1 Baho Bilidadi, kulawa Shuhi kamwidika Ayubu,

2 "Kutsolonga tsimbuli atsino mbaka tsuwachi,

na mbaka tsuwachi mbuli itsilawa mna ghumlomo ghwako tsitsakuwa mbewe ka beho?

3 Angu Imulungu ng'ohigha ghoya baye?

Au Imulungu yana ingupfu kopfulaghitsa ighali gha haki.

4 Ka iwanagho wamtendela nzambi Imulungu,

naye kawaliha kwa kulola achila chawamtendele,

5 ka kwitseyunda ukumbama Imulungu,

na ung'amdedetsa Imulungu yana ingupfu,

6 na ka kwinagho ghumoyo ighwelile na ighugholoke,

nolongesa ghendo Imulungu katsakutsa yakwapfile,

na kokuyitsila ikaye yako, na ghose ighanoghile ighakalile ghako.

7 Hata ka tsakwanza na pfinu chidogho

matsuwa ghako ighakutsa kutsakuwa na pfinu bwelele.

8 Apfo waghutse iwanu iwakalile baho ghumwande,

Ghalole aghala ghawonile sekulu tsawo.

9 Kwaapfila twetwe twoneka jutsi jutsi hela, ng'atumanya chinu baye,

apfo matsuwa ghetu ahano muisi ka chimbeho ichipfosa.

10 Angu awo ng'awatsokufunda baye,

na kukulongela aghala igholawa mna ukumanya kwao?

11 Pfihi tsinemvu tsodaha kota hanu halihela chitsapfa?

Na imidete yadaha kukula hanu halihela ghamatsi?

12 Aku yoghendelela kukula, na ng'ana iwanu waigane baye,

yosumka kuholola kubita mitsani ingi ka hasi hang'akangaluka.

13 Apfi pfipfo pfawatsotsigha awala iwomsemwa Imulungu,

na ukulolela kwa ayula ing'ayammanyile Imulungu kohupa.

14 Achila chayehuwila chitsobeneka beneka,

na ukulolela kwake kwakuwa ka utandabuwi.

15 Kakwaghamila utando wake, lekeni ng'aukwima baye,

kounanahila, lekeni ng'aukala baye.

16 Kakuwa ka mbiki mbisi hambele ha lutsuwa,

ghwakwenetsa maputila ghake mlukonde mwose.

17 Mitsitsi yake yebenyetsa benyetsa mna sughulu ya ghamabwe,

na yonanahila kuna ghamabambalawe.

18 Lekeni ghung'abulighwa kulawa hanu hake,

hanu aho hatsolonga, ‘Nene sikonile baye.’

19 Lola, ugima wake wohupa,

na hanu hake hatsakota mibiki ingi.

20 Lola Imulungu ng'atsomlema baye imunu iyalihela matotso,

wala ng'atsowapfila baye iwanu wehile.

21 Ila ghumlomo ghwako katsoghumemetsa chiseko,

na ilulimi lwako lutsodeng'elela.

22 Awala iwokwihila watsakona chinyala,

na hanu hawokala iwehile hatsohupa ghendo."