1 Kuya Ayubu kamwidika IMNDEWA, kalonga,

2 "Nomanya ghendo ghweghwe kodaha kutenda chila chinu,

na chochose chaubama chitendeke kuduhu iyodaha kuchighoma.

3 Naghwe kughutsa,

'Angu nani ayuno iyakwingilila mbuli tsangu bila kumanya?

Nonga ghendo pfinu apfila nene sipfimanyile baye,

pfinu apfo pfonikangawatsa ghendo, na nene sipfimanyile baye.

4 Tsakunongela apfino, ‘Sambi tegheletsa, na nene nitsolonga,

nene nitsokughutsa, naghwe unyidike.’

5 Tsanikuhulika kwa maghutwi ghangu,

lekeni sambi nokona kwa tsinenge tsangu.

6 Apfo sambi nene nebona si chinu ghendo baye,

na notoghola ka nitotsa, lelo nebakatsa lipfu na litimbwisi."

7 IIMNDEWA hayamalitse ukulonga na Ayubu, kamlongela Elifazi, munu wa Temani, "Nikughudubukila ghweghwe na sale tsako weli, kwaapfila mwemwe ng'amlongese baye mna tsimbuli tsangu, ka pfayalongile imtumighwa wangu Ayubu. 8 Apfo soleni ng'ombe wamale saba na ng'olo wamale saba na mghende kwa imtumighwa wangu Ayubu, na mwikelapfile tsinambiko tsa ukulakasighwa. Mtumighwa wangu Ayubu katsomlombelani, nitsohulika chayolomba, na nene sitsowatendela baye kwa kulola ubotsi wenu, kwaapfila ng'amlongile baye aghala igholongesa ka mtumwa wangu Ayubu pfayalongile." 9 Apfo Elifazi iyolawa Temani, Bildadi iyolawa Shua, na Sofari iyolawa Naamati, watenda ka IMNDEWA pfayawalongele, na Imulungu kahulika chayalombile Ayubu.

10 Ayubu hayawalombele sale tsake, baho Imulungu kamuyitsila ingekewa iyakalile nayo aho mwanduso, na kamwing'a Ayubu mala mbili kubita aghala ghayakalile nagho mwanduso. 11 Kuya ndughu tsake wamale, na lumbu tsake, na sale tsake, na chila munu iyamanyile aho mwanduso, waghenda ukaye yake, waja naye. Wamwonela libatsi na wamkanza kwa ghamaghayo ghose IMNDEWA ghayamghalile, na chila munu kamwing'a ipete ya fetsa na ya nzahabu.

12 Lelo mna imiyaka yake ikalile, IIMNDEWA kambaliki ghendo Ayubu kubita ahala mwanduso, tsakana ng'olo elufu kumi na nne, na ngamiya elufu sita, na ng'ombe elufu mbili, na pfihongwe pinga elufu imwe. 13 Pfipfila tsakana wana wamale saba na mapinga wadatu. 14 Imwanaghe pinga wa mwanduso kamkema Yemima, wakeli kamkema Kezia, na wakadatu kamkema Kereni Hapuki. 15 Mna isi yose ng'akukalile mapinga wanoghile ka neghe tsake Ayubu, na aba wawo kawagholela tsimali hamwe na lumbu tsawo iwamale. 16 Haghamalile agho, Ayubu kakala mgima miyaka miya na alubaini, kawona iwanaghe, iwatsukulu, na pfilembwe pfake pfose mbaka mweleko ghwake ghwakane. 17 Apfo kafa akuno kalala ghendo, kakala miyaka mingi.