1 Kuya Ayubu kedika, kalonga,

2 Hata lelolil nene nolongeleka aku ning'ali na usungu,

Imulungu koghendelela kunilagha akuno nene noghutilila.

3 Ng'apfu ning'amanyile hanu hanidaha ukumwona,

hata aho hayokala ning'aghendile!

4 Ning'aghalile ghomba lyangu baho,

na ning'alongile achila ichimemile mna ghumoyo ghwangu.

5 Ning'amanyile achila chayonyidika,

na ning'atangile chayonilongela.

6 Angu yang'ayihile na nene kwa ngupfu tsake tsose?

Baye! Yeye yang'anitegheletse ghendo.

7 Baho imunu yana ihaki kodaha kulonga naye,

Imulungu iyali mlamtsi wangu kodaha kundekelela matsuwa ghose ing'aghohupa.

8 Lola, nighenda mashaliki, simpata baye,

na ning'abwela maghalibi, simwona baye.

9 Ning'ambama kasikazini, simwona baye,

ning'ahunduka kusini, simwona ghendo baye.

10 Lekeni yeye komanya inzila yaniwinza,

na baho hayomalitsa ukunighetsa,

nitsolawa nyela ka nzahabu.

11 Matsayo ghangu ghawinza haghang'ile maghulu ghake.

Na inzila yake niiwinza, wala sibaghuke baye.

12 Sighalekile baye ghamalaghitso ghayalongile,

ghamalonga ghake nigheka mna ghumoyo ghwangu.

13 lekeni yeye ng'oghalambuka baye, nani iyodaha kumtenda yahunduke?

Chayobama, chicho chayotenda.

14 Kwaapfila yeye kotenda aghala ghayabamile nendelighwe,

na kuna ghangi gha ukunitendela kenagho ka agho.

15 Agho ghonenda nene ningilighwe na wogha hambele hake,

ning'aghalangula aghano ghose, nene nompfuka.

16 Imulungu kanitenyula ghumoyo,

Imulungu yana tsingupfu kanenda nene nipfuke.

17 Hata apfo ichisi ng'achinendile nipfuke baye,

wala ichisi totolo ichidiwa chihanga changu.