1 Baho Ayubu kanza ukulonga, aku kolighita litsuwa lyayoneke.

2 Naye Ayubu kalonga,

3 "Iilighitighwe litsuwa alila lyanyoneke,

na ichilo achila hailongighwe,

‘Inda ya mwana mmale ikindighwa.’

4 Litsuwa alyo likale na chisi,

Imulungu iyali kulanga yaleke kulilola,

wala ghumwanga ghuleke kulangatsa,

5 likale na chisi, na chisi chikulu totolo.

bingu kulu lilighubike,

na chisi cha nemisi chilighume wogha.

6 Kuya ichilo acho chiwe na chisi chikulu,

chileke kupetighwa mna ghamatsuwa gha ghumwaka,

wala chileke kwingitsighwa mna ukupetighwa imiyetsi.

7 Ona, ichilo acho chileke kuwa na pinga iyokinda inda,

chiseko cha ukudeng'elela chileke kuhulikika.

8 Iwanu iwolighita ghamatsuwa, nawo walilighite litsuwa alyo,

na awala iwamanyile kulilamsa litsoka likemighwa Lewiyatani walihinye litsuwa alyo.

9 Tsinondo tsake tsa lupfilipfili tsiwe chisi,

itsibama kupata ghumwanga lekeni ng'aghulawila baye,

wala tsileke kona miyale ya litsuwa lya nemitondo,

10 kwaapfila ichilo acho ng'achihindile baye inda ya mai wangu,

chindeka nene nyoneke, mbone ghamaghayo aghano ghose.

11 Heule sifile baye haning'ali na munda,

na hebali sihupile baye bahala ghendo handawile munda?

12 Heule wenye wangu yanyeleke,

hebali nyong'ile ghamatombo ghake?

13 Kwaapfila aho ning'atsikighwe na kukala tulu,

ning'awasile na kubwihila,

14 hamwe na wafalume na iwakulu wa isi,

iwatsengile keli tsing'anda tsinoghile itsikalile mahame.

15 Ning'akalile hamwe na iwakulu wana tsinzahabu, na iwamemetse tsifetsa tsing'anda tsawo,

16 au ning'atsikighwe ka imwana yafilile munda,

ka imwana iyoneke sambi, na ng'ana yone litsuwa baye.

17 Ako iwehile woleka kuwadepfetsa iwanu,

na iwepfile wobwihila.

18 Ako hata iwohighwe wobweda hamwe,

ng'awohulika baye imkulu wao iyowemilila pfayowamanila.

19 Ako iwakulu na wadowado wakuko,

na iwatumwa walekelelighwa kulawa kwa iwatwatsa wao.

20 Heule imunu iyali mmaghayo yeng'ighwe ghumwanga?

Na wana usungu mna ghumoyo weng'ighwe ugima,

21 iwobetetsa ukufa, lekeni ng'awakufa baye,

iwobama ukufa kubita apfila imunu pfayobama ihatsina ipfisike,

22 angu iwanu ka awo ng'awatsodeng'elela baye na kubigha,

hawatsolyona likabuli?

23 Heule imunu iyana inzila ipfisike yeng'ighwe ghumwanga.

ayula Imulungu iyamwikile ubanda umtsunguluke?

24 Kwaapfila ukughutilila chicho ichijo changu,

na ghamasotsi ghangu koghidika ka matsi,

25 kwaapfila ichinu achila chanipfuka chicho ichinitsila,

achila ichingaya wogha chicho ichindawila.

26 Sikona ng'apfu baye, wala sikala tulu baye,

wala sibwihila baye, lekeni maghayo ghaliyeka ighonitsila."