1 "Heule Imulungu ng'akwika baye ghamatsuwa gha ukuhigha?

Heule awala iwommanya ng'awoghamanya baye matsuwa ka agho?

2 Iwanu woseghetsa ghamabwe gha imibaka ya imighunda,

woboka wanyama kwa ngupfu kuya wowadima hamwe na wakwao.

3 Womboka imchuwa ichihongwe wake,

na womwika poni ing'ombe wa ichitsuka.

4 Wowakunughitsa iwahingwa mmbalimbali mwa inzila,

na iwahingwa wali muisi wepfisa hawowona wao.

5 Iwahingwa wawa ka chihiongwe wa kumhulo iyali kuchiwala.

wawo wohemela ichijo kunyika,

wapate chochose cha ukuweng'a iwana wao.

6 Wosalalitsa mna imighunda ili si yawo baye,

na woghondola tsinzabibu mna imighunda ya iwanu wehile.

7 Chilo chigima wowasa chidako, wahela cha ukupfala,

wahela ghendo chakwighubika mna ichipfeghetsi.

8 Wapfulumka kwa imvula ya mna imidunda, na

wobandaghala mna ghamabambalawe wepfise.

9 Wabaho iwowaboka iwana wachuwa kulawa mmambagha mwa wenye wao,

na wamwenga woweka poni iwana wa iwahingwa.

10 Lekeni iwahingwa wakwanga chidako, wahela cha ukupfala.

woduta ghamakinza gha ingano aku wana nzala.

11 Wokama tsinzeituni wapate ghamapfuta,

na wokama tsinzabibu wapate idipfai,

lekeni wawo wenyeho wang'ali wana ng'ilu.

12 Ichililo cha iwanu iwakufa chohulikika kulawa kuna ghumji,

na iwanu iwalaghighwe wokemelela wobama wapfilighwe,

lekeni Imulungu ng'otegheletsa baye chawolomba.

13 Awano wawo iwolema ghumwanga,

nawo ng'awomanya baye tsinzila tsake,

wala ng'awobama baye ukukinda tsinzila tsake.

14 Mkoma wanu kolamka lupfilipfili,

yawakome iwahingwa na iwalihela chinu,

na ichilo hachipfika yeye kakuwa ka mbapfi.

15 Na imunu mghoni kobetetsa chilo chingile,

akuno kolonga, ‘Kuduhu imunu yombona’,

naye koughubika uhanga wake.

16 Nechilo iwanu wobomola tsing'anda webe,

na nemisi wehindila mng'anda,

nawo ng'awobama koneke baye mna ghumwanga.

17 Kwaapfila kuna wawo chilo totolo chakuwa nemitondo,

na wawo ng'awopfuka baye igholawila mna ichisi totolo.

18 Lekeni wawo wahopfu mchanya mwa ghamatsi,

na tsimali tsawo tsakuwa tsilighitighwa muisi,

kuduhu iyoghenda kusang'ana mna imighunda yawo ya mitsabibu.

19 Ka ibalafu pfailubuka mna msimu ghwa chiyangatsi,

pfipfo kutsimu pfakuwasola awala iwatendile tsinzambi.

20 Mai tsawo iwaweleke watsowasemwa,

wang'onyo watsowaja na watsowona wamta,

iwanu wehile ng'awatsokumbukighwa keli baye,

lekeni watsobenighwa ka mbiki

21 Watsowatenda pfihile wapinga ing'awodaha ukweleka,

na awala iwalihela wana,

na ng'awowonela libatsi baye ipfitsuka.

22 Lekeni Imulungu kwa ngupfu tsake,

kowakoma iwanu wana tsingupfu,

hata ka wokala kwa ukubweda, wao wahela lolelo lya ukukala wagima.

23 Kowaleka webone ka wobwihila na wokala tulu,

lekeni tsinenge tsake tsolola ghawotenda.

24 Iwehile wakwinulighwa matsuwa chidogho, kuya wohupa,

wohulumsighwa ka iwanu wangi,

wosakala na wakufa ka mitsani,

na woganighwa ka pfikungwi pfa ingano.

25 Ka apfi si pfipfo baye,

lelo nani yatsolangusa ka nene na mghutsu,

na chanilonga si chinu baye?"