1 Ghumoyo ghwangu ghutenyuka ghendo,

na ghamatsuwa ghangu ghatsigha,

likabuli lyonibeta.

2 Iwonibetsa wanitsunguluka ghendo,

tsinenge tsangu tsolola apfila pfawonighobola.

3 Ghwe Imulungu, unyikile tsamana ghumwenyegho,

angu kuna nani yungi iyatsonyikila tsamana?

4 Ghweghwe kutsitenda mbutsi tsa sale tsangu tsileke kumanya,

apfo uleke kuwaleka wanihume.

5 Munu iyowabiduka sale tsake ili yeye yabwede,

tsinenge tsa iwanaghe ng'atsitsakona baye.

6 Kanitenda niwe chinu cha kusekighwa na iwanu,

niwa munu wakutemighwa ghamate.

7 Tsinenge tsangu ng'atsikona ghoya baye kwaapfila nina usungu,

lukuli lwangu lwose luwa lubewe ka chimbeho.

8 Iwanu wana ihaki wokangawala hawakona aghano ighanilawile,

na awala iwalihela matotso wowaghudubukila awala yang'awompfuka Imulungu.

9 Hata apfo yana ihaki katsoikinda inzila yake,

na ayula iyotenda ghanoghile katsakongetsighwa ingupfu.

10 Lekeni mwemwe mtse, mtse wose,

na sitsomwona baye imunu yana ihekima mna mwemwe.

11 Ghamatsuwa ghangu ghamala,

ghanibamile kutenda ghahinyika,

ghanilolele mmoyo mwangu ghahupa.

12 Iwanu awano wotenda ichilo chiwe misi,

kuna ichisi wao wolonga, ghumwanga ghwahabehi.

13 Ka ning'alolela kutsimu kuko ukaye yangu,

na ning'atandika ichilagho changu mchisi,

14 ning'alikema likabuli, nilonge, ghweghwe kwa aba wangu,

na kumlongela membele, ghweghwe kwa wenye wangu na lumbu wangu,

15 lelo lolelo lyangu lili kwani?

Na nani yatsolyona lilolelo lyangu alyo?

16 Pfihi litsohulumka kuna ghamalango gha kutsimu?

Pfihi litsohulumka hamwe na nane ako kuna litimbwisi?