1 Lelo ukeme ka kuna munu iyokwidika,

na malaika wachi yutsomhundukila?

2 Kwaapfila lifondogholo lyomkoma imunu mbotsi,

ukona gele komkoma imunu iyalihela mbutsi.

3 Nene nimwona munu mbotsi kebweda,

lekeni baho niilighita ing'anda yake.

4 Iwana wake ng'awakona ugima baye,

wobunzighwa kuna libalatsa,

kwaapfila kuduhu munu iyowalongelela.

5 Iwanu wana inzala wakuja ipfijo pfayapfunile,

na wosola hata apfila ipfotile mna imihonga,

na iwanu watsodo wosulukila tsimali tsawo,

6 kwaapfila ghamaghayo ng'agholawa mna litimbwisi baye,

wala ukughanzika ng'akulawa mna lidongo baye.

7 Lekeni imunu kakwelekighwa yaghaye,

ka tsisesi tsa ghumoto pfatsighuluka kuchanya.

8 Lekeni nene ning'awile ghweghwe,

ning'ambamile Imulungu,

ning'amghalile yeye lighomba lyangu.

9 Yeye iyotenda ighali makulu, ing'aghotangika baye,

na iyotenda pfinu pfa ukukangawatsa, napfo ng'apfipeteka baye.

10 Iyolekelela imvula itowe muisi,

na iyoghala ghamatsi mna imighunda.

11 Iyowenula mchanya awala iwehulumsa,

na awala iwodomboketsa kowenula wakale akula kuli na ugima.

12 Kopfulaghitsa imitsengwe ya iwanu waghutsu,

ili waleke kutenda aghala ghawobama.

13 Yeye iyowonza awala iwakengele mna ukubugha kwao,

na ghawobama kutenda awo iwobugha iwanu, yeye koghatenda ghatsighe himahima.

14 Nemisi wao wetingana na ichisi,

na wobamasa bamasa nemisi ka nechilo.

15 Lekeni yeye kowakombola iwahingwa waleke ukukomighwa,

kowaswekula kulawa mna ghamoko gha wana tsingupfu.

16 Apfo wahingwa wana cha ukulolela,

na ighehile ghotsigha.

17 Lola! Kabweda imunu iyotowighwa na Imulungu.

Apfo uleke kubetsa ukutowighwa na Imulungu yana ingupfu.

18 Kwaapfila yeye kolagha, lekeni pfipfila kohonetsa,

yeye komwing'a imunu pfilonda, na kwa ghamoko ghake kohonetsa.

19 Katsokukombola mna maghayo sita,

hata ghang'awa saba, ng'akutsakuwa na chinu chihile ichitsokupata.

20 Mna ghumsimu ghwa inzala yeye katsokukombola uleke kufa,

na hawitowa kuna ing'ondo yeye katsokukombola uleke kukomighwa na lipanga.

21 Katsokukinga ahala imilimi ya iwanu haikulonga pfihile.

naghwe ng'utsopfuka baye ahala ukukomighwa hakukutsa.

22 Ukughanzika na inzala hapfikutsa, ghweghwe kutsoseka,

wala ng'utsowapfuka baye iwanyama wakali iwali muisi.

23 Kwaapfila ghamabwe ighali kumighunda ng'aghatsokughoma baye ulime,

na wanyama wa kubagho ng'awatsokuluma baye.

24 Naghwe kutsomanya ka ing'anda yako ikala ghoya.

hautsowakaghula iwanyama wako, kutsowona wose wabaho.

25 Naghwe kutsomanya ghendo ka iwatsukulu wako watsakuwa wengi,

na ipfeleko pfako pfitsakuwa pfingi ka mitsani ili muisi.

26 Kutsopfika kwikabuli aku kuna miyaka itimile,

ka chikungwi cha ingano ichipfile mna ghumsimu ghwake.

27 Apfo aghano ghagho ghatughakaghule,

nagho gholongesa ghendo,

ghahulike, kwaapfila ghatsokwapfila.