1 Tsuwa lingi malaika wa IMNDEWA wetingana hamwe hambele ha IMNDEWA, naye Shetani kaghenda baho. 2 IMNDEWA kamghutsa Shetani, "Kwaulawile kuhi ghweghwe?" Shetani kamwidika, "Nene ndawa kwanga kwanga na kutsunguluka tsunguluka muisi." 3 IMNDEWA kamlongela Shetani, "Pfihi imtumighwa wangu Ayubu kumwona? Haduhu munu iyali ka yeye mna isi yose. Yeye ka imunu iyalihela nzambi na kanogha na kompfuka IMNDEWA, kohepa ukutenda ighehile. Naye mbaka sambi kapfipfo, hata ka ghweghwe tsakunisongeletsa nimkome hela." 4 Shetani kamwidika IMNDEWA, "Immale katsolulolesa lukuli lwake matsuwa ghose, katsolapfa pfose pfayali napfo ili yawe mgima. 5 Lekeni sambi ugholose ghumoko ghwako ulaghe ilukuli lwake na imipate yake, naye katsokuligha aku ghweghwe ghumwenyegho kolola." 6 IMNDEWA kamlongela Shetani "Pfinogha, kodaha kumtendela pfaubama, lekeni uleke kumkoma."

7 Baho Shetani koka hambele ha IMNDEWA, kamdununza Ayubu kwa kumwing'a mapute kulawa mwitsayo mbaka mwitwi. 8 Ayubu kasola chihali ketsaghila, na kaghenda kukala mna lipfu. 9 Baho imwehe wake kamlongela, "Pfihi ung'ali komtoghola Imulungu? Mlighe Imulungu ufe." 10 Ayubu kamwidika, "Ghweghwe kolonga ka kwa pinga mbotsi! Pfihi tubokeleghe ghanoghile ghaliyeka kulawa kwa Imulungu, na si ighehile baye?" Mna ghose agho Ayubu ng'atendile nzambi baye kwa ghumlomo ghwake.

11 Lelo sale wadatu wa Ayubu, Elifazi iyolawa Temani, Bilidadi iyolawa Shua, na Sofari iyolawa Naamati, hawahulike maghayo ghampatile Ayubu, chila yumwe kalawa ukaye yake, wetingana hamwe, waghenda kumlola na kumkanza. 12 Hawamwonile kwa kutali, ng'awadahile baye ukumtanga. Apfo wangula chililo, wadegha ghamabwende ghawo, wayesila litimbwisi mwitwi mwao. 13 Wakala naye hasi mtimbwisi kwa matsuwa saba, chilo na misi, kuduhu yumwe iyalongile naye, kwaapfila tsawona apfila pfayang'ali yoghaya ng'ani.