1 Baho Imulungu kamwidika Ayubu mna chipfulapfumbi, kalonga,

2 "Angu nani ayuno iyopfulaghitsa ghanilonga,

iyolonga bila kumanya?

3 Wiyohe mchuno ka kwa mmale,

nene nitsokughutsa, naghwe unyidike.

4 Ghweghwe tsauli kwani nene hanyikile ghumsingi ghwa isi?

Nongele ka komanya.

5 Angu nani iyalingile utali wake, ghweghwe kommanya,

au nani iyagholose lutsabi yailinge?

6 Apfi imisingi yake ikighwe mchanya mwa chinu chachi,

nani iyekile libwe ilikala hana imembe,

7 ahala tsinondo tsa nemitondo hatsing'ali tsakwimba hamwe,

na ahala iwana wose wa Imulungu hawakemelele kwa kudeng'elela?

8 Au nani iyahindile bahali imilango yake,

ahala haitulike kulonga ilawa munda

9 ahala hanitendile libingu liwe gwanda lyake,

na niitsungulusila chisi chikulu,

10 ahala hanikile imibaka kutsunguluka ibahali,

na hanyikile ghamalango ghake na tsikomeo,

11 na kuilongela, ‘Kotsigha ahano, na si ako baye,

na mawimbi ghako ghana ingupfu ghatsitsighila ahano?’

12 Angu tangu woneke tsakulaghitsa imitondo ilawile,

na kululaghitsa lupfilipfili lulangale?

13 Ili mitondo ayo yenele mbaka akula kwaitsighila isi,

na kuwakulupusa iwanu wehile watsume?

14 Isi yakoneka ghoya ka apfila ipfatsighwa gwanda,

na ka chitango chikighwe mna lidongo lya widi lifinighwe.

15 Iwanu wehile ghumwanga ng'awoghubama baye,

kwaapfila ghowaghoma waleke ukutenda ighehile.

16 Angu ma kupfika kuna tsimbwibwi tsa ibahali,

au tsakwanga hasi haghendese ha ibahali?

17 Pfihi mala wakulangusa ghamalango gha lifwa,

mala tsakona ghamalango gha kutsimu?

18 Pfihi komanya ukulu wa isi pfauli?

Longa ka komanya agha ghose.

19 Ilikwani inzila ya ukupfika akula kwaghukala ghumwanga,

na kwani kwachikala ichisi?

20 Angu kodaha kupfisola na kupfighala ako kwapfikalagha,

na udahe kutanga inzila ya ukughenda ako?

21 Ghweghwe komanya ghendo, kwaapfila koneka mwande,

naghwe kukala miyaka mingi.

22 Pfihi mala kwingila mna ikano ya ibalafu,

au mala kuyona ikano ya imvula ya ghamabwe,

23 ghanighekile ghatse mna ghamatsuwa gha ghamaghayo,

na mna ghamatsuwa gha ing'ondo na ukwitowa?

24 Ilikwani inzila ighenda hanu ahala ghumwanga haghugholighwa,

au ako kwalilawa libeho lya mashaliki na kwenela muisi?

25 Angu nani iyekile ipfikolongo pfa ghamatsi gha imvula?

Nani iyalulanguse ilumwesa inzila yake mna ghamabingu,

26 itenda imvula itowe mna isi ing'aikalighwa na munu baye,

na kuna lijangwa lilihela munu,

27 ili isi isakale na ikalile uchuwa yenele ghamatsi,

na imitsani yote mna isi ayo?

28 Apfi imvula ina aba?

Angu aba wa ghamadone gha ilitungwe nani?

29 Angu ibalafu ilawila muinda mwa nani?

Nani iyeleke ng'ungughu ya kulanga?

30 Ghamatsi ghakuwa makomu ka libwe,

na uhanga wa ibahali woganda.

31 Angu kodaha koha hamwe tsinondo tsa chilimia,

na kuleghetsa imitsabi ya tsinondo tsa Orioni.

32 Pfhi kodaha kughalongotsa tsinondo itsikala chifumvughulu mna imisimu yake,

au kodaha kumlongotsa imnyama iyokemighwa dubu hamwe na iwanaghe?

33 Pfihi kughamanya malaghitso igholongotsa lilanga?

Angu kodaha kughatenda ghamalaghitso agho ghalongotse mna isi?

34 Kodaha kukemelela mbaka uhulikike kuna ghamabingu?

Mbaka ghalapfe ghamatsi ghakuhulumkile?

35 Pfihi kodaha kulutuma ilumwesa, nalwo lughende,

na kuya lukulongele, ‘Twetwe twa ahano’?

36 Angu nani iyekile ihekima mna iwanu,

nawo womanya ipfinu kwa tsimbutsi tsawo?

37 Angu nani iyana tsimbutsi tsa ukupeta ghamabingu?

Apfi nani iyodaha kwinamitsa ghamabigha gha ghamatsi gha imvula ighali kulanga?

38 Ighotenda litimbwisi ligande,

na lidongo liwe kododo.

39 Kodaha kumuwingila isimba pinga mawingo,

au kuwatenda simba wadowado wana inzala weghute,

40 hawepfisa mna tsimango tsawo,

au hawowasa kubagho wapfisile?

41 Angu nani iyomwing'a ibondwa ichijo,

iwanaghe hawonililila nene Imulungu,

na kwanga ako na ako kwaapfila wahela chaukuja?"