1 Baho Ayubu kedika, kalonga,

2 Nene nihulika pfinu pfingi ka apfo,

mwemwe wose mwa wanu iwokanza imnitenda nighaye.

3 Angu ukulonga hela kwenu akuno kutsomala tsuwachi?

Apfi chinu chachi ichiwadesa mbaka mwoghendelela kulonga na nene?

4 Nene pfipfila nodaha kulonga ka mwemwe,

ka mng'aghayile pfanighaya nene,

ning'adahile kumlongani ghendo

na kumhighisilani litwi lyangu.

5 Ning'awaghumile ghumoyo kwa aghano ghanimlongelani,

mng'onile ng'apfu kwa achila chanilonga,

6 Hata ning'alonga, usungu wangu ng'auhola baye,

na ning'enyamala tulu, pfipfila usungu wangu ng'aumala baye,

7 Imulungu kanitenda nimale ghendo,

kawatenda iwanu wa ikaye yangu wawe na uchuwa.

8 Kungogha, na awo uwo ukalangama ulangusa iwanu ka nene nitotsa,

na nene nisoka ng'ani,

hata uhanga wangu wolangusa ka nitotsa.

9 Kwa imaya yake Imulungu kanitsahula tsahula,

kanighudubukila kwa kughegheda ghamatsino ghake,

kanitsodolela tsinenge tsake ka aduwi yangu.

10 Iwanu wasama imilomo yawo wonibetsa na woniseka,

wetingana hamwe wonitsingila na wonitsabula mmakanza.

11 Imulungu kanighela kuna iwanu wana inzambi,

na kanyasa mna ghamoko gha iwehile.

12 Nene tsaning'ali nobweda, lekeni yeye kanibenabena,

kanifida isingo, kuya kanihonda,

kanyimisa wima niwe hanu hake ha ukulengela imishale yake,

13 na iwanu wake iwakwasa imishale wanitsunguluka,

wotsihoma tsifigho tsangu, naye ng'onyonela libatsi baye,

na kaimwagha hasi inyongo yangu kulawa kuna likini.

14 Koghendelela kunilagha na kunibena bena,

na konitsumila yanitowe ka asikali iyana ngupfu.

15 Nidadatsa ghamaghunila ghawe nguo nipfale nidomboketse,

na ukulu wangu wose niumwagha mtimbwisi kulangusa ka nene nitowighwa,

16 chihanga changu chibutsuka kwa ukulila,

tsikope tsangu tsiwa nitu ti,

17 hata ka ghamoko ghangu ng'aghatendile ighehile baye,

na ukulomba kwangu kwela.

18 Ghwe isi, leka kughubika idamu yangu aila imwaghike hasi,

leka ichililo changu chenele chila hanu.

19 Lola, hata sambi iyonyamila kakulanga,

na yeye iyonilongelela kakuchanya.

20 Sale tsangu wonibetsa,

lekeni nene tsinenge tsangu tsomlapfila masotsi Imulungu.

21 Ng'apfu yang'alawile baho munu wa kunilongelela kwa Imulungu,

ka imunu pfayomlongelela isale yake.

22 Kwaapfila ing'abita miyaka chidogho,

na nene nitsakuka, kulawa ako nene sitsakuya keli baye.