1 Elihu kaghendelela ukulonga, Kwa mdumo aghuno ghumoyo ghwangu ghwoghudema kwa ukupfuka,

2 Tegheletseni Imulungu pfayoduma,

na ukuduma ukulawa mna ghumlomo ghwake,

3 Koleka lumwesa lwake lwenele mlanga mwose,

na kolughala mna chila hanu haitsighila isi.

4 Ukupulika hakumala, Imulungu koduma kwa litsi lya ukulu wake,

na hayoduma keli, koluleka ilumwesa lupulike keli.

5 Imulungu hayodumilila kolapfa litsi lya kukangawatsa,

yeye kotenda makulu kubita ghendo tsimbutsi tsetu pfatsimanya.

6 Kwaapfila koilongela ibalafu, "Ughwe muisi,

pfipfila koghalongela ghamawagha gha imvula, Towa mvula ng'ulu."

7 Kowatenda iwanu weme ukusang'ana tsing'onde tsawo,

ili chila munu iyamuumbile yatange chayatendile Imulungu.

8 Kuya wanyama woghenda kwipfisa,

wokala mna tsimango tsawo.

9 Inyahemu yoduma kulawa hanu hake haikwanzila,

na ichipfeghetsi cholawa mna libeho liduma.

10 Ghumuhe ghwa Imulungu ghoghala ibalafu,

na hanu hakulu ha ghamatsi hogandilila.

11 Koghatenda ghamabingu ghameme ghamawagha,

na ilumwesa lopulika kulawa mna ghamabingu agho.

12 Naye koghalongotsa ghamabingu ghatsunguluke akuno na akuno,

mchanya mwa isi yawokala iwanu,

ghadahe ukutenda chochose chayolaghitsa.

13 Yeye koghala ghamabingu ili ghawatowe iwanu,

au ghaghale imvula mna isi yake,

na ghalangusa uluso wake kwa iwanu.

14 Ghwe Ayubu tegheletsa alino,

winyamale tulu, utegheletse tsing'onde tsa ukungawatsa tsa Imulungu.

15 Apfi komanya Imulungu pfayoghalongotsa ghamabingu,

na pfoyotenda lumwesa lwake luli mna ghamabingu lwake?

16 Angu komanya ghamabingu pfaghokala tulu mlanga?

Atso ng'onde tsa ukukangawatsa tsa ayula iyenele mna ukumanya.

17 Ghamagwanda ghaupfalile ighokutenda utsumbuke ghatsokudesa,

ahala libeho ilisoma kulawa kusini halitsoduma mna isi.

18 Pfihi kodaha kulitandatsa lilanga hamwe naye

na kulitenda liwe komu ka chiyoo cha ishaba isughuligghwe?

19 Ayubu utufunde achila chatutsomlongela Imulungu,

twetwe twahela cha ukulonga naye kwaapfila twetwe twa mchisi, ng'atumanya chinu baye.

20 Angu nimlongele Imulundu ka nobama kulonga naye?

Apfi kuna munu iyolomba yafe?

21 Lelo kuduhu munu iyodaha kululola litsuwa,

apfila pfaling'aika kulanga, ahala libeho halidumile na kughawinga ghamabingu.

22 Imulungu kakutsa kulawa kasikazini aku kong'ala ka nzahabu,

yeye kakutsa mna mg'alo ighututenda tupfuke.

23 Ng'atudaha baye kupfika kwa Imulungu yana tsingupfu,

Yeye kamkulu na kana ngupfu ng'ulu,

kotenda ighali gha ihaki, naye ng'omuwoneya munu baye.

24 Apfo iwanu wompfuka,

kwaapfila yeye ng'owalangula baye awala iwebona wana hekima mmoyo.