1 Ayubu kaghendelela kalonga,

2 Nelaha kwa Imulungu iyana ugima,

iyalemile kungaya ighali haki yangu,

iyaghutendile ghumoyo ghwangu ghwone usungu,

3 kwa matsuwa ghose ghanikala nohumula,

ka iloho ya Imulungu pfaikala mghati mwangu.

4 mlomo ghwangu ng'aghutsolonga ghehile baye,

wala lulimi lwangu ng'alutsolonga ughutsu baye.

5 Nene sitsotoghola ghendo baye ka mwemwe mwolongesa,

nene nitsolonga nahela totso mbaka hanitsakufa.

6 Nitsoghendelela kulonga ka nene nina haki, wala sitsoleka baye,

na ghumoyo ghwangu ng'aghutsonitama baye,

mna matsuwa ghangu ghose ghanikala mgima.

7 Awala iwonyihila wawe ka wanu wehile,

na awala iwonibiduka wawe ka iwanu iwalihela ihaki.

8 Angu imunu ing'ayompfuka Imulungu yana choni cha ukulolela,

ahala Imulungu hayomwasa kutali,

na ahala Imulungu hayomlapfa ugima wake?

9 Pfihi Imulungu katsohulika ichililo chake,

ahala ghamaghayo haghomtsila?

10 Angu imunu iyehile katsodeng'elela hambele ha Imulungu yana ingupfu,

na ukumlomba Imulungu matsuwa ghose?

11 Nitsowafunda uwetso wa Imulungu pfauli,

na tsinzila tsa Imulungu yana ingupfu sitsotsipfisa baye.

12 Lola, mwemwe mwose mwona muwenyegho,

heule lelo mlonga ubotsi?

13 Achino chicho Imulungu chayamwikile imunu iyehile,

na chayatsobokela imunu iyodununza iwanu kulawa kwa Imulungu yana ingupfu.

14 Hata ka iwanaghe watsakongetseka, watsokomighwa kung'ondo,

na iwatsukulu wake ng'awatsakuwa na chijo cha ukuwenela baye.

15 Na awala iwalekighwe wagima kung'ondo ghamatamu ghatsowakoma,

na pfitsuka wao ng'awatsowalilila baye.

16 Imunu yehile hata yang'alundika fetsa tsiwe ka timbwisi,

hata yang'eka ghamagwanda ghawe mengi ka msanga,

17 mleke yaghalundike, lekeni iwanu wana ihaki watsoghapfala,

na iwalihela matotso watsegholela ifetsa yake.

18 Ing'anda iyotsenga yeghala na utanda bui,

na ka chibumbulika ichitsengighwe na mbetetsi.

19 Kowasa akuno katajili, lekeni ng'atsowasa keli apfo baye,

na hayatsofumbula tsinenge tsake yalole, tsimali tsake tsose tsuka.

20 Ipfinu ipfimghela wogha pfomtsila ka matsi ghamemile,

na inyahemu yomsola nechilo kwa kwidukitsa.

21 Libeho lya mashaliki lyomghulusa, naye kakuka.

lyomseya yakale kutali na hanu hake.

22 Imulungu katsomghulusa na libeho alyo bila kumwonela libatsi,

naye katsobama yatsume yahepe ingupfu yake lekeni ng'atsodaha baye.

23 Iwanu watsomtowela makofi kwa ukumbetsa,

na watsomwowela yalawe hanu hake.