1 Kuya sofari kulawa Naamati, kedika, kalonga,

2 Aghala ghaulongile ghonitenda nene nikwidike,

kwaapfila sidaha kwinyamala baye.

3 Nihulika maligho ghaunilighile,

lekeni sambi iloho yangu yonitenda nikwidike ka pfanimanya.

4 Ghweghwe komanya ghendo apfila pfapfili kulawa ghumwande,

tangiya iwanu hawekighwe mna isi,

5 ka iwanu wehile wosekelela kwa matsuwa chidogho hela,

na ka iwanu ing'awammanyile Imulungu wodeng'elela kwa chipindi chidogho hela,

6 hata ka maghodo ghake ghopfika kulanga,

na hata ka litwi lyake lyopfika kuna ghamabingu,

7 lekeni katsohupa ghendo ka mipfi yake imwenyegho,

na awala iwamwonile watsolonga, yalikwani?

8 Katsohupa ka apfila pfaili indoto, na ng'atsakoneka keli baye,

katsohupa ka pfaili indoto ya nechilo.

9 Inenge imwonile, ng'aitsomwona keli baye,

na hanu hake hayakalile ng'ahatsomwona keli baye.

10 Iwana wake watsowabama iwanu wahingwa wawatendele uluso,

na kwa ghamoko ghao wenyegho watsakuyitsa tsimali itsibokighwe.

11 Imipate ya ilukuli lwake tsaimema tsingupfu tsa usongolo wake,

lekeni tsose katsowasa natso mtimbwisi.

12 Hata ka ighehile ghamta mna ghumlomo ghwake,

na hata ka koghapfisa hasi ha ilulimi lwake,

13 na hata ka kolema ghendo ukughatema,

ila yeye koghafumba mna ghumlomo ghwake,

14 agho haghopfika munda ghakuwa ghosungu

ka sumu ya nzoka.

15 Katsodeka tsimali tsayametsile,

Imulungu katsomtenda yatsideke kulawa mna lida lyake.

16 Chayokong'a imunu yehile yiyo isumu ya nzoka,

na ghamatsino gha nzoka yana isumu ghatsomluma na kumkoma.

17 Ng'atsopfona baye ipfikolongo,

ipfikolongo ipfimemile uki na matsiwa.

18 Aghala ghayapatile kwa kughaya katsoghoyitsa bila kughaja,

ng'atsobweda baye kwa inyongetsa iyatsopata kwa ukuchulutsa ipfinu pfake.

19 kwaapfila tsakawaoneya wanu iwahingwa na kawaleka wahela chinu,

kaboka tsing'anda atsila yang'atsitsengile baye.

20 Kwaapfila yeye ng'obwihila baye ukubama ukuja,

mng'anda mwake ng'amtsokala chinu baye,

21 Hayakuja yeye ng'oleka chinu baye,

lekeni sambi ukwebweda kwake ako kutsomala.

22 Hayatsakuwa kenela kwa chila chinu,

baho ghamaghayo ghomtsila kwa ukwidukitsa.

23 Baho hayatsobama kulimemetsa lida lyake,

Imulungu katsomghalila imaya yake ikwaka,

nayo itsomtowela ka mvula.

24 Katsotsuma yahepe ukukomighwa na lipanga lya chuma,

lekeni ghumshale ghwa shaba ghutsomhoma.

25 Naye koghusomola kulawa kuna ilukuli lwake.

kusa ukumeletseka kwa ghumshale kutsakuwa na idamu ilawa kuna likini,

na baho wogha utsomwingila.

26 Chisi chikulu chobetetsa chila chinu chayekile,

ghumoto ing'aghutuwighwe na munu ghutsomlakatsa,

na ghutsolambita chila chinu chikalile mng'anda mwake.

27 Kulanga kutsoghubula ighehile ghake.

na isi itsakwinuka imlonge.

28 Ghamatsi gha imvula ighamemile ghatsotsimwagha tsimali tsake,

mna litsuwa lya imaya ya Imulungu.

29 Achi chicho imunu yehile chayakwing'ighwa na Imulungu,

chicho Imulungu chayamwikile.