1 Kuya Elifazi, kulawa Temani kamwidika Ayubu kalonga,

2 "Angu imunu kodaha kumwapfila Imulungu?

Apfi imunu yana ihekima kodaha kumtenda Imulungu yebwede?

3 Angu ghweghwe komdeng'elesa Imulungu kwa koneka kugholoka?

Hata ka tsinzila tsako tsinogha,

angu yeye yatsopata choni?

4 Angu apfila pfaumpfuka Imulungu ng'ambe komtenda yakumanile,

na yakughale kuna libalatsa?

5 Angu ighehile ghako si makulu baye?

Na tsinzambi tsako tsahela ha ukutsighila.

6 Kumbama ndughu yako yakulihe sendi yakukopile,

na kuwatsula magwanda ghawo, kuwaleka chidako.

7 Kuwema ghamatsi awala iwepfile,

na awala wana inzala kuwema ichijo.

8 Kumleka imunu yana tsingufu yaisole isi,

na kumleka imunu iyotegheletsighwa yakale mumo.

9 Kumleka ichitsuka yoke chimokomoko,

na ng'uwonele libatsi baye iwachuwa.

10 Apfo imitegho ikutsingila chila ubali,

na wogha ukutsile kwa kwidukitsa ukughogha.

11 Ichisi chikutsinga uleke kona chinu,

na matsi ghakutsinga

12 Angu Imulungu ng'ali kuchanya kulanga baye?

Lola, kakuchanya kubita tsinondo tsose.

13 Lekeni kolonga, ‘Angu Imulungu yomanya choni?’

Katsodaha kuhigha kulawa mna chisi chikulu?

14 Mabingu makulu ghamdiwa, apfo ng'otwona baye,

yeye kakwanga kuna lilanga.

15 Pfihi kutsokala ka pfaukalile ghumwande,

apfila pfawakalile iwanu wehile?

16 Wao wahupa ng'ana matsuwa ghao ghapfike baye,

imisingi ya ugima wawo ikululusighwa na ghamatsi.

17 Wawo tsawamlongela Imulungu apfino, ‘Tuleke,

angu Imulungu yana ingupfu yodaha kututenda choni?’

18 Na yeye yuyo iyatsimemetse tsing'anda tsao ipfinu pfinoghile.

Lekeni nene sitoghola baye acho chawakwalangula iwanu wehile.

19 Iwanu wana ihaki woghona agho igholawila na wodeng'elela,

na iwalihela matotso nawo wowaseka, wolonga,

20 ‘Maaduwi tsetu wakomighwa ghendo,

na ghumoto ghulakatsa tsimali tsawo tsawalekile.’

21 Lelo, Ayubu umtoghole Imulungu, ukale tseghamba,

na baho ighanoghile ghatsokutsila.

22 Bokela aghala ghayokufunda igholawa mna ghumlomo ghwake,

na ghayokulongela ugheke mmoyo mwako.

23 Ung'amyila Imulungu wako yana ingipfu, kutsohona,

na ung'agheka ighehile ghakale kutali na ng'anda yako,

24 uyone inzahabu yako ka timbwisi,

na uyone inzahabu ya Ofili ka libwe lya kulukolongo,

25 baho Imulungu yana ingupfu katsakuwa nzahabu yako,

na katsakuwa fetsa yako ya bei ng'ulu kuna ghweghwe.

26 Naghwe kutsomdeng'elela Imulungu yana ingupfu,

naghwe kutsakwinula uhanga wako umlolele Imulungu.

27 Kutsomlomba, naye katsokuhulika,

naghwe kutsotenda aghala ghaulongile kutsomtendela Imulungu.

28 Achila chaubama ukutenda, chitsotendeka,

na ghumwanga ghutsomwemwesela tsinzila tsako.

29 Iwanu hawohulumsighwa, naghwe kutsolonga, ‘wenule keli,’

na baho yeye katsomkombola ayula iyehulumse.

30 Naye katsomkombola hata ayula iyalihela totso,

naghwe kutsokombolighwa kwa aghala ighanoghile ghautendile."