1 Kuna hanu ghendo ha ukuhimba ghamabwe gha fetsa,

na kuna hanu haihopfughighwa inzahabu.

2 Ichuma chohimbighwa hasi mna lidongo,

na ishaba yolubulighwa kulawa mna ghamabwe.

3 Iwohimba ghamabwe womwemwesa kwa itala mna ichisi totolo,

wobama bama mbaka hasi hatali ghendo,

na wohimba ghamabwe ighali mna ichisi totolo.

4 Wohimba kutali na tsing'anda tsa iwanu,

ako maghulu gha iwanu ng'ana ghang'e baye,

wosang'ana kutali na iwanu aku wolebela mna imitsabi.

5 Mna lidongo mumo mwachilawa ichijo,

lekeni hasi ha lidongo chila chinu chotulighwa na ghumoto.

6 Mna ghamabambalawe ghake mwolawa mabwe gha bei ng'ulu ighokemighwa Yakuti,

na litimbwisi lyake lyolapfa msanga ghwa nzahabu.

7 Inzila ighenda ako kuduhu chideghe iyowinda iyoimanya,

wala inenge ya magengele ng'aiyona baye.

8 Wanyama wa kubagho iwoghenda kwa ukwighoda,

ng'ana wang'e baye inzila ayo,

hata isimba ng'ana yang'e amwo baye.

9 Iwanu iwohimba ghamabwe wohimba mna imibambalawe mikomu,

woibomola imidunda kulawa hasi hayanzilile.

10 Wotula nzila mna imibambalawe mikulu,

na tsinenge tsawo tsakona chila libwe lya bei ng'ulu.

11 Wokima ipfikolongo, ghamatsi ghaleke ukubita,

na wolapfa kunze ipfinu ipfipfisike.

12 Lekeni ihekima kwaibamighwa kwani?

Na ukumanya kwakukala kwani?

13 Kuduhu munu iyomanya ihekima iutsighwa bei yachi,

wala ng'aikoneka baye mna isi yawokala iwali wagima.

14 Ghamatsi ighaghendese gholonga, "Hekima ng'aili kuna nene baye,"

na ibahali yolonga, "Hekima ng'aili mghati mwangu baye."

15 Wala ng'aighulighwa baye kwa nzahabu inoghile,

na bei yake ng'ailingighwa baye na ifetsa.

16 Wala ng'aighulighwa baye kwa nzahabu ya Ofiri,

au kwa ghamabwe gha Shohamu na yakuti ighoutsighwa kwa bei ng'ulu.

17 Nzahabu au ghamabwe ighomeletseka ka chiyoo,

ng'aghodaha baye kwighala nayo,

na ina bei ng'ulu kubita ipfinu ipfitengenetsighwe kwa nzahabu inoghile.

18 Ghamabwe gha Marijani na yasipi tuleke kughalonga

ihekima ina bei ng'ulu kubita ghendo libwe lya lulu.

19 Ghamabwe gha yakuti gha njano ighali gha bei ng'ulu kulawa Kushi,

ng'aghodaha baye kwighala na ihekima,

wala ihekima ng'aighulighwa baye kwa nzahabu ya bei ng'ulu.

20 Lelo ihekima kwailawa kwani?

Angu ukumanya kulawa kwani?

21 Ihekima ipfisika mna tsinenge tsa chila chiumbe china ugima.

na ipfisika hata kwa ipfideghe iwali mlanga.

22 Kutsimu na ukufa kolonga,

"Tuhulika mbuli tsake kwa maghutwi ghetu."

23 Imulungu yaliyeka komanya inzila ya ihekima,

na yuyo iyomanya kwaikala kwani.

24 Kwaapfila yeye kolola mbaka kwaitsighila isi,

na kakona chila chinu chili hasi ha lilanga.

25 Hayaling'ile libeho utito wake,

na hayaghalingile ghamatsi,

26 hayailaghitse imvula pfaibamighwa ukutowa,

na kulwikila nzila ilumwesa,

27 baho hayayone ihekima, kamanya ibei yake, na kaitangatsa,

kuya kaikaghula na kaighetsa.

28 Kuya Imulungu kamlongela imunu, "Ukumpfuka IMNDEWA yiyo ihekima,

na ukukala kutali na ighehile kuko ukumanya."