1 Angu imunu ng'alihela ng'onde ng'omu baye muisi?

Na matsuwa ghake ng'aghali ka matsuwa gha chibaluwa baye?

2 Yeye ka mtumwa iyololela ng'ani kukala hachimbeho,

na ka imunu iyosang'ana pfayobetetsa kwing'ighwa tsisendi tsake.

3 Pfipfo nene nying'ighwa miyetsi ya maghayo,

na nying'ighwa usungu chilo na chilo.

4 Haniwasa nolonga, nitsolamka tsuwachi?

Kwaapfila chilo chitali,

nobilinduka bilinduka mlili mbaka kuche.

5 Lukuli lwangu lumema membele na chikwe.

Ingotsi yangu yopfimba, na udusi wotumbuka.

6 Matsuwa ghangu ghotsuma kubita chinu cha ukudadatsa ichidadatsa himahima,

nagho ghotsigha bila kuwa na chinu cha ukulolela.

7 Ghwe Imulungu, ukumbuke, ugima wangu pfauli ka muhe,

na tsinenge tsangu ng'atsitsakona keli ighanoghile baye.

8 Inenge indola sambi, ng'aitsombona keli baye,

na baho tsinenge tsako hatsindola, nene sitsakuwa baho baye.

9 Ka libingu pfalitoyoyoka na kuhupa,

pfipfo kwa ayula iyoghenda kutsimu, ng'akuya keli baye.

10 Ng'akuya keli baye ukaye yake yakale,

na hanu hake hatsomsemwa ghendo.

11 Apfo sitsenyamala baye,

nitsolonga apfila ghumoyo ghwangu pfaghughaya,

nitsololoma apfila ghumoyo ghwangu pfaghuli na usungu.

12 Pfihi nene na ibahali, au nanyangumi

mbaka unyikile iwanu wanikalitse?

13 Hanilonga lunanda lwangu lutsonenda nibwihile,

pfilagho pfangu pfitsonihungutsila ukughula kwangu,

14 ghweghwe konighela wogha kwa ndoto,

konenda nipfuke kwa kungalila ghamaono.

15 Apfo nakona ng'apfu ninyonge nimwenyegho nife,

kubita ukughaya apfino.

16 Nakona pfiha kukala mgima, kwaapfla sikala baye matsuwa ghose,

mndeke niliyeka, kwaapfila matsuwa ghangu si chinu baye.

17 Angu imunu yali chinu chachi, mbaka umloleghe,

na mbaka umwikeghe mmoyo?

18 Na umwangileghe chila nemitondo,

na utseghe kumghetsa chila saa?

19 Angu utsoleka tsuwachi ukundola?

Pfihi ng'undeka baye tanu nimetse ghamate?

20 Ka nenda nzambi, pfihi nikutendele choni, ghweghwe yubetetsa iwanu?

Heule unitenda nene niwe chinu cha kulengela ukutowa?

Pfihi nene niwa mtsigho kuna ghweghwe?

21 Heule ng'ulilekelela baye litotso lyangu,

na ng'unileghusila baye ghamatotso ghangu?

Na sambi nene nowasa hasi mtimbwisi nohupa,

kutsonibama, lekeni ng'utsombona baye.