1 Kuya Ayubu kedika, kalonga,

2 "Tegheletsani ghoya achino chanilonga,

namwe hamtsohulikitsa mtsonikanza ghoya.

3 Hanilonga mndeke nonge,

na hanimalitsa kulonga, ghendeleleni ukuniseka.

4 Nene sisonga na iwanu baye, ila nesonga na Imulungu.

Heule lelo ndeke kubetetsa?

5 Mndole, namwe mkangawale,

mdiwe imilomo yenu kwa ghamoko ghenu.

6 Hanikwalangula aghano ighandawile, nene nopfuka ghendo,

na baho ilukuli lwangu lwoghudema.

7 Heule iwanu wehile woghendelela kukala wagima,

mbaka wolala, na wakongetseka tsingupfu?

8 Wowona iwana wao pfawobweda,

na nenge tsawo tsowona iwatsukulu wao.

9 Tsing'anda tsawo tsokala tulu ghendo, wala kuduhu ukupfuka.

wala Imulungu ng'owatowa baye.

10 Wang'ombe wao wamale wana ngupfu tsa ukuwadina wang'ombe pinga,

na wang'ombe wao pinga wakweleka,

nawo ng'awohosa baye.

11 Wanu wehile wowalapfa iwana wao kunze ka kingili lya ng'olo,

na iwana wao wobigha bigha.

12 Wakwimba aku wotowa tsingoma na pfing'weng'we,

na wodeng'elela hawohulika ichimbeta chotowighwa.

13 Matsuwa ghao ghose wokala kwa kubweda,

nawo mbaka hawakufa ng'awoghaya baye.

14 Lekeni tsawamlongela Imulungu, ‘Utuleke.

ng'atubama baye tumanye tsinzila tsako,

15 Imulungu yana ngupfu yali nani mbaka tumsang'anile?

Angu tupata choni kwa kumlomba yeye?’

16 Wawo wofikitsa ukubweda kwao kwa mmoko mwao,

lekeni nene sitoghola baye acho chawakwalangula iwanu wehile.

17 Angu mala ngapi itala ya wanu wehile yotsimika?

Apfi mala ngapi maghayo ghowatsila iwanu wehile?

Angu mala ngapi Imulungu kowaghalila usungu kwa imaya yake?

18 Angu mala ngapi wawa ka tsani lihighisighwa na libeho,

na wawa ka mibangu isolighwa na inyahemu?

19 Namwe mwolonga, ‘Imulungu kogheka ighehile gha imunu ghatse ghawapate iwanaghe,’

leka yamlihe imwenyegho, yamanye ighehile ghake,

20 Yone kwa tsinenge tsake imwenyegho pfayokomighwa,

yone imaya ya Imulungu yana ingupfu.

21 Angu munu yafile kodaha kuwalangula iwananaghe wayowaleka kuchughu,

ahala imiyetsi yake haitsohupa?

22 Angu kuna munu iyodaha kumfunda Imulungu ukumanya?

Ng'ambe yeye yuyo iyowahigha hata iwakulu?

23 Munu yumwe kakufa na ngupfu tsake tsose,

na ugima wake wose kakala tulu ghendo na kabweda,

24 akuno ilukuli lwake ludegheta,

na imipate yake ina ngupfu.

25 Yungi kakufa akuno ugima wake wose ukala na usungu mmoyo,

wala ng'ana yalanze chinu chinoghile baye.

26 Na wose wowasa mtimbwisi,

wose wamembele wowaghubika.

27 Nene nomanya ghendo champfikitsa,

na aghala ghehile ghambama kunitendela.

28 Kwaapfila mwolonga, ‘Ing'anda ya imkulu ilikwani,

lilikwani lihema lyawakalile iwanu wehile?’

29 Pfihi ng'amuwaghutsile baye awala iwabita nzila?

Angu ng'amtoghole baye aghala ghawamlongeleni?

30 Ka munu yehile kolekelighwa mna matsuwa gha ukughaya,

naye kokombolighwa mna litsuwa lya imaya?

31 Angu nani iyodaha kulonga ghawotenda iwanu wehile?

Angu nani iyodaha kuwaliha kwa aghala ghawatendile?

32 Yeye koghalighwa kuna likabuli,

na iwanu wokalitsa likabuli lyake.

33 Wanu wengi womuwinza kuchughu,

wamwenga womlongolela hayoghenda kutsikighwa,

kuya iwanu womwasila lidongo lughalugha mna likabuli.

34 Lelo mwemwe mdahatse kunikanza kwa kulonga ubotsi,

ghose ghamnyidika ghahela chinu, ila ghamema ughutsu uliyeka."