1 Kuya Ayubu kedika, kalonga,

2 "Ka usungu wangu ung'alingighwe,

na maghayo ghangu ghang'alingighwe hamwe,

3 ghang'awile matsito kubita msanga ghwa kumwani,

apfo tsimbuli tsanilonga nolonga bila ukufikitsa.

4 Kwaapfila imigoha ya Imulungu yana ingupfu inihoma,

na iloho yangu inwa isumu yake.

ipfinu pfa ukupfuka pfayanendele Imulungu pfingaya wogha.

5 Angu chihongwe wa kubagho kolila aku kakuja mitsani?

Au ing'ombe kolila kuna ghumghina?

6 Angu ichijo chakujighwa bila ghumkele?

Na pfihi uto wa lifinga una mta ghwachi?

7 Nene nolema ghendo hata ukupfilanza,

kuna nene nopfona ka pfijo ipfidesa.

8 Ng'apfu Imulungu yang'anyidike chanimlombile,

na yang'angayile chanilolela,

9 yang'onile pfinogha kunihondahonda,

na kugholosa ghumoko ghwake ghunikome.

10 Acho ching'awile chinu cha ukunikanza,

ning'adalukedaluke kwa kudeng'elela hata ka nina usungu mkulu,

kwaapfila silemile baye ukukinda tsimbuli tsa Imulungu iyelile.

11 Nina ngupfu yachi nene ya ukughendelela kuwa mgima?

Na ukutsigha kwangu kutsakuwatse, mbaka nikalitse?

12 Pfihi nene nina ngupfu ka tsa mabwe?

Au ilukuli lwangu ka lwa shaba?

13 Apfi nene nodaha kwiyapfila nimwenyegho?

Apfi ukwapfilighwa ng'akuli kutali ghendo na nene baye?

14 Imunu iyali habehi na ukutsilika kobamighwa yatendelighwe uluso na sale yake,

hata ka imunu ayo koleka ukumpfuka Imulungu yana ingupfu.

15 Sale tsangu wangutsukila ka lukolongo lwa matsi

wanibugha ka pfikolongo ipfimemile ghamatsi gha msimu,

16 ipfighubikighwe na ibalafu,

ako iseluji ipfisa mghati mwake.

17 Kunze hakutsumbuka yolubuka,

na litsuwa halikwalika ipfikolongo apfo pfonyala ghendo.

18 Imisululo ya wachulutsi woleka nzila yawo woghenda wobama ghamatsi,

woghenda kuchiwala, na kufila kuko.

19 Misululo ya wachulutsi iwolawa Tema wobama ghamatsi,

na imisululo ya wachulutsi iwolawa Sheba wololela ghamatsi agho.

20 Watenyuka ghendo kwaapfila walolela hela.

na hawapfikile ako wakeng'eneka.

21 Mwemwe namwe pfipfo pfamli, ka ipfikolongo apfo,

mwoghona ghamaghayo ghangu, na mwopfuka.

22 Pfihi tsanonga mngaye chinu?

Au mnilihe chinu kulawa mna tsimali tsenu?

23 Au mniswekule kulawa mna ghumoko ghwa ayula iyonyihila?

Au mniswekule kulawa mna ghumoko ghwa awala iwonidununza?

24 Nifundeni, na nene nitsenyamala tulu,

nilanguseni alila lyanitotsile.

25 Lola ghamalonga igholongesa pfaghotama,

lekeni ukughutsa ghutsa kwenu, kufunda choni?

26 Pfihi mwoghamba mwodaha kughabetsa ghamalonga?

Na kughatenda ghamalonga gha imunu iyalihela lolelo ghoneke ka beho?

27 Mwemwe mwomwasila simbi hata imchuwa yawe wenu,

na mwomuutsa hata isale yenu muwe matajili.

28 Lekeni sambi mndole,

kwaapfila sitsomghutsukilani baye.

29 Muye lelo, nowalomba, kuleke kulawila ghehile.

ona, muye, kwaapfila nene na imunu iyanoghile.

30 Pfihi mna ilulimi lwangu mna mbuli ihile?

Au pfihi agho ghanilonga ng'aghodaha kulangusa ighehile baye."