1 Kuya Ayubu kedika, kalonga,

2 Angu mtsoghendelela kunidununza mbaka tsuwachi,

na kunikeng'ena kwa ghamalonga ghenu?

3 Sambi aluno lwa kumi mwemwe mwononga,

angu ng'amkona chinyala baye ukunitendela pfihile?

4 Na hata ka nitotsa ghendo,

alyo totso lyangu nene wala si lyenu baye.

5 Hata ka mwetenda ghendo mwoneke wakulu kubita nene,

hata ka ukughaya kwangu komtendani mnonge.

6 Mmanye ghendo ka Imulungu yuyo iyanitendele ghehile

naye kanyonza mna ghumtegho ghwake.

7 Hata ning'angula chililo, nilonge, notendelighwa pfihile, nene sihulikitsighwa baye,

hata ning'akemelela nyapfilighwe, kuduhu wa ukunitendela ihaki.

8 Yeye Imulungu kaidiwa inzila yangu ndeke kupfosa,

kaighela ichisi nzila yangu.

9 Kautsula ukulu wangu,

kalitsula litaji lili mwitwi mwangu.

10 Kanibena bena chila ubali, na nimala ghendo,

kaling'ola lilolelo lyangu ka mbiki.

11 Yeye konilakatsa kwa imaya yake,

naye kombona ka na yumwe wa maaduwi tsake.

12 Maasikali wake wonitsila kwa ngupfu,

wanyikila lundo lya ghamabwe gha ukunidinila nene,

nawo walitsunguluka lihema lyangu.

13 Kaweka ndughu tsangu wakale kutali na nene,

na sale tsangu wa wanibaghula ghendo.

14 Ndughu tsangu wose woka,

na sale tsangu wa habehi wanisemwa ghendo.

15 Iwokala mkaye yangu na iwatumwa wangu mapinga wombona nene namgheni,

nene niwa mgheni ghendo mna tsinenge tsawo.

16 Nomkema mtumighwa wangu, lekeni yeye ng'onyidika baye,

hata ka nomlomba kwa ghumlomo ghwangu yanyapfile.

17 Imuhe yanihumula yomnung'ila pfihile imwehe wangu,

hata ndughu tsangu wombona nowadesa.

18 Hata iwana wadodo wonibetsa,

hanikoneka, wao wonilonga pfihile.

19 Sale tsangu wakulu wose wonyihila,

na awala waniwakundile wanihunduka.

20 Nisoka mbaka imipate na ingotsi inanahila hamwe,

nene nisungulila likabuli, tsanikala habehi na ukufa.

21 Mboneleni libatsi, mboneleni libatsi, mwemwe sale sangu,

miyenu Imulungu yeye iyangayile ghamaghayo aghano.

22 Heule mwemwe mnidununza ka Imulungu?

Apfi ukughaya kwa ilukuli lwangu mwemwe ng'amkona baye?

23 Ing'awile pfinogha aghano ghanilonga sambi ghang'andikighwe,

ghang'andikighwe mna ichitabu.

24 Ghang'andikighwe kwa chinu cha chuma na lisasi,

mchanya mwa libambalawe ili ghakale matsuwa ghose.

25 Lekeni nomanya ghendo mkombola wangu kamgima,

na hachitsigha chila chinu yeye katsakwima mchanya mwa isi yanyamile.

26 Na ingosti yangu aino ing'aihinyika baye,

na aku ning'ali na ilukuli lwangu luluno,

nene nitsomwona Imulungu.

27 Nene nimwenyegho nitsomwona kwa nenge tsangu,

nene nimwenyegho wala si munu yungi baye.

Lola apfila pfayoninoghela mna ghumoyo ghwangu.

28 Ka mwolonga, tutsomdununza,

kwaapfila kana ghomba lyoneka mghati mwake,

29 mwemwe, mpfuke ukutowighwa na lipanga,

kwaapfila ukughudubuka kwenu kodaha kumtendani mtowighwe,

na baho mtsomanya ka kuna ukuhighighwa.