1 Kuya Elifazi, munu wa Temani kamwidika Ayubu, kalonga,

2 Angu, imunu yana ihekima kodaha kwidika bila kumanya chinu,

ka imunu yana lida limemile libeho lya Mashaliki?

3 Apfi kodaha kulonga malonga ing'aghomwapfila imunu,

malonga ing'aghokindika?

4 Lekeni ghweghwe kobetsa hata ukumpfuka Imulungu,

na koghoma ukumlomba Imulungu.

5 Kwaapfila tsinzambi tsako tsokulangulitsa ulonge ighehile,

naghwe kusaghula ukulonga ka wanu iwobugha.

6 Ghumlomo ghwako ghumwenyegho ghokuhigha, wala si nene baye,

na ilulimi lwako lwenyegho lwolangusa ghendo.

7 Angu ghweghwe kwa wakwanza ukwelekighwa?

Au pfihi ghweghwe koneka ng'ana ipfidunda pfoneke baye?

8 Pfihi ghweghwe tsaung'ali uhulikitsa mna libalatsa lya Imulungu?

Angu ihekima kwinayo ghweghwe uliyeka?

9 Chinu chachi chaumanya twetwe ngatuchimanyile baye?

Chautanga choni ghweghwe twetwe tuleke kuchitanga?

10 Mna twetwe kuna wanu wana tsimvi na iwalalile,

na wabala kubita hata aba wako.

11 Apfi ukukanza kwayokukanza Imulungu kudodo?

Angu ukulonga kwake kwa kuhola si chinu baye kuna ghweghwe?

12 Heule ughudubuka mmoyo,

mbaka tsinenge tsako tsiyauke?

13 Mbaka iloho yako yomghudubukila Imulungu,

na kolonga mbuli tsihile kwa ghumlomo ghwako?

14 Angu imunu yali chinu chachi mbaka yoneka kela hambele ha Imulungu,

ayula yelekighwe na ipinga yakonekatse kana haki?

15 Ka Imulungu ng'owatoghola baye hata wamalaika wake,

nalyo lilanga ng'alyelile baye hambele hake,

16 lelo itsakuwatse kwa imunu iyodesa na iyaghile,

imunu ghendo iyotenda ghehile ka ukunwa ghamatsi!

17 Lelo nitegheletse, na nene nitsokulangusa,

nitsokulongela aghala ghambonile,

18 aghala iwana ihekima ghawalongile,

na iwahenga wao ng'awaghapfisile baye,

19 awala iweng'ighwe isi waliyeka,

wala mgheni ng'ang'ile baye mna wao.

20 Imunu iyehile kodununzika kwa usungu matsuwa ghake ghose,

kwa miyaka yose yekilighwe ayula iyodununza wayaghe.

21 Litsi lya ipfinu ipfighela wogha lyomwasukila mmaghutwi,

hayokona kebweda ahala iwanu iwoboka womtsila.

22 Imunu iyehile kahela lolelo lya kulawa mchisi,

naye kobeta ukufa kwa ukukomighwa na lipanga,

23 koyunga yunga kobama ichijo, kolonga, chili kwani?

Naye komanya ghendo ka tsuwa lyake lya ghamaghayo lyahabehi.

24 Maghayo na usungu pfomtenda yapfuke,

pfomtsila ka mfalume iyobama kwitowa ng'ondo.

25 Kwaapfila kagholosa ghumoko yamtowe Imulungu,

na kotamba ka kodaha kumhuma Imulungu iyana ingupfu,

26 kosumka kwa chidandali yamtowe,

akuno kana ingao ng'ulu na ing'aidaha kubeneka,

27 kwaapfila ichihanga chake chineneha,

na ichuno chake chineneha sideke.

28 Lekeni matsuwa ghakutsa katsokala mna imiji ilekighwe,

mna tsing'anda ng'atsikalighwa na munu baye,

tsing'anda itsitsakuwa mahame.

29 Imunu ayo ng'atsakuwa tajili baye,

na tsimali tsake ng'atsitsokala baye,

wala ng'atsitsakongetseka baye muisi,

30 ng'atsolawa baye mna ichisi cha lifwa,

yeye kakuwa ka mbiki, milambi ya ghumoto itsopfulutsa tsinyotela tsake,

na ghumuhe ghwa Imulungu ghutsomghulusa kutali.

31 Yaleke kwighutsukila imwenyegho kwa kwihuwila ipfinu ipfili si chinu baye,

kwaapfila ng'atsopata chinu baye.

32 Ayo katsolihighwa ng'ana matsuwa ghake ghapfike baye,

na maputila ghake ng'aghatsakuwa na ubisi baye.

33 Kakuwa ka mnzabibu ighulaghatsa tsinzabibu tsimbisi,

na ka mnzeituni ighupaghatisa ghamaluwa ghake.

34 Kwaapfila wose iwomlema Imulungu ng'awatsopata wana baye,

na ghumoto ghutsolakatsa tsing'anda tsa iwabokela hongo.

35 Wao wopanga pfinu pfa ung'enye, na wotenda ighehile,

na imimoyo yawo yomema ughutsu.