1 Tsakuna munu yumwe mna isi ya Usi, iyakemighwe Ayubu. Imunu ayo tsakahela matotso na tsakanogha, yeye tsakampfuka Imulungu na yang'ali yohepa ukutenda ighehile. 2 Ayubu tsakana wana wamale saba na wana wadatu mapinga. 3 Tsakana ng'olo elufu saba, ngamiya elufu ndatu, ng'ombe wa ukulimila elufu imwe, na pfihongwe mapinga miya tano, pfipfila tsakana watumwa wengi. Apfo imunu ayo tsakana mali nyingi kubita wanu wose iwakalile mashaliki. 4 Na iwanaghe wang'ali woghendagha wakaje na ukunwa mna ing'anda ya ndughu yawo yumwe, na chila ndughu kwa tsuwa lyake. Na wang'ali wowakemagha lumbu tsawo wadatu watse waje na wanwe hamwe nawo. 5 Na hawomalitsa ukutenda apfo, Ayubu yang'ali yowakemagha iwanaghe watse yawatende wele, naye kolamka lupfilipfili, kolapfa nambiko ya ukulakatsighwa kwa chila mwanaghe, aku yang'ali yolongagha, songaha wanangu watenda nzambi na wamligha Imulungu mna imimoyo yawo. Apfino pfipfo pfayang'ali yotendagha Ayubu.

6 Tsuwa limwe malaika wa Imulungu wetingana hamwe hambele ha IMNDEWA, naye Shetani tsakaghenda baho. 7 IMNDEWA kamghutsa Shetani, "Kwaulawile kuhi ghweghwe?" Shetani kamwidika IMNDEWA, "Nene ndawa kwanga kwanga na kutsunguluka tsunguluka muisi." 8 IMNDEWA kamlongela Shetani, "Pfihi kumwona mtumighwa wangu Ayubu? Haduhu munu yungi iyali ka yeye mna isi yose. Yeye ka munu iyalihela nzambi na kanogha na kompfuka Imulungu, naye kohepa ukutenda Ighehile." 9 Baho Shetani kamwidika IMNDEWA, "Angu Ayubu kompfuka hela Imulungu? 10 Angu si ghweghwe baye yumkingile yeye na ing'anda yake, na pfinu pfose pfayali napfo? Ghweghwe kutsibaliki tsing'onde tsa ghamoko ghake, apfo wang'olo na wamene na wanyama wangi wenela muisi mwose. 11 Lekeni sambi usole pfinu pfose pfayali napfo, naye katsokuligha aku ghweghwe kolola."

12 Imulungu kamlongela Shetani, "Pfinogha, kodaha kutenda chochose mna chila chinu chayali nacho, lekeni yeye imwenyegho uleke kumlagha." Apfo Shetani koka hambele ha IMNDEWA.

13 Tsuwa limwe, iwana wa Ayubu iwamale na iwapinga hawang'ali wakuja na kunwa dipfai mna ing'anda ya imbala wao, 14 mtumighwa yumwe kamtsumila Ayubu, kamlongela, "Tung'ali tulima na wang'ombe, na wapfihongwe wang'ali wakuja habehi nawo. 15 Baho wanu wa Seba watupfingila, wawasola iwanyama na iwatumighwa wawakoma kwa lipanga. Nene niliyeka yuyo yanihonile nitse nikulongele." 16 Ng'ana yamalitse ukulonga agho, munu yungi katsa kamlongela Ayubu, "Ilumwesa luwalakatsa iwang'olo na iwatumighwa wako, nene niliyeka yuyo yanihonile nitse nikulongele." 17 Ayo naye ng'ana yamalitse ukulonga, munu yungi naye katsa kamlongela Ayubu, "Wakalidayo wakala makingili madatu, wawapfingilila wangamia, wawasola na wawakoma iwatumighwa wako kwa lipanga, nene niliyeka yuyo yanihonile nitse nikulongele." 18 Ayo naye ng'ana yamalitse ukulonga agho, munu yungi katsa kamlongela Ayubu, "Iwanagho wamale na mapinga wang'ali wakuja na kunwa mna ing'anda ya mbala wao, 19 baho inyahemu iduma kulawa kunyika, na iitowa ing'anda chila ubali, nayo ing'anda iwaghwila, na iwanagho wose wafa, nene niliyeka yuyo yanihonile nitse nikulongele." 20 Kuya Ayubu kema wima, kadegha ghamagwanda ghake, kabeya tsimvili tsake kamwinamila Imulungu mbaka uhanga wake udonza hasi. 21 Baho kalonga, "Nene nyelekighwa kulawa munda mwa mai wangu nachidako, na nitsakuka nachidako, IMNDEWA kalapfa na IMNDEWA kasola, taghwa lyake linulighwe." 22 Mna agho ghose Ayubu ng'atendile nzambi baye, wala ng'apfikitse baye ka ghayatendile Imulungu gheha.