1 Nene nyipfa ukukala mgima,

kwa usungu wanili nawo, nitsolonga ghendo,

nitsolonga apfila ghumoyo ghwangu pfaghukona usungu.

2 Nitsomlongela Imulungu, "Uleke kunihigha ka nitotsa,

lekeni unilongele angu una choni na nene?

3 Angu kwakona pfinogha ukunidununza nene?

Heule unilema, nene inili sang'ano ya ghamoko ghako,

na kosekelela chawobama kutenda iwehile?

4 Pfihi ghweghwe kuna nenge,

au pfihi kwakona ka iwanu pfawakona?

5 Pfihi matsuwa ghako ka ghamatsuwa gha imunu,

na miyaka yako ka imiyaka ya imunu?

6 Mbaka koghutsa ghutsa ighehile ghangu,

na kubamabama wone inzambi yangu?

7 Aku ghweghwe komanya ghendo ka nene nahela totso,

wala kuduhu munu iyodaha kuniswekula nilawe mna ghamoko ghako.

8 Ghamoko ghako ghanifina na ghaniumba,

naghwe sambi kughalambuka na konikoma.

9 Ukumbuke ka kuniumba kwa lidongo,

pfihi kutsombuyitsa kuna litimbwisi keli?

10 Pfihi si ghweghwe baye yunighidile ka tombo,

na kuniganditsa ka jibini?

11 Kuluumba ilukuli lwangu kwa mipate na tsinyughe,

na kulughubika kwa inyama na ngotsi.

12 Kungaya ugima na kunitendela uluso mkulu,

kwa apfila pfaunyalangitse iloho yangu iwa na ugima.

13 lekeni aghano ghose kughapfisa mmoyo mwako,

na nomanya achi chicho chaubamile kutenda.

14 Ka ning'atendile nzambi ghweghwe ung'ambonile,

wala tsang'uleka ukunihigha baye.

15 Ka nene nitenda ghehile, nitsochona!

Hata ka nene notenda ighobamighwa, sidaha baye kwinula litwi lyangu nitunye,

kwaapfila nina chinyala chikulu, hanilola ghamaghayo ghangu.

16 Ning'enula litwi lyangu uchanya nighode, ghweghwe koniwinda ka isimba,

na kutsolangusa ngupfu yako ng'ulu inilagha nene.

17 Ghweghwe kongalilagha iwanu wako wanitowe,

na koghendelela kunighudubukila,

kongalila makingili gha iwanu iwonyihila wandaghe.

18 Hebali undapfile munda mwa mai wangu?

Ng'apfu ning'afile ng'ana nenge ya munu imbone,

19 kwaapfila ning'awile soneke baye,

ning'alumbilile ghendo kulawa munda mbaka kuna ilikabuli.

20 Angu matsuwa ghangu gha ukukala mgima ng'ambe ghachidogho?

Leka kunitsupfa, tanu undeke chidogho mbone ng'apfu,

21 ng'ana mbuke ako baye, akula nene ning'aghenda sidaha kuya keli,

ako kuna isi ya hutsuni, na chisi totolo,

22 kuna isi ina chilo chikulu,

na chisi totolo, na ina ipfulughu,

ako ghumwanga ghwenyegho ka chisi."