1 Kuya Ayubu kedika, kalonga,

2 Ng'ambe apfi pfipfo pfaumwapfile imunu iyalihela ngupfu.

Na apfi pfipfo pfaughukombola ghumoko ghulihela ngupfu.

3 Lola apfila pfaumlongele tsimbuli tsa ukumwapfila imunu iyalihela ihekima,

naghwe kulonga pfinu pfingi pfaumanya.

4 Angu nani iyakwapfile kulonga agho?

Na iloho ya nani ikulongotse ulonge apfo?

5 Iwanu wafile woghudema,

na iwali hasi ha ghamatsi na wase wali mumo pfoghudema,

6 Kutsimu kwamwatsi ghendo hambele hake,

lipondo ilikemighwa Abadoni lyahela chighubiko cha ukumtenda Imulungu yaleke kona.

7 Imulungu kakwanzatsa lilanga lya kaskazini hanu halihela chinu,

na koikondeka isi hanu ng'ahana chinu.

8 Koghakima ghamatsi mna ghamabingu matito,

na ghamabingu agho ng'aghotulika baye kwa utito awo.

9 Keka liduwala mna ichighoda chake cha ufalume,

na kakwanzatsa libingu lyake mchanya mwake.

10 keka liduwala mchanya mwa ghamatsi gha ibahali,

keka ghumbaka ghughole ghumwanga na ichisi.

11 Tsigutso tsa kulanga natso tsoghudema na tsokangawala,

yeye hayotsikembela.

12 Kwa tsingupfu tsake kaihighisa ibahali,

kwa ukumanya kwake tsakalihonda tsoka kulu lya ibahali ilikemighwa Rahabu.

13 Kwa ukuhumla kwake kakutenda kulanga kulangale,

na kwa ghumoko ghwake kalikoma litsoka ilitsuma.

14 Na apfino pfinu chidodo ghendo mna tsisang'ano tsake tsayatendile,

na apfila pfatuhulika iwanu wonong'onetsa napfo pfachigho ghendo.

Lekeni nani iyomanya ingupfu yake ahala hayodumilila kulanga?