1 Baho Elifazi, imunu iyolawa Temani, kalonga,

2 "Angu kutsakona pfiha imunu yang'abama ukulonga na ghweghwe?

Lekeni nani iyodaha kwinyamala yaleke ukulonga?

3 Lola, ghweghwe kuwafunda wanu wengi,

kuweng'a ingupfu iwanu iwalio nyonde nyonde.

4 Ghamalonga ghako ghawenula awala iwang'ali wakughwa,

na ghawatenda awala ing'awodaha ukwima weme.

5 Lekeni sambi ghakulawila ghweghwe,

naghwe ng'ughadudumila baye,

ghakupata, naghwe kutenyuka ghendo ghumoyo.

6 Ng'ambe ukumpfuka Imulungu kuko ukwihuwila kwako,

na ukukala kwako bila nzambi lyilo lolelo lyako?

7 Lelo ukumbuke, nani iyakomighwe aku kahela totso?

Na iwanu iwalihela nzambi kwani kwawakomighwe?

8 Pfanimanya nene, iwolima ghehile na iwohanda maghayo wopfuna ghagho.

9 Imulungu kowakoma kwa imuhe yake,

wohupa ahala imaya yake haiduma.

10 Isimba kodaha kuduma na kukoloma,

Lekeni matsino ghake isimba ayo mkulu ghobenighwa.

11 Isimba iyalalile kakufa ka kahela imnyama wa kumghogha,

na iwana wa simba pinga wopwililika.

12 Imbuli initsila chinyelenyele,

ghutwi lyangu lihulika apfila pfayang'ali yodong'onda,

13 initsila nechilo iwanu hawolota tsindoto,

na hawowasa tsinongo ndito.

14 Wogha unyingila, na ukughudema,

utenda mipate yangu yose ighudeme.

15 Beho libita hambele ha ichihanga changu,

na tsimvili tsa ilukuli lwangu lwose tsiyayamka.

16 Libeho alyo lima tulu, lekeni handolile, silitangile baye lili pfihi,

wala sonile umbo baye hambele hangu,

lekeni kukala toyoyo, kuya nihulika litsi lilonga,

17 ‘Pfihi imunu kodaha koneka kana ihaki kubita Imulungu?

Pfihi imunu kodala koneka kela kubita Maumba wake?

18 Hata iwatumighwa wake ngawotogheleka baye hambele hake,

Hata wamalaika wake kowona ka watotsa.

19 Lelo pfihi kwa awala iwokala mna tsing'anda tsa lidongo,

wana ghumsingi ghwikighwe mtimbwisi,

iwodaha kudughighwa ka sondo.

20 Iwanu wakuwa wagima nemitondo, haipfika nemihe wakufa

na wohupa kwa matsuwa ghose ing'aghohupa, na kuduhu imunu iyakwalangula.

21 Ghose ghayali nagho ghatsosolighwa,

naye kakufa aku kahela ihekima?’"