1 Baho Bilidadi, kulawa Shuhi kedika, kalonga,

2 Kutsobama bama cha ukulonga mbaka tsuwachi,

Tanu walangule, hambele twetwe tutsolonga.

3 Heule twetwe twakoneka ka twawanyama?

Heba twetwe twakoneka ka wabotsi hambele hako?

4 Kwelagha ghumwegho kwa imaya yako.

Pfihi isi ilekighwe iliyeka kwaajili yako ghweghwe?

Angu ghamambalawe ghabulighwe kulawa hanu hake?

5 Ona, ghumwanga ghwa imunu yehile ghutsimighwa,

na lilambi lya ghumoto ghwake litsimika.

6 Na ghumwanga ighuli mna ing'anda yake ghuwa chisi,

na itala ikighwe mchanya mwake imwangatsile itsotsimika,

7 na matsayo ghake ghana ingupfu ghatsohungutsighwa ingupfu,

ghayobama kutenda ghatsomghwisa hasi.

8 Matsayo ghake mwenyegho ghatsomwonza mna lwapfu,

na imighulu yake imwenyegho itsoghoghighwa,

9 inyonzo itsomwonza kuna ichisegheyu.

nayo itsomnanahila kwa ngupfu.

10 Wampfisila inyonzo hasi mna lidongo,

na ghumtegho ghwikighwa mna inzila yake.

11 Wogha utsomtenda yapfuke chila ubali wayoghenda,

utsomuwinzilitsa chila hayokanyagha litsayo lyake.

12 Inzala yommalitsa tsingupfu tsake,

na ghamaghayo ghombeta ghampate hayatsakughwa hasi.

13 Ghamaghayo agho ghatsoija ingotsi yake,

na utamu wihile utsakuja ipfilungo pfa ilukuli lwake.

14 Imunu iyehile katsong'olighwa kulawa hana ing'anda yake iyeihuwila,

na katsoghalighwa kuna imfalume iyopfukighwa.

15 Mna ing'anda yake ng'amtsokala chinu baye,

ghumoto ghwa chibiliti ghutsolakatsa chila chinu mkaye yake.

16 Yeye keghala na mbiki ghuna imitsitsi inyalila mwidongo,

na ghamaputila ghake ghatsosakalila mchanya.

17 Naye ng'atsokumbukighwa baye muisi,

na mna isi litaghwa lyake ng'alitsakuwa keli baho baye.

18 Imunu iyehile wamlapfa hana ghumwanga wamwasa kuna ichisi,

wamuwinga kutali yalawe mna isi.

19 Yeye kahela wana wala watsukulu mna iwanu wake,

wala ng'alekile mwana baye kokose kwayakalile.

20 Iwanu iwokala maghalibi wakangawala na aghano ighampatile,

na iwanu iwokala mashaliki wengilighwa na wogha.

21 Ona, ghendo atso tsitso tsing'anda tsa imunu iyehile,

pfipfo pfahali hanu hayokala imunu ing'ayammanyile Imulungu.