1 Elihu kaghendelela kulonga, "Lekeni sambi, Ayubu, tegheletsa ghamalonga ghangu,

tegheletsa chila chinu chanilonga,

2 Lola, nakwasama ghumlomo ghwangu,

na ilulimi iluli mna ghumlomo ghwangu lulonge,

3 Ghamalonga ghangu gholawa mna ghumoyo ighunoghile,

na ghumlomo ghwangu ghwolonga aghala igholongesa ghanimanya.

4 Iloho ya Imulungu iniumba,

na ghumuhe ghwa Imulungu yana tsingupfu ghwongaya ugima.

5 Lelo nyidike, kama kodaha,

ghubama kunongela gheke ghoya, kuya wime ulonge na nene.

6 Nene na ka ghweghwe hambele ha Imulungu,

nene pfifpfia niumbighwa kulawa mna lidongo.

7 Apfo uleke kunipfuka,

na ghanilonga ng'aghatsakuwa matito baye kuna ghweghwe,

8 Kulonga ghendo, na nene nikutegheletsa,

nihulika ghose ghaulongile.

9 Ghweghwe tsakulonga, ‘Nene nyela, na nahela totso,

ninogha, na sina nzambi baye,

10 lekeni Imulungu kombona nene nitotsa,

yeye kombona nene nomwihila.

11 Yeye koghoha ghamaghulu ghangu kwa iminyololo,

na kokaghula tsinzila tsangu kwa habehi.’

12 Lekeni nokulongela, mna alino ghweghwe kutotsa,

kwaapfila Imulungu mkulu kubita munu wowose.

13 Heule uhila naye,

apfi ung'amghutsa ng'atsokwidika baye aghala ghaulonga?

14 Kwaapfila Imulungu kana nzila nyingi tsa ukulonga na iwanu, sambi kolonga kwa nzila imwe,

hambele kolonga kwa nzila ingi, na imunu ng'omanya baye.

15 Kolonga kubitila tsindoto, na mna ghamaono gha nechilo,

nongo ndito hatsiwatsila iwanu,

hawowasa mna ipfinanda pfawo.

16 Baho yeye kopfughula ghamaghutwi ghao,

na kowaghela wogha iwanu ahala hayowakanya,

17 ili yawatende waleke ighehile,

na kumwika kutali na ichidandali,

18 apfo komkinga imunu yaleke ukughenda kutsimu,

na yaleke kukomighwa na lipanga.

19 Imunu kofundighwa na usungu wayopata mna ilusatsi lwake,

na kwa imipate yake ighendelela kutama bila kuleka,

20 nacho ichijo ng'achitsomnoghela baye,

hata ichijo ichilimta chitsomdesa.

21 Ilukuli lwake lwosoka, na ng'alutangika keli baye.

na imipate yake ipfisike yolawilila kunze.

22 Iloho yake yosoghela habehi na likabuli,

na yeye katsokala habehi na ukukomighwa.

23 Ka kuna malaika habehi naye, iyoghombeletsa

yumwe kulawa mna elufu imwe, wakumlongela imunu achila ichinoghile kuna yeye,

24 naye komwonela libatsi, komlongela Imulungu,

‘Mkombole yaleke kughenda kuna likabuli,

nene ninacho ichinu cha ukumkombola.’

25 Baho ilukuli lwake lutsodegheta ka lwa imwana,

naye kakuya ka pfayakalile mna ghamatsuwa gha usongolo wake.

26 Kuya komlomba Imulungu, naye komtogholela,

kochona ichihanga cha Imulungu aku kosekelela,

naye Imulungu komuyitsila imunu ihaki yake.

27 Yeye koghenda kwa iwanu kolonga,

‘Tsanenda nzambi, na nitenda aghala ighoneke gheha,

lekeni nene sihighighwe baye ka pfaibamighwe.

28 Imulungu kanikombola ndeke ukughenda kuna likabuli,

na nene nitsokala mgima, na kona ghumwanga.’

29 Imulungu kowatendela iwanu aghano

mala mbili, hata mala ndatu,

30 ili yamkombole imunu yaleke ukufa.

na yone ghumwanga ghwa ugima.

31 Lelo, walangitse Ayubu, unitegheletse nene,

winyamale, nene nilonge,

32 ka kuna chinu cha ukulonga, unyidike,

ulonge kwaapfila nene nobama woneke kwahela totso,

33 lekeni ka kwahela cha ukulonga, nitegheletse,

winyamale, nikufunde ihekima."