1 Kuya Elihu kaghendelela kulonga,

2 Tegheghetseni chanilonga, mwemwe mna ihekima,

mnihulikitse nene mwemwe immanya.

3 Kwaapfila lighutwi lyohulikitsa ghamalonga,

ka ilulimi pfalulanza ichijo,

4 Lelo twisaghulile iwenyegho aghala ighali ihaki,

twifunde wenyegho aghala ighanoghile.

5 Kwaapfila Ayubu kalonga,

nene nahela totso,

lekeni Imulungu kanyima ihaki yangu,

6 Hata ka nahela totso, nakoneka namghutsu,

na utamu wangu ng'auhoneka baye, hata ka sitotsile baye.

7 Angu kuna munu iyali ka Ayubu,

iyombetsa Imulungu ka apfila kakunwa ghamatsi?

8 Iyelongotsa na iwotenda ghehile,

na iyakwanga hamwe na iwehile?

9 Kwaapfila yeye kolonga,

imunu ng'obweda chinu baye, kwa kubama kumnoghelesa Imulungu.

10 Apfo nitegheletseni nene, mwemwe iwanu immanya.

Imulungu ng'otenda baye ghehile,

na Imulungu yana tsingupfu ng'ototsa baye.

11 Komliha imunu kwa kulola aghala ghayatendile,

na komliha kwa kulola apfila pfayakalile.

12 Nolongesa ghendo, Imulungu ng'otenda ghehile baye,

na Imulungu yana tsingupfu ng'akwaghisa baye ihaki.

13 Angu nani iyamsaghule Imulungu yalongotse isi?

Apfi nani iyamwikile yailole isi yose?

14 Ka Imulungu yang'abamile,

yang'asolile iloho yake, na ghumuhe ghwake ghwa ugima,

15 pfiumbe pfose pfing'afile,

na imunu naye yang'oyile mna litimbwisi.

16 Ka kuna tsimbutsi, uhulike,

utegheletse chanilonga.

17 Pfihi ayula iyakwihila ihaki kodaha ukutawala?

Angu kutsomhigha ayula iyali na ihaki na iyana tsingupfu?

18 Angu pfinogha kumlongela mfalume, ghweghwe ng'uli munu ghendo baye?

Au kumlongela munu mkulu, "Ghweghwe kwiha?"

19 Lelo pfihi kwa ayula ing'ayolola baye ipfihanga pfa iwakulu,

wala ng'owapfikitsa baye iwanu matajili kubita iwanu iwahingwa,

kwaapfila awo wose sang'ano tsa ghamoko ghake.

20 Wakufa kwa ukwidukitsa, kuchilo ghati,

iwanu wohighisighwa na wohupa,

wana ingupfu wobulighwa bila ghumoko ghwa munu.

21 Kwaapfila tsinenge tsake tsolola aghala ghawotenda iwanu,

yeye kolola apfila iwanu pfawokala.

22 Haduhu hanu hatitu, wala hana ichisi totolo,

iwanu wehile hawodaha ukughenda wakepfise.

23 Kwapfila yeye ng'olonga baye,

tsuwachi imunu yaghende yakamhighe.

24 Kowahonda honda iwanu wana tsingupfu aku ng'oghutsa baye,

na koweka wanu wangi wasole hanu hao.

25 Kwaapfila yeye komanya ghose ghawotenda,

naye kowabidula nechilo, nawo wohupa ghendo.

26 Yeye kowatowa kwaapfila watenda ghehile,

aku chila munu kolola,

27 kwaapfila tsawahundukila kungi, waleka kumuwinza yeye,

na watsibetsa tsinzila tsake.

28 Nawo watenda ichililo cha iwanu wahingwa chimpfikile yeye,

naye kahulika ichililo cha iwanu awo iwodununzighwa.

29 Ka yeye yang'enyamala tulu, angu nani iyodaha kumhigha?

Ka yeye yang'apfisa uhanga wake, apfi nani iyodaha kumwona

hata ing'awa wanu wengi au munu yumwe?

30 Kotenda apfo ili imunu yehile yaleke kutawala,

au kowatenda waleke kuwaghalila iwanu ghamaghayo.

31 Tulonge imunu komlongela Imulungu apfino,

Nene nitotsa, lekeni sitsotenda nzambi keli baye.

32 Nifunde aghala nene sighona baye.

na ka nitenda ghehile, sitsotenda keli baye.

33 Angu Imulungu katsomtowa ka pfaubama ghweghwe,

mbaka ughaleme agho?

Kobamighwa ghweghwe ulamle, wala si nene baye wa ukulamla,

apfo ulonge achila chaumanya.

34 Iwanu wana tsimbutsi watsonongela,

na chila imunu iyana ihekima iyonihulikitsa nene katsolonga,

35 Ayubu kolonga bila kumanya,

chayolonga ubotsi uliyeka

36 Ng'apfu Ayubu yang'aghetsighwe mbaka twone kwayotsighila,

kwaapfila kakwidika ka iwanu iwehile,

37 Kwaapfila kakongetsa ghehile mna tsinzambi tsake,

kotubetsa kwa kututowela ghamakofi, kwa ukumlonga pfihile Imulungu.