1 Nyika laghano na tsinenge tsangu,

ndeke kumlolesa ipinga kwa ukumbama.

2 Angu choni chayekighwe imunu kulawa kwa Imulungu kuchanya?

Na choni chayolekelighwa imunu kulawa kwa Imulungu yana tsingupfu iyali kuchanya?

3 Angu si chililo baye ichiwatsila iwanu walihela ihaki,

na si maghayo baye ighowalawila iwanu iwotenda ighehile?

4 Angu yeye ng'okona baye ghose ghanitenda,

pfihi ng'onilololesa baye chila hanighenda?

5 Ka nikala kwa kulonga ughutsu,

na ka ng'ala kwa ukuwabugha iwanu,

6 mlekeni Imulungu yanilinge mna iminzani ilongesa,

naye katsomanya ka nene nahela totso.

7 Ka ghumghulu ghwangu ghubaghuka ghuleka inzila,

na ka ghumoyo ghwangu ghulongotsighwa na tsinenge tsangu,

na ka ghamoko ghangu gheha kwa kutenda nzambi,

8 leka wanu wangi waje achila chanihandile,

na pfijo pfangu ipfili kumghunda wapfing'ole.

9 Na ka ghumoyo ghwangu ghumbama ipinga wa munu,

au ka ning'ali nipfisa hana ghumlango ghwake,

10 leka pinga wangu yamtwangile mmale yungi,

na wamale wangi wawase naye.

11 Alyo ling'awile totso kulu ka tsanenda apfo,

nayo ing'awile nzambi ibamighwa kuhighighwa,

12 kwaapfila inzambi ayo ing'awile ka moto ighulakatsa mbaka kutsimu,

nagho ghung'alakatse pfinu pfangu pfose.

13 Na ka tsaniwema aghala ghawobamighwa niweng'e watumwa wangu iwamale na iwapinga,

ahala hawanililile wonilomba,

14 lelo nitsotenda choni ahala Imulungu hayatsakwinuka?

Nitsomwidika choni hayatsonitsila?

15 Ayula iyaniumbile nene muinda mwa mame wangu,

ng'ambe yuyo iyawaumbile wawo?

Angu si yuyo yumwe baye iyatuumbile wose muinda mwa mai tsetu?.

16 Ka niwema iwahingwa chawabamile,

na ka niwaleka pfitsuka wakale bila chakulolela,

17 ka ndiya chijo changu niliyeka,

na sijile nawo baye iwachuwa,

18 lekeni nene kulawa usongolo wangu niwalela ka na aba wawo,

na kulawa udodo wangu niwalongotsa ipfitsuka.

19 Ka tsanimwona munu koghaya kwaapfila kahela gwanda,

au tsanimwona munu mhingwa kahela gholole lya ukwighubika,

20 na simwing'ile baye ligwanda lya imighala ya ng'olo limtsumbuse,

na ghumoyo ghwake ghunongele mighede,

21 ka tsanimwonela imunu mchuwa,

akuno nomanya ka kuna wanu watsonyapfila kuna libalatsa,

22 leka liyegha lyangu lighojoke hanu hake,

na ghumoko ghwangu ghubeneke hana ichifughumu chake.

23 kwaapfila tsanipfuka ghamaghayo igholawa kwa Imulungu,

kwa ukupfuka ukulu wake nene sidahile baye ukutenda ipfinu apfo.

24 Ka tsanyika lolelo lyangu mna inzahabu,

na niilongela inzahabu yelile, ghweghwe kwa hanu hangu ha ukutsumila,

25 ka tsanideng'elela tsimali tsangu pfatsili nyingi,

atsila tsanipatile kwa ghumoko ghangu,

26 ka tsanilolesa litsuwa haling'ali likwalika,

na ghumwetsi hang'ungali ghoghenda aku ghong'ala,

27 akuno ghumoyo ghwangu chinyelenyele ghonongela niinamile,

na ghumlomo ghwangu ghunonela ghamoko ghangu kwa kuitambikila,

28 Agho nagho ghang'awile nzambi ya ukuhighighwa na walamtsi,

kwaapfila ning'oneke na mghutsu kwa Imulungu iyali kuchanya.

29 Ka ning'adeng'elele apfila aduwi yangu pfayoghaya,

na ka ning'onile pfinogha yeye kulawilighwa na ighehile,

30 ka silekile baye ukumlonga pfihile,

kwa kumlighita yafe.

31 Ka iwanu wa ukaye yangu ng'awaghutsile baye,

nani ng'ana yeghute baye inyama?

32 Kuduhu mgheni iyawasile mnzila,

kwaapfila imilango yangu ikala mwatsi kwa munu iyali mna ghumwanza.

33 Nene sitsipfisile nzambi tsangu ka wanu wamwenga pfawotenda,

kwa kupfisa ighehile ghangu mmoyo mwangu.

34 Sipfukile baye ukwima hambele ha iwanu,

wala sinyamale baye au kwihindila mng'anda,

kwa ukupfuka ukubetsighwa na iwanu.

35 Ka kung'awile na imunu wa kunitegheletsa,

nene nelighita ka chila chinu chanilonga nolongesa,

Imulungu yana tsingupfu yanyidike,

na awala iwonighalila ghamaghomba waghandike.

36 Aho ghendo ning'aghadutile mmayegha,

ning'aghekile mwitwi ka chilemba.

37 Ning'amlongele Imulungu chila chinu chanendile,

ning'amsoghelele ka apfila namunu mkulu.

38 Ka isi yangu ing'anililile nene,

na ghumghunda nagho ghung'alilile,

39 ka ndiya ipfijo pfake bila kuliha,

na kuwakoma iwenyegho,

40 leka imihonga yote hanu haikota ingano,

na mighughu yote hanu haikota ishayili.

Apfo Ayubu kamalitsa ukulonga.