wakwing'ighwa ukulu, lekeni yeye ng'omanya baye,

wang'ahulumsighwa, yeye ng'otanga baye.

22 Chayakona yeye usungu wa ilukuli lwake imwenyegho,

naye katsedomboketsela imwenyegho.