1 "Pfihi kodaha kumkwegha imanyama iyokemighwa Leviathani na indoano?

Au pfihi kodaha kumwoha kwa lutsabi ilulimi lwake?

2 Pfihi kodaha koha lutsabi mna imula yake,

au kutobola matsino ghake kwa indoano?

3 Angu katsokudedetsa umwonele libatsi?

Pfihi katsolonga naghwe lughalugha?

4 Apfi katselaghana na ghweghwe,

umsole yawe mtumighwa wako matsuwa ghose ing'aghohupa?

5 Angu kutsodawala naye ka chideghe,

apfi kodoha kumwoha lutsabi na wandele wako wadawale naye?

6 Pfihi iwanu iwopfula wasomba watsomchulutsa,

au watsomgana na kuwagholela wachulutsi?

7 Pfihi kodaha kuitobola ingotsi yake kwa ukumhoma migoha mingi,

au kutobola litwi lyake kwa migoha ya kupfulila wasomba.

8 Umwikile ghumoko ghwako,

naghwe kutsokumbuka ghendo ing'ondo itsolawila,

na ng'utsakuyila keli baye ukutenda apfo.

9 Imunu iyololela kumghogha ayo koghutsuka,

na kumwona kuliyeka komlaghasa imunu hasi.

10 Kuduhu iyali mkali wakumghobola.

Lelo nani iyodaha kwima hambele yangu?

11 Mna ghumlomwo ghwake mwolawa imilambi ya ghumoto,

na tsisesi tsa ghomoto tsoghuluka kunze.

12 Sitsenyamala baye ukulonga mbuli tsa pfiungo pfake,

na tsingupfu tsake pfatsili nyingi na liumbo lyake linoghile.

13 Nani iyodaha kumpalula magamba ghake?

Apfi nani iyodaha kumsoghelela na chinu cha ukumwendesela ichikemighwa lijamu?

14 Angu nani iyodaha kupfughula ghumlomo ghwake,

ighutsungulusighwe ghamatsino ighoghela wogha?

15 Yeye keghodela ghamagamba ghake ighakalile mna imisululu.

nagho ghekindilisa hamwe.

16 Chila gamba limwe likindilitsa na liyaghe,

mbaka libeho ng'alidaha baye kubita haghatighati hao.

17 ghohighwa pfinoghile hamwe, tsinanahila hamwe

kuduhu chinu ichidaha kughaghola.

18 Yang'atowa miyesa kolapfa ghumwanga ighumeletseka,

tsinenge tsake ka miyale ya lutsuwa lwa nemitondo tondo.

19 Milambi ya moto yolawa mna ghumlomo ghwake,

na sesi tsa ghumoto tsoghulukila kunze.

20 Yosi lyolawa mna tsimula tsake

ka ghumpfuke ighulawa mna ichiha ichitoghota ichikighwe mchanya mwa midete ikwaka.

21 Ghumuhe ghwake ghwobwina ghumoto ghwa ghamakala,

na milambi ya ghumoto yolawa mna ghumlomo ghwake.

22 Tsingupfu tsokala mna isingo yake,

chila hayoghenda yeye koghela wogha.

23 Tsinyama tsibingilike tsa ilukuli lwake tsinanahila hamwe,

tsinanahila hamwe, ng'atsitsoseghela baye.

24 Imambagha yake ikomala ka libwe,

na ng'omu ka libwe lya hasi lya ukusaghila.

25 Yeye hayakwinuka, wana ingupfu wopfuka,

wakuya kuchughu kwa wogha wao.

26 Imunu yang'amwasila lipanga, ng'alimlagha baye,

ghuwe mgoha au limaghe.

27 Ichuma yeye kochona ka tsani,

na shaba yeye koyona ka biki lyolile.

28 Ghumshale ng'aghudaha baye kumtenda yatsume,

na ghamabwe gha ing'umbewe yeye koghona ka mibangu.

29 Ichilungu yeye kochona ka beleghe,

naye koseka hayohulika ghumsindo ghwa ghumgoha ighukwasighwa.

30 Hasi ha lida lyake kweghala na pfihali ipfitema,

hayobita kokwalutsa hasi na koleka pfitango mna likododo.

31 Yeye koitenda ibahali ifoke ka chiya cha ghamatsi ichitoghota,

koihighisa ibahali ka chiya cha mapfuta ighonung'ila ghoya,

32 Hayobita kuchughu kwake koleka mbulutso ighung'ala,

na munu kodaha kulonga ka ibahali ina mvili nzelu.

33 Muisi kuduhu iyeghala naye,

iyaumbighwe bila kuwa na wogha.

34 Yeye kolola chila chinu ichikwinuka,

yeye kamfalume kwa wose wana ichidandali."