1 Lola! Nenge tsangu tsona aghano ghose,

na maghutwi ghangu ghahulika na kughamanya agho.

2 Agho ghose ghammanya mwemwe, na nene pfipfila nighamanya,

nene sili munu hela baye kuna mwemwe,

3 lekeni nobama nilonge na Imulungu yana Ingupfu,

nobama ghomba lyangu nilonge na yeye Imulungu.

4 Ila mwemwe, mwonitungila ughutsu,

wose mwawaghanga ing'amdaha chinu baye.

5 Ng'apfu mng'enyamale ghendo,

aho mng'oneke mna hekima!

6 Lelo tegheletsani chanilonga,

na mhulilke achila chaniwadedesa kwa ghumlomo ghwangu.

7 Apfi mtsomlongelela Imulungu kwa ighehile,

na mtsomlongelela kwa ughutsu?

8 Pfihi mwobama kumnoghelesa Imulungu?

Pfihi mwodaha kumlongelela Imulungu mna lighomba lyake.

9 Angu itsakuwa pfinogha kuna mwemwe ka yeye yang'awakaghula mwemwe?

Pfihi mwodaha kumghutsukila Imulungu,

ka pfamuwaghutsukila iwanu?

10 Yeye katsowamanila ghendo,

ka mwowanoghelela iwanu chinyelenyele.

11 Angu ukulu wake ng'aumtendani mpfuke baye?

Apfi pfayoghela wogha mwemwe ng'ampfuka baye?

12 Agho ghamlonga gheghala na lipfu,

ghamlonga mwiyamile si chinu ghendo baye, gheghala na ubanda ubomoka wa lidongo lya widi.

13 Nyamaleni, mnileke nilonge,

na agho ighatsondawila ghalekeni ghamdawile.

14 Hebali niyike nimwenyegho mna ukufa,

na niwaghitse ugima wangu iuli mna ghamoko ghangu?

15 Lola, yeye katsonikoma, lekeni nene ning'ali nomlolela yeye,

ona ghendo, nitseyamila tsinzila tsangu hambele hake.

16 Ning'atenda apfo, pfipfo pfanitsoswekuka,

kwaapfila imunu ing'ayompfuka Imulungu ng'atsodaha kumsoghelela baye.

17 Tegheletseni ghoya ghamalonga ghangu,

na ghanilonga ghengile mmaghutwi mwenu.

18 Mlole lelo, nilika ghoya ghomba lyangu,

kwaapfila nomanya ghendo nene nahela matotso.

19 Angu nani iyatsonipfughulila ghomba?

Ka kabaho, nene nitsenyamala tulu nife.

20 Lekeni ghwe Imulungu, unitendela ipfinu apfino pfili,

na nene sitsopfisa chinu baye kuna ghweghwe.

21 Tanu usoghetse kutali ghumoko ghwako kulawa hana nene,

kuya uleke kunenda nipfuke na mbone wogha.

22 Baho unikeme na nene nitsokwidika,

au unileke nilonge, naghwe unyidike.

23 Nene nitendile ghehile mangapi, na nzambi tsangu ngapi?

Unilanguse litotso lyangu na inzambi yangu.

24 Heule upfisa uhanga wako,

na kombona nene ka na aduwi yako?

25 Pfihi kutsolughela wogha lutsani iluhighisighwa na libeho?

Au kutsoiwinzilitsa imibangu inyalile?

26 Kwaapfila kunyandikila pfinu pfa usungu,

na kunitwika tsinzambi tsangu tsa usongolo.

27 Koghoha ghamaghulu ghangu mna iminyololo,

na kotsiwinza nzila tsangu,

na kwakwika chitango haghokanyagha ghamatsayo ghangu.

28 Apfo imunu komala ka chinu cholile,

ka gwanda lijighwe na wang'onyo.