1 Kuya Elihu kaghendelela ukulonga,

2 Unidudumile chidogho, nikulanguse chinu chimwe,

kwaapfila nina chinu cha ukukulongela kulawa kwa Imulungu.

3 Ukumanya kwangu nikupata kulawa kutali,

na nene nitsolangusa imuumba wangu pfayali na ihaki,

4 Nolongesa ghendo, chanilonga si cha ughutsu baye,

na iyenelel mna ukumanya ipfinu ka hamwe naghwe.

5 Imulungu kana ngupfu, lekeni ng'ombetsa imunu baye,

yeye kana ngupfu ng'ulu ya ukumanya apfinu.

6 Ng'owaleka baye iwanu wehile waghendelele kuwa wagima,

lekeni yeye koweng'a awala iwodununzighwa ihaki yawo.

7 Tsinenge tsake ng'atsileka baye kuwalola iwanu wana ihaki,

naye koweka mna ipfighoda pfa chifalume wakale hamwe na iwafalume,

kuya kowenula matsuwa ghose ing'aghohupa.

8 Ka iwanu wohighwa na iminyololo,

na waghaya kwa aghala ghawatendile,

9 yeye kowalangusa aghala ghawatendile,

ka watenda nzambi kwa ichidandali chawo.

10 Yeye koghatenda ghamaghutwi ghao ghahulike aghala ghawokanyighwa,

na kowalaghitsa woye kulawa mna ukutenda ighehile.

11 Wang'amteghetsa Imulungu na ukumsang'anila,

matsuwa ghao ighakalile watsokala kwa ukubweda,

na imiyaka yawo yakuwa ya ukudeng'elela.

12 Lekeni ka ng'awatsotegheletsa baye,

watsokomighwa na lipanga,

watsakufa aku ng'awomanya chinu baye.

13 Iwanu ing'awompfuka Imulungu, wakwika imaya mna imimoyo yawo,

ng'awomlilila yawapfile baye ahala hayowoha.

14 Wakufa wang'ali wasongolo,

na ugima wao wohupa hawali haghatighati ha iwehile.

15 Lekeni kwa awala iwoghaya, yeye kowakombola kulawa mna ghamaghayo ghao,

na mna ghamaghayo agho kolonga nawo wammanye yeye.

16 Yeye kokulongotsa ulawe mmaghayo,

ukale hanu henelele, bila kwibanya banya,

na imetsa yako ya ukujila imeme ipfijo pfinoghile.

17 Lekeni sambi kohighighwa ka imunu iyehile,

naghwe kughoghighwa na kuhighighwa ka pfaibamighwa.

18 Walangitse imaya ileke kukutenda ubetse,

na ukongetseka kwa tsimali tsako kuleke kukwaghisa.

19 Pfihi tsimali tsako au tsingupfu tsako tsose,

tsodaha kukulapfa mna ghamaghayo?

20 Uleke kulolela ichilo chingile,

kwaapfila nechilo iwanu woghoghighwa kulawa mna tsing'anda tsawo.

21 Walangitse uleke kwingila mna ighehile,

kwaapfila ghweghwe kusaghula ghehile kubita ghamaghayo.

22 Imulungu kenulighwa mna tsingupfu tsake,

nani iyali mlangulitsi ka yeye?

23 Nani iyamlongotse cha ukutenda,

au iyodaha kumlongela, ghweghwe kutotsa?

24 Uleke kwisemwa kughatunya aghala ghayatendile

aghala iwanu ghawembile mna tsiwila.

25 Iwanu wose waghona ghayatendile Imulungu,

nawo waghona kulawa kutali.

26 Lola Imulungu pfayali mkulu, kubita ghendo tsimbutsi tsetu!

Na imiyaka yake ng'aimanyika baye.

27 Yeye kokwegha kuchanya mpuke ghwa ghamatsi,

kuya koghutenda ghuwe mvula itowa muisi,

28 na mabingu gholopfa imvula,

nayo yowatowela iwanu wose.

29 Angu nani yomanya pfayakwanzatsa ghamabingu mlanga?

Na apfila pfayodumilila kulawa akula kwayokala Imulungu.

30 Yeye kakwenetsa ilumwesa lwake lumtsunguluke,

lekeni koleka hanu haghendese hasi ha ibahali hawe chisi.

31 Apfi pfipfo pfayowahigha iwanu,

naye kowenga ichijo bwelele.

32 Ilumwesa kolumemesa mna ghamoko ghake,

na kolulaghitsa lutowe ahala hayobama.

33 Ukuduma kwake kolonga yeye pfayali,

na wanyama womanya ukutsa kwake.